Vijayadharani Join TVK: பாஜகவில் இருந்து விலகி தவெகவில் இணைந்த விஜயதரணி.. யார் இவர்? இணைய இதுதான் காரணமா?

Vijayadharani: முதல்வர் விஜய் தலைமையில் தமிழக வெற்றிக் கழகம் ஆட்சி அமைத்ததை தொடர்ந்து, அரசியல் களத்தில் பல மாற்றங்கள் நிகழ்ந்து வருகின்றன. இந்நிலையில், பாஜகவில் அதிருப்தியில் இருந்த முன்னாள் சட்டமன்ற உறுப்பினர் விஜயதரணி தவெகவில் இணைந்துள்ளார்.

முன்னாள் எம்எல்ஏ விஜயதரணி

நடந்து முடிந்த சட்டமன்ற தேர்தலில் தமிழக வெற்றிக் கழகம் வெற்றி பெற்றதை அடுத்து முதல்வராக விஜய் பொறுப்பேற்றதில் இருந்து தமிழக அரசியலில் பல்வேறு அதிரடி மாற்றங்கள் நிகழ்ந்த வண்ணம் உள்ளன. இதனையடுத்து அதிமுக, திமுக, பாஜக, அமமுக உள்ளிட்ட கட்சியில் இருந்து விலகி தவெகவில் இணைந்து வருகின்றனர். குறிப்பாக அதிமுக எம்எல்ஏக்கள் மற்றும் முன்னாள் அமைச்சர்கள், முக்கிய நிர்வாகிகள் அடுத்தடுத்து இணைந்து வருவது அக்கட்சியினர் மத்தியில் பெரும் அதிர்ச்சியை ஏற்படுத்தியுள்ளது. இந்நிலையில் பாஜகவில் இருந்து விலகி முன்னாள் சட்டமன்ற உறுப்பினர் விஜயதரணி தமிழக வெற்றிக் கழகத்தில் இணைந்து நயினார் நாகேந்திரனை அதிர்ச்சி அடைய செய்துள்ளார். 

யார் இந்த விஜயதரணி?

கன்னியாகுமரி மாவட்டத்தின் விளவங்கோடு எம்எல்ஏவாக விஜயதரணி மூன்றாவது முறையாக இருந்து வருகிறார். தமிழக சட்டமன்றத்தில் காங்கிரஸ் முதன்மை கொறடா, கட்சியில் அகில இந்திய மகிளா காங்கிரஸ் பொதுச்செயலாளர் உள்ளிட்ட பதவிகளை விஜயதரணி வகித்து வருகிறார். ஆனால், விஜயதரணிக்கு தமிழக அரசியலை விட டெல்லி அரசியலில் மிகுந்த ஆர்வம் கொண்டவர்.

2024 பாஜகவில் இணைந்த விஜயதரணி

ஆகையால், எம்.பி.யாக இருந்த வசந்தகுமார் மறைவை அடுத்து கன்னியாகுமரி மக்களவை தொகுதி இடைத்தேர்தலில் விஜயதரணி எப்படியாவது சீட் வாங்கி போட்டியிட வேண்டும் என பல்வேறு முயற்சிகளை மேற்கொண்டு வந்தார். ஆனால் அவருக்கு வாய்ப்பு வழங்கப்படவில்லை. இதனால் கடும் அதிருப்தியில் இருந்து வந்த விஜயதரணி தனது எம்எல்ஏ பதவியை ராஜினாமா செய்து டெல்லி சென்று ஜே.பி.நட்டா முன்னிலையில் பாஜகவில் இணைந்தார்.

இன்று தவெகவில் ஐக்கியம்

இந்நிலையில் பாஜகவில் இணைந்து இரண்டு ஆண்டுகளாகியும் பாஜகவில் எந்த பதவியும் வழங்கப்படாததால் அதிருப்தியில் இருந்து வந்ததால் அவருக்கு விளவங்கோடு தொகுதியில் வாய்ப்பு வழங்கப்பட்டது. ஆனால், தமிழக வெற்றிக் கழகம் வேட்பாளர் கே.மைக்கேல் குமார் வெற்றி பெற்றார். இனி பாஜகவில் இருந்தால் எந்த பயணும் இல்லை என்று நினைத்த விஜயதரணி பாஜகவில் இருந்து விலகி சென்னை பனையூரில் உள்ள தவெக தலைமை அலுவலகத்தில் அக்கட்சியின் பொதுச்செயலாளர் முன்னிலையில் இணைந்தார்.

அவருடன் அ.தி.மு.க. முன்னாள் அமைச்சர் பச்சைமால், முன்னாள் எம்.பி.க்கள் பால கங்கா, வனரோஜா, இளவரசன் மற்றும் அதிமுக, அமமுக நிர்வாகிகள் என பலரும் இணைந்துள்ளதாக தகவல் வெளியாகியுள்ளது.