36 பந்துகளில் சதம் விளாசிய மும்பை வீரரை தட்டித்தூக்கும் சிஎஸ்கே.. அஸ்வின் பாராட்டிய ஆயுஷ் வர்தக் யார்?

குஜராத் டைட்டன்ஸ் அணியிடம் மோசமான தோல்வியைத் தழுவிய சிஎஸ்கே, தனது அடுத்த போட்டியில் பலம் வாய்ந்த மும்பை இந்தியன்ஸ் (MI) அணியை சென்னை சேப்பாக்கம் மைதானத்தில் எதிர்கொள்கிறது.

சிஎஸ்கே அழைப்பு விடுத்த ஆயுஷ் வர்தக்

ஐபிஎல் 2026 கிரிக்கெட் திருவிழா களைகட்டியுள்ள நிலையில், 5 முறை சாம்பியனான சிஎஸ்கே அணியின் நிலைமை மிகவும் மோசமாக உள்ளது. இதுவரை 8 போட்டிகளில் விளையாடியுள்ள சிஎஸ்கே 3 வெற்றி மட்டுமே பெற்று 5 தோல்விகளுடன் புள்ளிப்பட்டியலில் 6வது இடத்தில் உள்ளது. அந்த அணியின் அதிரடி வீரர் ஆயுஷ் மாத்ரே காயம் காரணமாக தொடரில் இருந்து வெளியேறி விட்டார். இதனால் சிஎஸ்கே தனது பேட்டிங் வரிசையை பலப்படுத்த அதிரடி மாற்றங்களைச் செய்து வருகிறது.

36 பந்துகளில் சதம் விளாசினார்

அந்த வகையில், மும்பையைச் சேர்ந்த 21 வயதான இளம் ஆல்-ரவுண்டர் ஆயுஷ் வர்தக் (Ayush Vartak) தற்போது சிஎஸ்கே அணியின் பயிற்சி ஆட்டங்களில் (Trials) பங்கேற்க அழைக்கப்பட்டுள்ளார். ஆயுஷ் மாத்ரே போல் ஆயுஷ் வர்தக்கும் மிகச்சிறந்த அதிரடி வீரர். இவர் 2020-ஆம் ஆண்டு மும்பை இந்தியன்ஸ் ஜூனியர் அணிக்காக விளையாடிய போது, காங்கா லீக் தொடரில் வெறும் 36 பந்துகளில் சதம் விளாசி அனைவரது கவனத்தையும் ஈர்த்தார். 2025-ஆம் ஆண்டு நடைபெற்ற மாநிலங்களுக்கு இடையிலான 23 வயதுக்குட்பட்டோருக்கான (Under-23) ஒருநாள் தொடரில், 6 இன்னிங்ஸ்களில் 363 ரன்கள் குவித்தார். இதில் 26 சிக்ஸர்கள் அடங்கும்.

சிறந்த 23 வயதுக்குட்பட்ட வீரர்

மும்பை கிரிக்கெட் சங்கத்தின் (MCA) 2024-ஆம் ஆண்டிற்கான 'சிறந்த 23 வயதுக்குட்பட்ட வீரர்' விருதையும் ஆயுஷ் வர்தக் வென்றுள்ளார். இவர் வெறும் அதிரடிக்காக மட்டுமின்றி மன உறுதிக்கும் பெயர் பெற்றவர். ஒருமுறை காலில் ரத்தம் சொட்டச் சொட்ட அவர் பேட்டிங் செய்தது அவரது அர்ப்பணிப்பைக் காட்டியது. ஆயுஷ் வர்தக்குக்கு சிஎஸ்கே அழைப்பு விடுத்ததற்கு இந்திய கிரிக்கெட் ஜாம்பவான் ரவிச்சந்திரன் அஸ்வின் பாராட்டியுள்ளார்.

அஸ்வின் பாராட்டு

இது தொடர்பாக எக்ஸ் தளத்தில் பதிவிட்ட அஸ்வின், ''ஏலத்தில் விற்கப்படாத போதிலும், திறமையான வீரர்களைத் தேடிப் பிடிப்பதில் சிஎஸ்கே எப்போதும் கில்லாடி என்பதை இது நிரூபிக்கிறது'' என்று அவர் கூறியுள்ளார். ஆயுஷ் மாத்ரே தொடக்க வீரராக அறியப்பட்டாலும், வர்தக் மிடில் ஆர்டரில் வந்து ஆட்டத்தின் போக்கை மாற்றக்கூடியவர். குஜராத் அணிக்கு எதிரான தோல்விக்குப் பிறகு, சிஎஸ்கேவுக்கு இவரைப் போன்ற ஒரு "Impact Player" தேவைப்படுகிறது.

மும்பை இந்தியன்ஸ், சிஎஸ்கே மோதல்

ஆயுஷ் வர்தக் ஏற்கனவே மும்பை இந்தியன்ஸ், சன்ரைசர்ஸ் ஹைதராபாத் மற்றும் ராஜஸ்தான் ராயல்ஸ் ஆகிய அணிகளின் சோதனைகளிலும் பங்கேற்றுள்ளார் என்பது குறிப்பிடத்தக்கது. ஒருவேளை சிஎஸ்கே அணியில் இவர் இடம் பெற்றால், அது அவரது கிரிக்கெட் வாழ்க்கையில் ஒரு மிகப்பெரிய திருப்பமாக அமையும். 

குஜராத் டைட்டன்ஸ் அணியிடம் மோசமான தோல்வியைத் தழுவிய சிஎஸ்கே, தனது அடுத்த போட்டியில் பலம் வாய்ந்த மும்பை இந்தியன்ஸ் (MI) அணியை சென்னை சேப்பாக்கம் மைதானத்தில் எதிர்கொள்கிறது. இந்த போட்டியிலும் மும்பையை வீழ்த்தி சிஎஸ்கே வெற்றிப் பாதைக்கு திரும்புமா? என்பதை பொறுத்திருந்து பார்ப்போம்.