இந்தியர்களுக்கு பிடித்த 'கேன் மாமா'..! கேன் வில்லியம்சன் திடீர் ஓய்வு..! ரசிகர்கள் ஷாக்!

Kane Williamson T20I Retirement: இந்தியர்கள் பாசத்துடன் 'கேன் மாமா' என்று அழைக்கும் நியூசிலாந்து வீரர் கேன் வில்லியம்சன் டி20 கிரிக்கெட்டில் இருந்து ஓய்வு பெறுவதாக அறிவித்துள்ளார்.

கேன் வில்லியம்சன் ஓய்வு

நியூசிலாந்து அணியின் முன்னாள் கேப்டன் கேன் வில்லியம்சன் டி20 சர்வதேசப் போட்டிகளில் இருந்து ஓய்வு பெறுவதாக அறிவித்துள்ளார். குறுகிய வடிவ கிரிக்கெட்டில் இருந்து விலகுவதற்கு இதுவே சரியான நேரம் என்று அவர் கூறியுள்ளார். அதே வேளையில் டி20 ஃபிரான்சைஸ் கிரிக்கெட்டில் தொடர்ந்து விளையாடுவேன் என்று தெரிவித்துள்ளார்.

ஓய்வு பெற சரியான நேரம்

''நீண்ட காலமாக நான் விரும்பிய ஒன்றின் ஒரு பகுதியாக இருந்தேன். அந்த நினைவுகளுக்கும் அனுபவங்களுக்கும் நான் மிகவும் நன்றியுள்ளவனாக இருக்கிறேன். எனக்கும் அணிக்கும் இது சரியான நேரம். இது அணிக்கு அடுத்த தொடர்களுக்கும், அவர்களின் அடுத்த முக்கிய இலக்கான டி20 உலகக் கோப்பைக்கும் ஒரு தெளிவைக் கொடுக்கும்'' என்று வில்லியம்சன் கூறியுள்ளார்.

''நியூசிலந்தில் நிறைய டி20 திறமையாளர்கள் உள்ளனர். அடுத்த காலகட்டம் இந்த வீரர்களுக்கு கிரிக்கெட் வாய்ப்புகளை வழங்கி, அவர்களை உலகக் கோப்பைக்கு தயார்படுத்துவது முக்கியம்'' என்றும் வில்லியம்சன் தெரிவித்துள்ளார்.

டி20 கிரிக்கெட்டில் வில்லியம்சன் சாதனை

35 வயதான வில்லியம்சன் 33 சராசரியுடன் 2575 ரன்கள் குவித்து, நியூசிலாந்தின் இரண்டாவது அதிக டி20 ரன் குவித்த வீரராக உள்ளார். இதில் 18 அரைசதங்கள் அடங்கும். 95 ரன்கள் அதிகபட்ச ஸ்கோர் அடித்துள்ளார். 2011-ல் டி20 போட்டிகளில் அறிமுகமான வில்லியம்சன், 75 போட்டிகளில் நியூசிலாந்து அணிக்கு கேப்டனாக இருந்துள்ளார்.

அவரது தலைமையில் அந்த அணி இரண்டு ஐசிசி டி20 உலகக் கோப்பை அரையிறுதிப் போட்டிகளுக்கும் (2016 & 2022) மற்றும் ஒரு இறுதிப் போட்டிக்கும் (2021) தகுதி பெற்றது.

உலகின் தரம்வாய்ந்த பேட்ஸ்மேன்

நியூசிலாந்து கிரிக்கெட் தலைமை நிர்வாக அதிகாரி ஸ்காட் வீனின்க், வில்லியம்சனின் முடிவை மதிப்பதாகவும், டி20 அணிக்கு அவர் ஆற்றிய பங்களிப்புகளுக்கு வணக்கம் செலுத்துவதாகவும் கூறினார்.

“ஒரு வீரராக கேனின் செயல்பாடுகளும், டி20 அணியின் கேப்டனாக அவரது சேவையும் அளப்பரியது. உலகம் முழுவதும் அனைத்து சூழல்களிலும் அவர் குவித்த ரன்கள், அவர் ஒரு உலகத் தரம் வாய்ந்த பேட்ஸ்மேன் என்பதைப் பிரதிபலிக்கின்றன. அவர் நிச்சயமாக அணியை நல்ல நிலையில் விட்டுச் செல்கிறார்'' என்று ஸ்காட் வீனின்க் தெரிவித்துள்ளார்.

'கேன் மாமா' ஓய்வால் இந்தியர்கள் ஷாக்

கிரிக்கெட்டில் ஆஸ்திரேலிய அணி எதிரணி வீரர்களிடம் எந்த அளவுக்கு சண்டை போட்டும் என்பதும் அறிந்ததே. ஆனால் ஆஸ்திரேலியாவின் அண்டை நாடான நியூசிலாந்து அமைதிக்கு பெயர்போன ஒரு அணியாக உள்ளது. நியூசிலாந்து வீரர்கள் எதிரணி வீரர்களிடம் எந்த சண்டைக்கும் செல்லாமல் அமைதியாக இருப்பதால் உலகின் அனைத்து ரசிகர்களுக்கும் அவர்களை பிடிக்கும்.

இதேபோல் கேன் வில்லியம்சனும் தோல்வி கண்டாலும் சிரித்த முகத்துடன் வலம் வருபவர். இதனால் நியூசிலாந்து அணியையும், கேன் வில்லியம்சனையும் இந்தியர்களுக்கு அதிகம் பிடிக்கும். இந்திய ரசிகர்கள் வில்லியம்சனை 'கேன் மாமா' என்று பாசத்துடன் அழைத்து வருவது குறிப்பிடத்தக்கது.