இந்தியா சூப்பர் 8 சுற்றை தாண்டாது.. வாய் விட்ட பாகிஸ்தான் வீரர்.. வச்சு செய்யும் ரசிகர்கள்!

இந்திய அணியை பொறுத்தவரை டி20 உலகக்கோப்பை தொடரின் லீக் சுற்றில் தோல்வியே சந்திக்காமல் சூப்பர் 8 சுற்றுக்குள் நுழைந்துள்ளது. பேட்டிங், பவுலிங் என அனைத்திலும் பலமாக உள்ளது.

டி20 உலகக்கோப்பை 2026

இலங்கை மற்றும் இந்தியாவில் நடந்து வரும் டி20 உலகக்கோப்பை சூடு பிடித்துள்ளது. லீக் சுற்று முடிவடைந்ததை தொடர்ந்து நாளை (பிப்ரவரி 21) முதல் சூப்பர் 8 சுற்று போட்டிகள் தொடங்குகின்றன. இந்தியா, இலங்கை, தென்னாப்பிரிக்கா, பாகிஸ்தான், நியூசிலாந்து, வெஸ்ட் இண்டீஸ், இங்கிலாந்து மற்றும் ஜிம்பாப்வே அணிகள் சூப்பர் 8 சுற்றுக்கு தகுதி பெற்றுள்ளன. 

இந்திய அணி தனது முதல் சூப்பர் 8 சுற்று போட்டியில் பலம் வாய்ந்த தென்னாப்பிரிக்கா அணியை வரும் 22ம் தேதி (ஞாயிற்றுக்கிழமை) குஜராத்தின் அகமதாபாத்தில் உள்ள நரேந்திர மோடி மைதானத்தில் எதிர்கொள்ள உள்ளது.

இந்தியா மீண்டும் கோப்பை வெல்லும்

இந்திய அணியை பொறுத்தவரை டி20 உலகக்கோப்பை தொடரின் லீக் சுற்றில் தோல்வியே சந்திக்காமல் சூப்பர் 8 சுற்றுக்குள் நுழைந்துள்ளது. பேட்டிங், பவுலிங் என அனைத்திலும் பலமாக உள்ளதால் இந்த முறையும் இந்திய அணி தான் கோப்பையை வெல்லும் என முன்னாள் வீரர்கள் பலரும் கணித்துள்ளனர். ஆனால், பாகிஸ்தான் முன்னாள் வீரர் முகமது அமீர் புதிய கணிப்பை வெளியிட்டுள்ளார்.

வாய் விட்ட முகமது அமீர்

அதாவது டி20 உலகக்கோப்பையில் இந்திய அணியின் பயணம் சூப்பர் 8 சுற்றுடன் முடிவடையும் என அவர் கணித்துள்ளார். இந்தியா அரையிறுதிக்கு தகுதி பெறாது. தென்னாப்பிரிக்கா மற்றும் வெஸ்ட் இண்டீஸ் அணிகளிடம் தோல்வி அடையும் என்று முகமது அமீர் தெரிவித்துள்ளார். 

டி20 உலகக்கோப்பையில் இந்தியாவிடம் பாகிஸ்தான் படுதோல்வி அடைந்தது. அந்த தோல்வியின் விரக்தியில் முகமது அமீர் இப்படி பேசுவதாக ரசிகர்கள் அவருக்கு சுடச்சுட பதிலடி கொடுத்து வருகின்றனர்.

இந்திய ரசிகர்கள் பதிலடி

முதலில் இந்தியாவை வீழ்த்துவது எப்படி? என பாகிஸ்தான் வீரர்களுக்கு அறிவுரை சொல்லுங்கள். அதுக்கு அப்புறம் இந்தியா குறித்து பேசலாம் என முகமது அமீருக்கு ரசிகர்கள் பதிலடி கொடுக்கின்றனர். இந்திய அணி சூப்பர் 8 சுற்றின் முதல் போட்டியில் பிப்ரவரி 22 அன்று தென்னாப்பிரிக்காவை எதிர்கொள்கிறது. 

பிப்ரவரி 26 அன்று ஜிம்பாப்வேவுடனும், மார்ச் 1 அன்று வெஸ்ட் இண்டீஸ் அணியுடனும் மோதவுள்ளது. மார்ச் 4 முதல் அரையிறுதிப் போட்டிகள் தொடங்கும். முதல் அரையிறுதி மார்ச் 4 அன்றும், இரண்டாவது அரையிறுதி மார்ச் 5 அன்றும் நடைபெறும். இறுதிப் போட்டி மார்ச் 8 அன்று நடக்கவுள்ளது.