FIFA: மெஸ்ஸியின் சாதனையை தகர்த்த எம்பாப்பே! ஆனாலும் பிரான்ஸை வீழ்த்தி இங்கிலாந்து புதிய வரலாறு!

FIFA உலகக்கோப்பையில் 3வது இடத்துக்கான போட்டியில் பிரான்ஸை வீழ்த்தி இங்கிலாந்து வெற்றி பெற்றது. மெஸ்ஸி சாதனையை தகர்த்து உலகக்கோப்பை வரலாற்றில் அதிக கோல்கள் அடித்த வீரர் என்ற பெருமையை எம்பாப்பே பெற்றார்.

3வது இடத்துக்கான போட்டியில் பிரான்ஸை வீழ்த்திய இங்கிலாந்து

FIFA உலகக்கோப்பை 2026 கால்பந்து தொடரில், வெண்கலப் பதக்கத்துக்கான போட்டி சனிக்கிழமை மியாமி ஸ்டேடியத்தில் நடந்தது. இதில் பிரான்ஸ் அணியை 6-4 என்ற கோல் கணக்கில் இங்கிலாந்து வீழ்த்தி வெண்கலப் பதக்கத்தை தட்டிச் சென்றது. மொத்தம் 10 கோல்கள் அடிக்கப்பட்ட இந்த ஆட்டம், ரசிகர்களுக்கு ஒரு த்ரில்லர் விருந்தாக அமைந்தது. பிரான்ஸ் அணியின் பயிற்சியாளர் டிடியர் டெஷாம்ப்ஸுக்கு இது கடைசிப் போட்டி. 14 ஆண்டுகளாக பயிற்சியாளராக இருந்த அவரது பயணம், இந்தத் தோல்வியுடன் முடிவுக்கு வந்தது குறிப்பிடத்தக்கது.

அதிக கோல்கள்; இதுவே முதன்முறை

நவீன உலகக்கோப்பை வரலாற்றில், மூன்றாவது இடத்துக்கான போட்டியில் இவ்வளவு கோல்கள் அடிக்கப்பட்டது இதுவே முதல் முறை. இங்கிலாந்தின் புகாயோ சாகா ஹாட்ரிக் கோல் அடித்து அசத்தினார். பிரான்ஸின் கைலியன் எம்பாப்பே இரண்டு கோல்கள் அடித்தாலும், அது அணியின் வெற்றிக்கு உதவவில்லை. இந்த வெற்றியின் மூலம், 1966-க்குப் பிறகு வெளிநாட்டில் நடந்த உலகக்கோப்பையில் இங்கிலாந்து பெற்ற சிறந்த இடம் இதுவாகும்.

புகாயோ சாகா ஹாட்ரிக் கோல்

ஆட்டத்தின் முதல் பாதியை இங்கிலாந்து முழுமையாக தன் கட்டுப்பாட்டில் வைத்திருந்தது. பிரான்ஸ் அணி சுதாரிப்பதற்குள், இடைவேளைக்கு முன்பே 4-0 என முன்னிலை பெற்று அதிர்ச்சி கொடுத்தது. ஆட்டம் தொடங்கிய 3-வது நிமிடத்திலேயே டெக்லன் ரைஸ் முதல் கோலை அடித்தார். 18-வது நிமிடத்தில் டிஃபெண்டர் எஸ்ரி கோன்சா இரண்டாவது கோலை அடித்தார். அதன்பிறகு புகாயோ சாகா, 37 மற்றும் 45+1-வது நிமிடங்களில் அடுத்தடுத்து இரண்டு கோல்கள் அடித்து மிரட்டினார். உலகக்கோப்பை வரலாற்றிலேயே பிரான்ஸ் அணி ஒரு பாதி ஆட்டத்தில் நான்கு கோல்களை விட்டுக்கொடுப்பது இதுவே முதல் முறை.

மீண்டு வந்த பிரான்ஸ்

ஆனால், இரண்டாவது பாதியில் ஆட்டம் தலைகீழாக மாறியது. பிரான்ஸ் அணியின் பயிற்சியாளராக தனது 187-வது மற்றும் கடைசிப் போட்டியை எதிர்கொண்ட டிடியர் டெஷாம்ப்ஸ், இடைவேளையின்போது சில முக்கிய வீரர்களை மாற்றி களமிறக்கினார். இது பிரான்ஸ் அணிக்கு புது உத்வேகத்தைக் கொடுத்தது.

பிரான்ஸ் அணியின் எழுச்சிக்கு எம்பாப்பே தலைமை தாங்கினார். அவர் 48-வது நிமிடத்தில் ஒரு கோல் அடித்தார். அடுத்த ஆறே நிமிடத்தில், பிராட்லி பார்கோலா இன்னொரு கோல் அடிக்க, ஸ்கோர் 4-2 ஆனது. 66-வது நிமிடத்தில் எம்பாப்பே மீண்டும் ஒரு கோல் அடிக்க, பிரான்ஸ் அணி 4-3 என நெருங்கி வந்தது. இந்தத் தொடர் தாக்குதல்களால் இங்கிலாந்து அணி நிலைகுலைந்து போனது.

மெஸ்ஸி சாதனையை தகர்த்த எம்பாப்பே

இந்த இரண்டாவது கோல் மூலம், எம்பாப்பே ஒரு புதிய உலக சாதனையை படைத்தார். உலகக்கோப்பை வரலாற்றில் அதிக கோல்கள் அடித்த வீரர் என்ற பெருமையை அவர் பெற்றார். லயோனல் மெஸ்ஸியின் 21 கோல்கள் சாதனையை முறியடித்து, தனது மொத்த கோல் எண்ணிக்கையை 22 ஆக உயர்த்தினார்.

தாமஸ் டுஷலின் இங்கிலாந்து அணியிடமிருந்து ஆட்டம் கைநழுவிப் போவது போல தெரிந்த நிலையில், அவர்களுக்கு ஒரு வாய்ப்பு கிடைத்தது. ஆட்டத்தின் 87-வது நிமிடத்தில் கிடைத்த பெனால்டியை, சாகா நிதானமாக கோலாக மாற்றி தனது ஹாட்ரிக்கை நிறைவு செய்தார். இதனால் ஸ்கோர் 5-3 என உயர்ந்தது.

இங்கிலாந்து அணி அபார வெற்றி

ஆட்டத்தின் கடைசி நிமிடங்கள் பரபரப்பாக சென்றன. கூடுதல் நேரத்தின் 90+6-வது நிமிடத்தில் பிரான்ஸின் உஸ்மான் டெம்பேலே ஒரு கோல் அடித்து மீண்டும் பதற்றத்தை ஏற்படுத்தினார். ஆனால், அடுத்த இரண்டு நிமிடத்தில், அதாவது 90+8-வது நிமிடத்தில், இங்கிலாந்தின் ஜூட் பெல்லிங்ஹாம் ஒரு கோல் அடித்து ஆட்டத்திற்கு முற்றுப்புள்ளி வைத்தார். இறுதியில், இங்கிலாந்து 6-4 என்ற கோல் கணக்கில் அபார வெற்றி பெற்று, FIFA உலகக்கோப்பை 2026 தொடரை வெற்றியுடன் நிறைவு செய்தது.