ஹாட் ஸ்பாட் 2 : டூ மச் ஆக இருந்ததா? தூள் கிளப்பியதா? விமர்சனம் இதோ

விக்னேஷ் கார்த்திக் இயக்கத்தில் அஸ்வின் குமார், பிரியா பவானி சங்கர், ஆதித்யா பாஸ்கர் ஆகியோர் நடிப்பில் திரைக்கு வந்துள்ள ஹாட்ஸ்பாட் 2 திரைப்படத்தின் விமர்சனத்தை இந்த தொகுப்பில் பார்க்கலாம்.

Hot Spot 2 Movie Review

தயாரிப்பாளரின் முன் கதை சொல்ல வருகிற ஒரு அறிமுக இயக்குநர் – அந்த ஒற்றை சூழலை மையமாக வைத்து பல சமூகக் கேள்விகளை முன்வைக்கும் படைப்பாக உருவாகியிருக்கிறது ‘ஹாட் ஸ்பாட் 2’. முதல் பாகத்தில் போலவே, இங்கும் தயாரிப்பாளரிடம் கதை சொல்ல வருபவர் ஒரு புதிய இயக்குநர் தான். ஆனால் இம்முறை, அவரது நோக்கம் தனிநபர் வாழ்க்கையை நோக்கியது அல்ல; ஒரு சமூகத்தின் மனநிலையைப் பிரதிபலிப்பதாக இருக்கிறது. அவர் பேச விரும்பும் விஷயம் என்ன? அதன்மூலம் பார்வையாளர்களுக்கு அவர் சொல்ல வருவது என்ன? என்பதே படத்தின் மையக் கேள்வி.

ஹாட் ஸ்பாட் 2 கதை

திரை நட்சத்திரங்களை வெறித்தனமாக பின்தொடரும் ரசிகர்கள், பெண்ணியம்–ஆடை சுதந்திரம் என்ற பெயரில் பெரியவர்களின் உணர்வுகளைப் புரிந்து கொள்ளாத இளைய தலைமுறை, இன்றைய காதலின் நிலையை எண்ணி குழம்பும் ஆண்கள் – இந்த மூன்று தரப்பினரையும் மையமாகக் கொண்டு உருவாகும் தனித்தனி கதைகளில், ஒருபக்கம் மட்டும் பேசாமல் இரு தரப்பிலும் இருக்கும் நியாயங்களை சமநிலையுடன் அலசியிருக்கிறார் இயக்குநர் விக்னேஷ் கார்த்திக். இந்த மூன்று கதைகளையும் இணைக்கும் தொடுப்பாக, கதை சொல்லும் இயக்குநரின் தனிப்பட்ட அனுபவம் மூலம் உலகளவில் பேசப்பட்டு வரும் ஒரு விவாதத்தையும் மிக மென்மையாக தொட்டுச் செல்கிறது படம்.

ஹாட் ஸ்பாட் 2 விமர்சனம்

ஒரே கதைக்கருவை விரிவாக இழுத்துச் செல்லும் முயற்சியைத் தவிர்த்து, சமூகப் பிரச்சனைகளை பேசும் குறுகிய கதைகளை ஒன்றாக இணைத்து சொல்லும் பாணியை விக்னேஷ் கார்த்திக் இங்கும் தொடர்கிறார். அந்த பாணி முதல் பாகத்தைப் போலவே இம்முறையும் பல இடங்களில் கைகொடுத்தாலும், சில காட்சிகளில் அந்த அணுகுமுறையின் வரம்புகள் வெளிப்படுகிறது. அதே நேரத்தில், முதல் பாகத்தைப் போல கடும் சர்ச்சைகளை உருவாக்காமல், ஒரு எல்லைக்குள் நின்று பேச முயன்றிருப்பதும் குறிப்பிடத்தக்கது. பேசப்படும் ஒவ்வொரு விஷயத்திலும் நடுநிலையுடன் அணுகியிருப்பதே படத்தின் தனித்துவம்.

ஹாட் ஸ்பாட் 2 ரிவ்யூ

இப்படத்தில் பிரியா பவானி சங்கர், எம்.எஸ்.பாஸ்கர், தம்பி ராமையா, அஷ்வின், ரக்‌ஷன், ஆதித்யா பாஸ்கர், விக்னேஷ் கார்த்திக், பவானி ஸ்ரீ, பிரிகிடா, சஞ்சனா திவாரி என மிகப்பெரிய நட்சத்திர பட்டாளமே நடித்துள்ளனர். அவர்கள் அனைவரும் தங்களுக்கு கொடுக்கப்பட்ட பாத்திரங்களை நேர்த்தியாக செய்துள்ளனர்.

கதை சொல்லும் முக்கிய கதாபாத்திரத்தில் பிரியா பவானி சங்கர், ஒரே இடத்தில் அமர்ந்தபடியே பல்வேறு உணர்வுகளை வெளிப்படுத்தி கவனம் ஈர்க்கிறார். ஆனால் அந்த கதாபாத்திரத்திற்கு கொடுக்கப்பட்ட ‘பில்டப்’ சில இடங்களில் அதிகமாகத் தோன்றுகிறது. இன்றைய காதல் நிலையை நினைத்து கலங்கும் இளைஞனாக அஷ்வின் காட்டும் நடிப்பில் ஒரு முதிர்ச்சி தெரிகிறது. அவரது நண்பராக வரும் அமரனின் டைமிங் வசனங்கள் படத்திற்கு லைட்டான சிரிப்பை சேர்க்கின்றன.

இளைஞர்களுக்கு அறிவுரை சொல்லும் அழுத்தமான கதாபாத்திரத்தில் எம்.எஸ்.பாஸ்கர் வழக்கம்போல் முத்திரை பதிக்கிறார். அதேபோல், தம்பி ராமையா தனது அதிரடியான செயல்களால் 2K தலைமுறைக்கு ஒரு வித்தியாசமான ‘ஷாக் டோஸ்’ கொடுப்பது கவனம் ஈர்க்கிறது.

ஹாட் ஸ்பாட் 2 ப்ளஸ் - மைனஸ் என்ன?

நான்கு கதைகளுக்கும் ஏற்றாற்போல் களங்களையும் காட்சிகளையும் மாற்றி காட்டியிருக்கும் ஒளிப்பதிவாளர்கள் ஜெகதீஷ் ரவி மற்றும் ஜோசப் பால் படத்திற்கு காட்சி ரீதியாக பலம் சேர்த்திருக்கிறார்கள். சதிஷ் ரகுநாதனின் இசையில், பீஜிஎம் மற்றும் பின்னணி இசை காட்சிகளுக்கு தேவையான உணர்வுகளை உயிர்ப்பிக்கிறது. யு.முத்தயனின் எடிட்டிங், சி.சண்முகத்தின் கலை இயக்கம் ஆகியவை படத்தின் ஓட்டத்தை சீராக வைத்திருக்க உதவியுள்ளன.

எழுத்து மற்றும் இயக்கம் இரண்டையும் கவனித்திருக்கும் விக்னேஷ் கார்த்திக், சூடான சமூக விஷயங்களை நேரடியாக அணுகாமல் சுவாரஸ்யமான முறையில் சொல்ல முயன்றிருக்கிறார். தீர்வுகளைத் திணிக்காமல், சந்தேகங்களையும் கேள்விகளையும் பார்வையாளர்களிடம் முன்வைத்து விவாதங்களைத் தொடரச் செய்வதே அவரது நோக்கம் என்பதும் தெளிவாக தெரிகிறது. ஆனால் அதே பாணியை தொடர்ந்து பயன்படுத்தி, தெளிவான முடிவை சொல்லாமல் முடிப்பது சில பார்வையாளர்களுக்கு சற்று சோர்வை ஏற்படுத்தலாம்.

மொத்தத்தில், ‘ஹாட் ஸ்பாட் 2’ பெரிய ஆச்சரியங்களை அளிக்கவில்லை என்றாலும், சமூக விவாதங்களை நடுநிலையுடன் முன்வைக்கும் ஒரு சிந்தனை முயற்சியாக தன்னை நிலைநிறுத்திக் கொள்கிறது.