நியூசிலாந்து ஓடிஐ தொடரில் 2 இந்திய 'ஸ்டார்' வீரர்களுக்கு ஓய்வு.. ரசிகர்கள் ஷாக்.. பிசிசிஐ முடிவு!

ஹர்திக் பாண்ட்யா உடற்தகுதியுடன் இருந்தால் உள்நாட்டுப் போட்டிகளில் கட்டாயம் பங்கேற்க வேண்டும் என்ற பிசிசிஐயின் உத்தரவுக்கு இணங்க, தற்போது நடைபெற்று வரும் விஜய் ஹசாரே கோப்பையில் பரோடா அணிக்காக விளையாடுவார் என்று எதிர்பார்க்கப்படுகிறது.

இந்தியா, நியூசிலாந்து தொடர்

நியூசிலாந்து அணி இந்தியாவுக்கு சுற்றுப்பயணம் செய்து 3 ஓடிஐ போட்டிகள் மற்றும் 5 டி20 போட்டிகளில் விளையாட உள்ளன. இந்தியா, நியூசிலாந்து இடையிலான 3 ஓடிஐ போட்டிகள் ஜனவரி 11ம் தேதி முதல் தொடங்க உள்ளன. நியூசிலாந்து ஓடிஐ தொடருக்கான இந்திய அணியை பிசிசிஐ ஜனவரி 3 அல்லது 4 ஆம் தேதிகளில் அறிவிக்கும் என எதிர்பார்க்கப்படுகிறது.

ஹர்திக் பாண்ட்யா, பும்ராவுக்கு ஓய்வு

நியூசிலாந்துக்கு எதிரான ஓடிஐ தொடரில் இந்திய அணியின் மூத்த வீரர்கள் சிலருக்கு ஓய்வளிக்க வாய்ப்புள்ளதாக தகவல் வெளியாகி உள்ளது. அதாவது வரவிருக்கும் டி20 உலகக் கோப்பையைக் கருத்தில் கொண்டு, ஹர்திக் பாண்டியா மற்றும் ஜஸ்பிரித் பும்ரா ஆகியோருக்கு இந்தத் தொடரில் ஓய்வளிக்கப்பட வாய்ப்புள்ளது.

 தேர்வாளர்கள் இந்த இரண்டு வீரர்களும் ஐந்து டி20 போட்டிகளுக்கும், பின்னர் இந்தியா மற்றும் இலங்கையில் நடைபெறும் உலகக் கோப்பைக்கும் புத்துணர்ச்சியுடன் இருக்க வேண்டும் என்று விரும்புகிறார்கள்.

பும்ராவின் உடற்தகுதி

இந்த ஆண்டின் தொடக்கத்தில் நடந்த சாம்பியன்ஸ் டிராபிக்குப் பிறகு, ஹர்திக் பாண்ட்யா உடற்தகுதிப் பிரச்சினைகள் காரணமாக ஒரு ஒருநாள் போட்டியிலும் விளையாடவில்லை. ஜஸ்பிரித் பும்ராவும் ஓடிஐ போட்டிகளில் அதிகம் விளையாடவில்லை. அவரது பணிச்சுமை மிகவும் கவனமாக நிர்வகிக்கப்படுகிறது, டி20 உலகக் கோப்பைக்குப் பிறகு 50 ஓவர் வடிவத்தில் அவர் அதிகமாக விளையாடுவார் என்று எதிர்பார்க்கப்படுகிறது.

விஜய் ஹசாரே தொடரில் விளையாடும் ஹர்திக்

அதே வேளையில் ஹர்திக் பாண்ட்யா உடற்தகுதியுடன் இருந்தால் உள்நாட்டுப் போட்டிகளில் கட்டாயம் பங்கேற்க வேண்டும் என்ற பிசிசிஐயின் உத்தரவுக்கு இணங்க, தற்போது நடைபெற்று வரும் விஜய் ஹசாரே கோப்பையில் பரோடா அணிக்காக விளையாடுவார் என்று எதிர்பார்க்கப்படுகிறது. 

கிரிக்பஸ் அறிக்கையின்படி, இவர் ஜனவரி 3, 6 மற்றும் 8 ஆகிய தேதிகளில் ராஜ்கோட்டில் நடைபெறவுள்ள கடைசி மூன்று லீக் சுற்றுப் போட்டிகளில் இரண்டில் விளையாடக்கூடும்.

ஷ்ரேயாஸ் ஐயரும் ரெடி

நியூசிலாந்து ஓடிஐ தொடருக்கான அணித் தேர்வு நடைபெறுவதற்கு முன்னதாக இந்தியாவின் ஒருநாள் துணை கேப்டன் ஷ்ரேயாஸ் ஐயர், தனது உடற்தகுதியை சோதிப்பதற்காக ஜனவரி 3 ஆம் தேதி மகாராஷ்டிராவுக்கு எதிரான மும்பை அணியின் போட்டியில் விளையாடக்கூடும். 

அக்டோபரில் ஆஸ்திரேலிய சுற்றுப்பயணத்தின் போது ஏற்பட்ட மண்ணீரல் காயம் காரணமாக அவர் விளையாடாமல் இருந்து வருகிறார். இதேபோல் யஷஸ்வி ஜெய்ஸ்வால், சூர்யகுமார் யாதவ் மற்றும் ஷிவம் துபே போன்றோரும் விரைவில் மும்பை அணியில் இணைந்து உள்நாட்டுப் போட்டியில் விளையாடுவார்கள் என்று எதிர்பார்க்கப்படுகிறது.