சுப்மன் கில், ஹர்சித் ராணாவுக்கு உயரிய விருது.. பிசிசிஐ கெளரவம்.. என்ன அவார்ட் தெரியுமா?

இந்திய அணி வீரர்கள் சுப்மன் கில் மற்றும் ஹர்சித் ராணா ஆகியோருக்கு பிசிசிஐ உயரிய விருது வழங்கியுள்ளது. இது தொடர்பான முழு விவரங்களை இந்த செய்தியில் விரிவாக பார்க்கலாம்.

சுப்மன் கில்லுக்கு உயரிய விருது

இந்திய கிரிக்கெட் அணியின் நட்சத்திர வீரரும், ஒருநாள் மற்றும் டெஸ்ட் அணிகளின் கேப்டனுமான சுப்மன் கில்லுக்கு, 2024-25 சீசனுக்கான சிறந்த சர்வதேச கிரிக்கெட் வீரர் விருதை (பாலி உம்ரிகர் விருது) பிசிசிஐ வழங்கியுள்ளது. புது டெல்லியில் இன்று நடந்த பிசிசிஐ நமன் விருதுகள் 2026 விழாவில் இந்த விருது கொடுக்கப்பட்டது.

ஹர்சித் ராணாவுக்கும் விருது

இதேபோல் ஆல்-ரவுண்டர் ஹர்ஷித் ராணா, சிறந்த சர்வதேச அறிமுக வீரருக்கான விருதை வென்றார். சொல்லப்போனால், சுப்மன் கில் இந்த விருதை வெல்வது இது இரண்டாவது முறை. இதற்கு முன் 2022-24 சீசனுக்காகவும் இதே விருதை அவர் வாங்கியிருந்தார். 2025-ம் ஆண்டு ஷுப்மன் கில்லுக்கு ஒரு சிறப்பான ஆண்டாக அமைந்தது. குறிப்பாக டெஸ்ட் போட்டிகளில் அவர் கலக்கினார்.

கில்லின் பங்களிப்பு

இங்கிலாந்துக்கு எதிரான ஐந்து போட்டிகள் கொண்ட டெஸ்ட் தொடரில், 10 இன்னிங்ஸ்களில் 75.40 என்ற அபாரமான சராசரியுடன் 754 ரன்கள் குவித்தார். இதில் நான்கு சதங்களும் அடங்கும். அவரின் அதிகபட்ச ஸ்கோர் 269. அதுமட்டுமல்ல, 2025-ல் உலகிலேயே அதிக டெஸ்ட் ரன்கள் எடுத்த வீரரும் கில் தான். அவர் 9 போட்டிகளில் 70.21 சராசரியுடன் 983 ரன்கள் எடுத்தார். 

இந்தியா சாம்பியன்ஸ் டிராபி 2025 வென்றதிலும் முக்கியப் பங்காற்றினார். வங்கதேசத்துக்கு எதிரான தொடரின் முதல் போட்டியில் ஆட்டமிழக்காமல் 101 ரன்கள் அடித்தார். அந்தத் தொடரில் மொத்தமாக 188 ரன்கள் எடுத்து, இந்தியா சார்பில் அதிக ரன் எடுத்தவர்கள் பட்டியலில் மூன்றாவது இடத்தைப் பிடித்தார்.

ஹர்சித் ராணாவும் கலக்கல்

இதற்கிடையே, ஹர்ஷித் ராணாவுக்கு சிறந்த சர்வதேச அறிமுக வீரருக்கான விருது வழங்கப்பட்டது. 2024-ல் டெஸ்ட், 2025-ல் ஒருநாள் மற்றும் 2026-ல் டி20 என அறிமுகமான ராணா, தனது ஆல்-ரவுண்ட் திறமையால், குறிப்பாக ஒயிட்-பால் கிரிக்கெட்டில் அனைவரையும் கவர்ந்தார். 

இதுவரை 14 ஒருநாள் போட்டிகளில் விளையாடியுள்ள ராணா, 27.38 சராசரியில் 26 விக்கெட்டுகளை வீழ்த்தியுள்ளார். பேட்டிங்கில், ஏழு இன்னிங்ஸ்களில் 24.80 சராசரியுடன் 124 ரன்கள் எடுத்துள்ளார். ஒன்பது டி20 போட்டிகளில், 33 சராசரியில் ஒன்பது விக்கெட்டுகளை எடுத்துள்ளார். மூன்று இன்னிங்ஸ்களில் 57 ரன்கள் அடித்துள்ளார் என்பது குறிப்பிடத்தக்கது.