சென்னையில் இனி தண்ணீர் பிரச்சனையில்லை.. குடிநீர் ஆதாரங்களை இணைக்கும் 'மெகா' திட்டம்! சூப்பர்!

சென்னை பெருநகர் எல்லைகளுக்குட்பட்ட பகுதிகளில் பிரதான சுற்று குழாய் அமைக்க பராமரிப்பு செலவு உட்பட திட்டத்தின் மொத்த செலவு ரூ.3,108.55 கோடியாக மதிப்பிடப்பட்டுள்ளது. இந்த திட்டத்துக்கு முதல்வர் ஸ்டாலின் ஒப்புதல் அளித்துள்ளார்.

சென்னையின் குடிநீர் ஆதாரங்கள்

தலைநகர் சென்னைக்கு செம்பரம்பாக்கம், புழல் உள்ளிட்ட ஏரிகளின் நீராதாரங்கள், நிலத்தடி நீராதாரங்கள் மற்றும் கடல் நீரை குடிநீராக்கும் நிலையங்கள் மூலம் குடிநீர் வழங்கப்பட்டு வருகிறது. 

தற்போது, ஐந்து குடிநீர் சுத்திகரிப்பு நிலையங்கள் (WTP) மற்றும் கடல் நீரை குடிநீராக்கும் மூன்று நிலையங்கள் (Desalination plants) மூலமாக பெருநகர சென்னைக்கு குடிநீர் விநியோகிக்கப்படுகிறது. நாளொன்றுக்கு 400 மில்லியன் லிட்டர் திறன் கொண்ட கடல் நீரை குடிநீராக்கும் நான்காவது நிலையத்தின் கட்டுமான பணிகள் தற்போது நடைபெற்று வருகின்றன.

84 குடிநீர் விநியோக அமைப்புகள் தண்ணீர் விநியோகம்

தனித்தனியான 8 குடிநீர் நிலையங்களில் இருந்து விநியோக குழாய்கள் (Transmission Main) மூலமாக பல்வேறு குடிநீர் விநியோக நிலையங்களில் (WDS) சுத்திகரிக்கப்பட்ட குடிநீர் பெறப்பட்டு, மக்களுக்கு வழங்கப்பட்டு வருகிறது. 

சென்னைப் பெருநகர குடிநீர் வழங்கல் மற்றும் கழிவுநீரகற்று வாரியத்தின் மூலம், நாளொன்றுக்கு 1,200 மில்லியன் லிட்டர் குடிநீர், பல்வேறு குடிநீர் விநியோக நிலையங்கள் மூலமாக சென்னையில் உள்ள 85.7 லட்சம் மக்கள் தொகைக்கு 84 குடிநீர் விநியோக அமைப்புகள் மூலம் விநியோகிக்கப்படுகிறது.

பிரதான சுற்று குழாய் திட்டம்

ஒவ்வொரு நிலையத்திலிருந்தும் குடிநீர் விநியோகம் நகரின் நியமிக்கப்பட்ட பகுதிகளுக்கு பிரதான குழாய்கள் மூலம் தனித்தனியாக வடிவமைக்கப்பட்டுள்ளது. இக்கட்டான காலங்களில் ஒரு பகுதியின் ஆதாரங்களிலிருந்து உபரிநீர், பற்றாக்குறை உள்ள மற்றொரு ஆதாரத்திற்கு மாற்றமுடியாது. இதனால் குடிநீர் கட்டமைப்பில் உள்ள குறைகளை களைவதற்காக, பெருநகர சென்னையில் பிரதான சுற்று குழாய் (Ring Main) திட்டம் உத்தேசிக்கப்பட்டுள்ளது.

ஒன்பது குடிநீராதாரங்களை இணைக்கும்

இத்திட்டத்தின்படி பிரதான சுற்று குழாய் (Ring Main), நாளொன்றுக்கு 400 மில்லியன் லிட்டர் திறன் கொண்ட கடல் நீரை குடிநீராக்கும் நான்காவது நிலையத்தையும் சேர்த்து, ஒன்பது குடிநீராதாரங்களை ஒரு வளையமாக இணைக்கிறது. பிரதான சுற்று குழாய் திட்டம் உந்து நிலையங்கள், செலுத்தும் குழாய்கள் (feeder main), மற்றும் விநியோக குழாய்களை (Transmission Main) உள்ளடக்கியதாகும். 

இத்திட்டத்தில், செலுத்தும் குழாய்கள் (feeder main) மூலமாக ஒன்பது உந்து நிலையங்களிலிருந்து குடிநீர் பெறுவதற்கு, பெருநகர சென்னையச் சுற்றி, 98 கிலோமீட்டர் நீளத்திற்கு தேனிரும்பு (MS) குழாய் கொண்ட பிரதான சுற்றுக்குழாய் உத்தேசிக்கப்பட்டுள்ளது.

சமமான குடிநீர் வழங்குவதை உறுதிசெய்யும்

பிரதான சுற்றுக்குழாயில் இருந்து பெருநகர சென்னை மாநகரின் எல்லைக்குட்பட்ட பகுதிகளில் அமைந்துள்ள 84 குடிநீர் விநியோக நிலையங்களுக்கு குடிநீர் விநியோகிக்கப்படும். பிரதான சுற்று குழாய் திட்டம், 2057ம் ஆண்டுக்கான இறுதி தேவையை நிறைவு செய்ய, நாளொன்றுக்கு 1762 மில்லியன் லிட்டர் அளவுக்கு வடிவமைக்கப்பட்டுள்ளது. 

பிரதான சுற்று குழாய் திட்டம், ஒரு நீராதாரத்தில் பற்றாக்குறை ஏற்பட்டாலும் அனைத்து நீரேற்று நிலையங்களிலிருந்தும் சமமான குடிநீர் வழங்குவதை உறுதிசெய்யும்.

முதல்வர் ஒப்புதல்; நிதி ஒதுக்கீடு எவ்வளவு?

சென்னை பெருநகர் எல்லைகளுக்குட்பட்ட பகுதிகளில் பிரதான சுற்று குழாய் அமைக்கவும் மற்றும் அதன் 10 ஆண்டுகளுக்கான செயல்பாடு மற்றும் பராமரிப்பு செலவு உட்பட திட்டத்தின் மொத்த செலவு ரூ.3,108.55 கோடியாக மதிப்பிடப்பட்டுள்ளது.

 இத்திட்டத்திற்கு முதல்வர் மு.க.ஸ்டாலின் கொள்கை ஒப்புதல் வழங்கி ஆணையிட்டுள்ளார்கள். இத்திட்டத்தை ஆசிய வளர்ச்சி வங்கியின் (Asian Development Bank) கடனுதவியின் கீழ் நான்கு ஆண்டு ஒப்பந்த காலத்தில் நிறைவேற்றும் வகையில் திட்டமிடப்பட்டுள்ளது என்பது குறிப்பிடத்தக்கது.