WTC புள்ளிப்பட்டியலில் சறுக்கிய இந்திய அணி..! எந்த இடம்? பைனலுக்கு செல்வதில் சிக்கல்?

தென்னாப்பிரிக்காவுக்கு எதிரான முதல் டெஸ்ட் போட்டியில் படுதோல்வி அடைந்த இந்திய அணி WTC புள்ளிப்பட்டியலில் சறுக்கியுள்ளது. இந்திய அணி பட்டியலில் எந்த இடத்தில் உள்ளது? என்பது குறித்து பார்க்கலாம்.

WTC புள்ளிப்பட்டியல்

தென்னாப்பிரிக்காவுக்கு எதிரான முதல் டெஸ்ட் போட்டியில் இந்திய அணி 30 ரன்கள் வித்தியாசத்தில் படுதோல்வி அடைந்தது. இந்த தோல்வியைத் தொடர்ந்து உலக டெஸ்ட் சாம்பியன்ஷிப் புள்ளிப் பட்டியலில் இந்தியாவுக்கு பெரும் பின்னடைவு ஏற்பட்டுள்ளது. இந்தத் தோல்வியால் இந்தியா WTC புள்ளிப்பட்டியலில் நான்காவது இடத்திற்கு சரிந்துள்ளது.

இந்தியா எந்த இடம்?

இந்திய அணி 8 டெஸ்ட்களில் நான்கு வெற்றி, மூன்று தோல்வி மற்றும் ஒரு சமநிலையுடன் 54.17 சதவீத புள்ளிகளைப் பெற்றுள்ளது. இந்திய அணி தென்னாபிரிக்காவுக்கு எதிரான 2வது டெஸ்ட்டிலும் தோல்வி அடைந்தால் WTC பைனலுக்கு செல்வதில் சிக்கல் ஏற்படும். 

இந்தியாவுக்கு எதிரான வெற்றியின் மூலம் தென்னாப்பிரிக்கா அணி WTC புள்ளிப்பட்டியலில் இரண்டாவது இடத்திற்கு முன்னேறியுள்ளது. மூன்று போட்டிகளில் இரண்டு வெற்றி, ஒரு தோல்வியுடன் தென்னாப்பிரிக்கா 66.67 சதவீத புள்ளிகளைப் பெற்றுள்ளது. பாகிஸ்தானுக்கு எதிரான ஒரு டெஸ்டில் தென்னாப்பிரிக்கா தோல்வியடைந்தது குறிப்பிடத்தக்கது.

ஆஸ்திரேலியா முதல் இடம்

மூன்று போட்டிகளில் விளையாடி அனைத்திலும் வென்ற ஆஸ்திரேலியா முதல் இடத்தில் தொடர்கிறது. அந்த அணி 100 சதவீத புள்ளிகளுடன் உள்ளது. இரண்டு போட்டிகளில் மட்டுமே விளையாடிய இலங்கை மூன்றாவது இடத்தில் உள்ளது. 66.67 சதவீத புள்ளிகளுடன் உள்ள இலங்கை, இரண்டு போட்டிகளில் ஒன்றில் வென்று, மற்றொன்றை சமன் செய்துள்ளது. இலங்கைக்குப் பின்னால் இந்தியா நான்காவது இடத்தில் உள்ளது.

பாகிஸ்தான் எந்த இடத்தில் உள்ளது?

இந்தியாவுக்குப் பின்னால் பாகிஸ்தான் உள்ளது. இரண்டு போட்டிகளில் ஒரு வெற்றி, ஒரு தோல்வியுடன் 50 சதவீத புள்ளிகளைப் பெற்றுள்ளது. தென்னாப்பிரிக்காவுக்கு எதிரான முதல் டெஸ்டில் வென்ற பாகிஸ்தான், இரண்டாவது போட்டியில் தோல்வியடைந்தது. ஐந்து போட்டிகளில் விளையாடிய இங்கிலாந்து ஆறாவது இடத்தில் உள்ளது. தலா இரண்டு வெற்றி, தோல்விகளுடன் ஒரு போட்டியை சமன் செய்துள்ளது. இங்கிலாந்து 43.33 சதவீத புள்ளிகளைப் பெற்றுள்ளது.

இங்கிலாந்துக்குப் பின்னால் உள்ள வங்கதேசம் ஒரு வெற்றி, ஒரு தோல்வியுடன் 16.67 சதவீத புள்ளிகளைப் பெற்றுள்ளது. ஐந்து போட்டிகளிலும் தோல்வியடைந்த வெஸ்ட் இண்டீஸ் எந்தப் புள்ளியும் பெறவில்லை. நியூசிலாந்து உலக டெஸ்ட் சாம்பியன்ஷிப் சுழற்சியில் இதுவரை ஒரு போட்டியில் கூட விளையாடவில்லை.