2025 ஆம் ஆண்டு ஐபிஎல் தொடரில் சென்னை சூப்பர் கிங்ஸ் அணியின் கேப்டனுக்கான முதல் தேர்வு ருதுராஜ் கெய்க்வாட் இல்லையென்றால் வேறு யார் சிஎஸ்கே அணியின் கேப்டன் என்ற கேள்வி எழுந்துள்ளது.
கடந்த சில மாதங்களுக்கு முன்பு நடைபெற்ற ஐபிஎல் 2024 தொடரின் 17ஆவது சீசனில் ஷ்ரேயாஸ் ஐயர் தலைமையிலான கொல்கத்தா நைட் ரைடர்ஸ் அணியானது 3ஆவது முறையாக டிராபியை கைப்பற்றியது. இந்த தொடரில் சென்னை சூப்பர் கிங்ஸ் அணியின் கேப்டனாக தோனி நீக்கப்பட்டு அவருக்குப் பதிலாக ருதுராஜ் கெய்க்வாட் புதிய கேப்டனாக அறிவிக்கப்பட்டார்.
இவரது தலைமையிலான சிஎஸ்கே அணியானது விளையாடிய 14 போட்டிகளில் 7ல் வெற்றியும், 7ல் தோல்வியும் அடைந்து புள்ளிப்பட்டியலில் 5ஆவது இடம் பிடித்து பிளே ஆஃப் வாய்ப்பை இழந்து கடைசி அணியாக வெளியேறியது. இந்த தொடரில் ருதுராஜ் கெய்க்வாட் விளையாடிய 14 போட்டிகளில் 583 ரன்கள் குவித்தார்.
இதைத் தொடர்ந்து இந்த ஆண்டு இறுதிக்குள் ஐபிஎல் 2025 தொடருக்கான மெகா ஏலம் நடைபெற இருக்கிறது. இந்த ஏலத்திற்கு முன்பாக ஒவ்வொரு அணியும் 3 முதல் 4 வீரர்களை தக்க வைக்க பிசிசிஐ அனுமதி அளித்துள்ளதாக கூறப்படுகிறது. எனினும் இது தொடர்பான ஆலோசனைக் கூட்டம் வரும் 30 அல்லது 31 ஆம் தேதிகளில் நடைபெற இருக்கிறது.
இந்த நிலையில் தான் கடந்த சில தினங்களுக்கு முன்பு 2025 ஆம் ஆண்டின் ஐபிஎல் தொடரின் போது விக்கெட் கீப்பரான தோனி தனது ஓய்வு முடிவு குறித்து அறிவிக்க வாய்ப்புகள் இருக்கிறது.
அதன் பிறகு சிஎஸ்கே அணிக்கு அனுபவம் வாய்ந்த விக்கெட் கீப்பர் இல்லை. ஆதலால், தான் டெல்லி கேபிடல்ஸ் அணியானது ரிஷப் பண்டை விடுவித்தால், அவர் சிஎஸ்கே அணியில் இடம் பெற அதிக வாய்ப்புகள் இருப்பதாக தகவல் வெளியானது.
ஒருவேளை சிஎஸ்கே அணியில் ரிஷப் பண்ட் இடம் பெற்றால் அவர் தான் கேப்டனுக்கான முதல் தேர்வாக இருப்பார் என்று கூறப்படுகிறது. சிஎஸ்கே நிர்வாகம் அணியின் கேப்டனை மாற்ற நினைத்தால் அதற்கு பண்ட் சரியான தேர்வாக இருப்பார்.