பிரெஞ்ச் ஓபன் டென்னிஸ் போட்டியில் ரஃபேல் நடால் கெளரவிக்கப்பட்டார். பல ஆண்டுகளாக தான் ஆதிக்கம் செலுத்திய டென்னிஸ் மைதானத்துக்கு வந்தவுடன் ரஃபேல் நடால் கண் கலங்கினார்.
டென்னிஸ் ஜாம்பவான் ரஃபேல் நடால் பிரான்ஸ் தலைநகர் பாரிஸில் நடந்த பிரெஞ்ச் ஓபன் போட்டியின் விழாவின் போது கௌரவிக்கப்பட்டார். கிராண்ட் ஸ்லாம் தொடர்களில் ஒன்றான பிரெஞ்சு ஓபன் டென்னிஸ் பாரிஸில் நேற்று தொடங்கியது.
ஜூன் 8-ம் தேதி வரை நடைபெறும் இந்தத் தொடரில் ஸ்பெயினின் கார்லோஸ் அல்கராஸ், இத்தாலியின் ஜன்னிக் சின்னர், செர்பியாவின் நோவக் ஜோகோவிச் உள்ளிட்ட உலகின் முன்னணி வீரர்கள் பலப்பரீட்சை நடத்துகின்றனர்.
25
டென்னிஸ் ஜாம்பவான் ரஃபேல் நடால்
இந்நிலையில், பாரிஸில் பிரெஞ்ச் ஓபன் போட்டிகள் நடைபெறும் ரோலண்ட் கரோஸ் ஸ்டேடியத்தில் தொழில்முறை டென்னிஸில் இருந்து ஓய்வு பெற்ற ரஃபேல் நடாலுக்கு பிரியாவிடை அளிக்கப்பட்டது.
பல ஆண்டுகளாக தான் ஆதிக்கம் செலுத்திய டென்னிஸ் மைதானத்தில் ஒரு போட்டியாளராக அல்லாமல் புகழ்பெற்ற ஜாம்பவனாக வந்த ரஃபேல் நடாலுக்கு ரசிகர்கள் உற்சாக வரவேற்பு அளித்தனர்.
ஆரஞ்சு நிற "மெர்சி ரஃபா" சட்டைகளை அணிந்த ஆயிரக்கணக்கான ரசிகர்களால் வரவேற்கப்பட்ட ரஃபேல் நடால், தான் சாதனைகளை குவித்த களிமண் களத்தில் காலடி எடுத்து வைத்தபோது தன்னை அறியாமல் கண்கலங்கினார்.
35
உணர்ச்சி பொங்க பேசிய ரஃபேல் நடால்
தொடர்ந்து ரசிகர்கள் ஆரவாரம் செய்தபோது, ரஃபேல் நடால் கண்ணீரைத் தடுத்து நிறுத்தி, பிரெஞ்சு, ஆங்கிலம் மற்றும் தனது தாய்மொழியான ஸ்பானிஷ் மொழிகளில் உரை நிகழ்த்தினார். அப்போது அவர் ரோலண்ட் கரோஸ் மைதானத்தில் இரண்டு தசாப்த கால வெற்றிகள், பின்னடைவுகள் மற்றும் மறக்க முடியாத நினைவுகளை நினைவு கூர்ந்தார்.
''கடந்த 20 ஆண்டுகளாக இந்த மைதானத்தில் விளையாடிய பிறகு எங்கிருந்து தொடங்குவது என்று எனக்குத் தெரியவில்லை. வெற்றி, தோல்வி ஒரு அங்கம். ஆனால் இங்கு இருக்க வாய்ப்பு கிடைத்த ஒவ்வொரு முறையும் நான் நெகிழ்ச்சியடைந்தேன்'' என்று ரஃபேல் நடால் உணர்ச்சி பொங்க தெரிவித்தார்.
தொடர்ந்து பேசிய ரஃபேல் நடால்,''நன்றி, பிரான்ஸ். நன்றி, பாரிஸ். நான் ஒருபோதும் நினைத்துப் பார்க்க முடியாத உணர்ச்சிகளையும் தருணங்களையும் நீங்கள் எனக்குக் கொடுத்திருக்கிறீர்கள். மிக முக்கியமான இடத்தில் பாராட்டப்படுவது எவ்வளவு மகிழ்ச்சிகரமானது என்பதை நீங்கள் ஒருபோதும் அறிய முடியாது.
நீங்கள் என்னை ஒரு பிரெஞ்சுக்காரராக உணர வைத்தீர்கள். இனிமேல் உங்கள் முன் என்னால் விளையாட முடியாது. ஆனால் என் இதயமும் என் நினைவுகளும் எப்போதும் இந்த இடத்துடன் இருக்கும்'' என்று கூறியபோது ரசிகர்களின் ஆரவாரத்தால் அந்த இடமே அதிர்ந்தது.
55
ரஃபேல் நடால் சாதனைகள் என்னென்ன?
ஸ்பெயினை சேர்ந்த 38 வயதான ரஃபேல் நடால் கடந்த ஆண்டு நவம்பர் மாதம் தொழில்முறை டென்னிஸ் போட்டியில் இருந்து ஓய்வு பெற்றார். 'களிமண் மன்னன்' என அழைக்கப்படும் ரஃபேல் நடால், சுமார் 20 ஆண்டு காலம் களிமண் களத்தில் ஆதிக்கம் செலுத்திய ஒரே வீரர் ஆவார்.
ஆடவர் ஒற்றையர் பிரிவில் 14 பிரெஞ்சு ஓபன் பட்டங்கள் உள்பட 22 கிராண்ட்ஸ்லாம் பட்டங்களை ரஃபேல் நடால் வென்றுள்ளது குறிப்பிடத்தக்கது.
கிரிக்கெட் மற்றும் விளையாட்டு உலகின் (Sports News in Tamil) நிமிட நிமிட தமிழ் செய்தி அப்டேட்களுக்காக ஏஷ்யாநெட் தமிழ்-ஐ பின்பற்றுங்கள். IPL லைவ் உட்பட டீம் இந்தியாவின் பிரேக்கிங் நியூஸ் (Cricket News in Tamil), சிறப்பு ரிப்போர்ட்கள் மற்றும் நேரலைகளுடன் முழுமையான தகவல்கள் உங்களுக்கு ஒரே கிளிக்கில் கிடைக்கும். ஏஷ்யாநெட் தமிழ் அதிகாரப்பூர்வ ஆப்பைப் டவுன்லோடு செய்து அனைத்து அப்டேட்களையும் பெறுங்கள்.
