ஐபிஎல் தொடரில் ஆர்சிபி.க்கு அடுத்து கோலிக்கு பிடித்த டீம் எதுனு தெரியுமா?

இந்திய கிரிக்கெட் அணியின் முன்னாள் கேப்டன் விராட் கோலி சர்வதேச கிரிக்கெட்டில் கால் பதித்து 16 ஆண்டுகள் நிறைவடைந்துள்ளது. சர்வதேச கிரிக்கெட்டில் பல்வேறு சாதனைகளை படைத்த கிங் கோலி.. ஐபிஎல் தொடரில் ஆர்சிபி அணியை தவிர தனக்கு பிடித்த எதிரணி அணி எதுவென்று கூறியுள்ளார்.  

Virat Kohli

சர்வதேச கிரிக்கெட்டில் ஏராளமான சாதனைகளை முறியடித்து புதிய சாதனைகளை படைத்த ஜாம்பவான் வீரர். தனது முதல் போட்டியில் வெறும் 12 ரன்களுக்கு ஆட்டமிழந்த விராட் கோலி தற்போது உலக கிரிக்கெட்டையே ஆளும் அளவுக்கு உயர்ந்துள்ளார். இந்த ஸ்டார் வீரர் ஐபிஎல் தொடக்கத்தில் இருந்தே ராயல் சேலஞ்சர்ஸ் பெங்களூரு (ஆர்சிபி) அணிக்காக விளையாடி வருகிறார். ஒவ்வொரு சீசனிலும் ஒரு பிரான்சைஸை மட்டுமே பிரதிநிதித்துவப்படுத்தும் ஒரே வீரர் என்ற உயரிய சாதனையை தன் வசம் வைத்துள்ளார்.  

Virat Kohli

2008ம் ஆண்டு விராட் கோலி ஆர்சிபி அணியில் இணைந்தார். தொடக்கத்தில் ரன்கள் குவிப்பதில் சிரமப்பட்டாலும் ஆர்சிபி அணி அவருக்கு துணையாக நின்றது. தொடக்கத்தில் இருந்து இதுவரை ஆர்சிபி அணியுடனே பயணித்து வருகிறார். 2013 ஆம் ஆண்டு முழுநேர கேப்டனாகவும் பொறுப்பேற்றார். ஐபிஎல் தொடரிலும் ஏராளமான சாதனைகளை படைத்துள்ளார். விராட் கோலி சர்வதேச கிரிக்கெட்டில் 16 ஆண்டுகள் பயணத்தை நிறைவு செய்துள்ளார். இதையொட்டி ஸ்டார் ஸ்போர்ட்ஸ்க்கு பேட்டியளித்த அவர், ஐபிஎல் தொடரில் ஆர்சிபி அணியை தவிர தனக்கு பிடித்த அணிகள் குறித்து ஆச்சரிய தகவலை வெளியிட்டுள்ளார். 

Virat Kohli

விராட் தனது விருப்பமான ஐபிஎல் எதிரணியாக ரோகித் சர்மா தலைமையிலான மும்பை இந்தியன்ஸ் அணியை தேர்வு செய்வார் என எதிர்பார்க்கப்பட்டது ஆனால் அதனை மறுத்துவிட்டார். அதே போன்று தோனி தலைமையிலான சிஎஸ்கே அணியையும் இல்லை என கூறிய அவர்.. கொல்கத்தா நைட் ரைடர்ஸ் (கேகேஆர்) அணியை தனக்கு பிடித்த எதிரணியாக கிங் கோலி குறிப்பிட்டுள்ளார். ஏப்ரல் 18, 2008 ஆம் ஆண்டு ஆர்சிபி - கேகேஆர் அணிகளுக்கு இடையே நடைபெற்ற முதல் ஐபிஎல் போட்டியில் விராட் பங்கேற்றார். சவுரவ் கங்குலி தலைமையிலான அந்த அணி 222 ரன்கள் குவித்தது. இருப்பினும், இந்த போட்டியில் ஆர்சிபி அணி 82 ரன்களுக்கு சுருண்டு தோல்வியடைந்தது. விராட் 5 பந்துகளில் 1 ரன் எடுத்து ஆட்டமிழந்தார்.

Virat Kohli

அதன்பின்னர் 20 ஏப்ரல் 2008 ஆம் ஆண்டு மும்பை இந்தியன்ஸ் அணிக்கு எதிராக விராட் தனது முதல் ஐபிஎல் போட்டியில் விளையாடினார். ஆர்சிபி அணி 166 ரன்கள் இலக்கை எட்டியபோது கிங் கோலி 14 பந்துகளில் 23 ரன்கள் எடுத்தார். இதுவரை ஆர்சிபி அணி ஐபிஎல் இறுதிப்போட்டியில் மும்பை அணியையோ அல்லது கேகேஆர் அணியையோ எதிர்கொண்டது இல்லை.

Virat Kohli

கேகேஆர் அணிக்கு எதிராக விராட் கோலி 34 போட்டிகளில் விளையாடி 962 ரன்கள் குவித்துள்ளார். இதில் ஒரு சதம், 6 அரைசதங்கள் அடங்கும். மும்பை இந்தியன்ஸ் அணிக்கு எதிராக 33 போட்டிகளில் விளையாடி 855 ரன்கள் குவித்துள்ளார். மும்பை அணிக்கு எதிராக விராட் 5 அரைசதங்கள் விளாசியுள்ளார்.

Virat Kohli

ஐபிஎல் தொடரில் அதிக ரன்கள் குவித்த வீரர் என்ற சாதனையை விராட் கோலி தன் வசம் வைத்துள்ளார். 252 போட்டிகளில் விளையாடி 8004 ரன்கள் குவித்துள்ளார் விராட். இதில் 8 சதங்கள், 55 அரைசதங்கள் அடங்கும். விராட் ஆர்சிபி அணியுடன் 3 ஐபிஎல் இறுதிப்போட்டிகளில் விளையாடியுள்ளார். ஆனால் ஒருமுறை கூட கோப்பையை வென்றது இல்லை. வரும் சீசனிலும் விராட் கோலி ஆர்சிபி அணியுடன் நீடிக்க உள்ளார்.