RCB vs GT: பிளே ஆஃப் 'கிங்' ரஜத் படிதார்! சிக்சர் மழை! தோனி, ரெய்னா வரிசையில் மெகா சாதனை!

Rajat Patidar: ஐபிஎல் தொடரின் முதலாவது பிளேஆஃப் போட்டியில் சிக்சர் மழை பொழிந்து குஜராத்தை கதற விட்ட ஆர்சிபி கேப்டன் ரஜத் படிதார், தோனி, ரெய்னா வரிசையில் மெகா சாதனை படைத்துள்ளார்.

குஜராத் பவுலர்களை பந்தாடிய ரஜத் படிதார்

ஆர்சிபி அணியின் நட்சத்திர வீரர் ரஜத் படிதார், ஐபிஎல் பிளேஆஃப் போட்டிகளில் தனது அதிரடி ஆட்டத்தை மீண்டும் ஒருமுறை வெளிப்படுத்தியுள்ளார். தரம்சாலாவில் நடந்த குஜராத் டைட்டன்ஸ் (GT) அணிக்கு எதிரான குவாலிஃபையர் 1 போட்டியில், 33 பந்துகளில் 93 ரன்கள் குவித்து அசத்தினார். ஃபைனலுக்கு நேரடியாக தகுதிபெறும் இந்த முக்கியமான போட்டியில், RCB அணிக்காக களமிறங்கிய படிதார், 5 ஃபோர்கள் மற்றும் 9 சிக்ஸர்களுடன் 281.82 ஸ்ட்ரைக் ரேட்டில் 93 ரன்கள் அடித்து ஆட்டமிழக்காமல் இருந்தார்.

பிளேஆஃப் போட்டிகளில் தொடர்ந்து அதிரடி

இந்த ஆட்டத்தின் மூலம், IPL பிளேஆஃப் போட்டிகளில் தனது சாதனையை மேலும் மெருகேற்றியுள்ளார் படிதார். இதுவரை 6 பிளேஆஃப் இன்னிங்ஸ்களில் விளையாடியுள்ள அவர், 112.66 என்ற அபாரமான சராசரியுடன் 338 ரன்கள் எடுத்துள்ளார். அவரது ஸ்ட்ரைக் ரேட் 193.14. இதில் ஒரு சதம் மற்றும் இரண்டு அரைசதங்கள் அடங்கும். குறிப்பாக, 2022 சீசனில் லக்னோ சூப்பர் ஜெயண்ட்ஸ் (LSG) அணிக்கு எதிரான எலிமினேட்டர் போட்டியில் அவர் அடித்த 112* ரன்கள், RCB பேட்ஸ்மேன்களின் மிகச்சிறந்த ஆட்டங்களில் ஒன்றாக கருதப்படுகிறது.

பிளேஆஃப் போட்டிகளில் மட்டும் 24 சிக்சர்கள்

IPL பிளேஆஃப் போட்டிகளில் இதுவரை 25 ஃபோர்கள் மற்றும் 24 சிக்ஸர்களை விளாசியுள்ளார் படிதார். பிளேஆஃப் வரலாற்றில் அதிக சிக்ஸர்கள் அடித்த வீரர்கள் பட்டியலில் சுரேஷ் ரெய்னா (40), எம்.எஸ். தோனி (28), மற்றும் கிரண் பொல்லார்ட் (25) ஆகியோருக்கு அடுத்த இடத்தில் அவர் இருக்கிறார். இந்த சீசன் ரஜத் படிதாருக்கு மிகச்சிறப்பாக அமைந்துள்ளது. இதுவரை 13 இன்னிங்ஸ்களில் 44.18 சராசரியுடன் 486 ரன்கள் எடுத்துள்ளார். அவரது ஸ்ட்ரைக் ரேட் 196.76. இதில் ஐந்து அரைசதங்கள் அடங்கும். அவரது அதிகபட்ச ஸ்கோர் 93* ஆகும். இந்த தொடரில் இதுவரை 29 ஃபோர்கள் மற்றும் 41 சிக்ஸர்களை அடித்துள்ளார். அதாவது, சராசரியாக ஒவ்வொரு 3.5 பந்துக்கும் ஒரு பவுண்டரி அடித்துள்ளார்.

விராட் கோலியும் சாதனை

இந்த போட்டியில் ஆர்சிபி வீரர் விராட் கோலியும் எந்த வீரரும் நெருங்க முடியாத வரலாற்று சாதனை ஒன்றை படைத்துள்ளார். அதாவது ஐபிஎல் வரலாற்றிலேயே தொடர்ச்சியாக 4 சீசன்களில் 600-க்கும் அதிகமான ரன்களைக் குவித்த முதல் வீரர் என்ற பெருமையை அவர் பெற்றுள்ளார். இந்த சீசனில் இதுவரை 15 இன்னிங்ஸ்களில் விளையாடியுள்ள கோலி, 600 ரன்களை கடந்துள்ளார். அவருடைய பேட்டிங் சராசரி 50.00. இந்த சீசனில் அவருடைய ஸ்ட்ரைக் ரேட் 164.38. இதுதான் ஒரு ஐபிஎல் சீசனில் அவருடைய சிறந்த ஸ்ட்ரைக் ரேட் ஆகும். இதில் ஒரு சதம் மற்றும் நான்கு அரைசதங்கள் அடங்கும் என்பது குறிப்பிடத்தக்கது.