Skin Care வெயிலால் தோல் அலர்ஜியா? சமையலறையில் இருக்கும் இந்த 5 பொருட்கள் போதும்!

கோடை வெயிலால் ஏற்படும் சன் அலர்ஜி மற்றும் தோல் அரிப்புக்கு, கெமிக்கல் கிரீம்களைத் தவிர்க்கலாம். அதற்குப் பதிலாக, நம் வீட்டிலேயே இருக்கும் இயற்கையான பொருட்களைக் கொண்டு எப்படி எளிதாக உடனடி நிவாரணம் பெறலாம் என்பதை இந்தத் தொகுப்பில் காண்போம்.

ஜில்லென்ற தர்பூசணி சாறு :

தர்பூசணி பழத்தை சாப்பிட்டுவிட்டு அதன் வெள்ளை நிற தோல் பகுதியை (Rind) தூக்கி எறியாதீர்கள். அதை பிரிட்ஜில் வைத்து ஜில்லென்று ஆனதும், அலர்ஜி உள்ள இடத்தில் மெதுவாகத் தேய்க்கவும். இதில் உள்ள ஆன்டி-ஆக்ஸிடன்ட்கள் தோலின் எரிச்சலை 2 நிமிடத்தில் அடக்கி, குளிர்ச்சியைத் தரும்.

கசகசா - பால் பேஸ்ட் :

ஒரு ஸ்பூன் கசகசாவை காய்ச்சாத குளிர்ந்த பாலில் 10 நிமிடம் ஊற வைத்து, நன்றாக அரைத்துக் கொள்ளுங்கள். இந்த விழுதை அலர்ஜி, அரிப்பு உள்ள இடங்களில் தடவி 15 நிமிடம் கழித்துக் கழுவவும். கசகசா தோலில் ஏற்படும் தீவிரமான அரிப்பை சட்டென்று கட்டுப்படுத்தும். முகம் பளபளப்பாகவும் மாறும்!

குளிர்ந்த மோர் ஒத்தடம் :

நன்றாகக் கடைந்த புளிக்காத ஐஸ் மோரில் ஒரு சுத்தமான துணியை நனைத்து, வெயிலால் சிவந்த தோலின் மீது 10 நிமிடம் போட்டு வையுங்கள். மோரில் உள்ள லாக்டிக் அமிலம் வெயிலால் கருகிய தோலை (Sunburn) குணமாக்கி, அலர்ஜி தடிப்புகளைக் குறைக்கும்.

புதினா - துளசி ஸ்பிரே :

ஒரு கைப்பிடி புதினா மற்றும் துளசி இலைகளை தண்ணீரில் கொதிக்க வைத்து, ஆறவைத்து வடிகட்டி ஒரு ஸ்பிரே பாட்டிலில் ஊற்றி பிரிட்ஜில் வையுங்கள். வெளியே சென்று வந்ததும் இதை முகத்தில் ஸ்பிரே செய்யுங்கள். துளசியின் கிருமிநாசினி குணமும், புதினாவின் குளிர்ச்சியும் தோலுக்கு உடனடி புத்துணர்ச்சி தரும்; அலர்ஜி வராமல் தடுக்கும்.

ஐஸ் க்யூப் செய்த தேங்காய் தண்ணீர் :

இளநீர் அல்லது தேங்காய் தண்ணீரை ஐஸ் டிரேயில் ஊற்றி ஐஸ் கட்டிகளாக மாற்றிக் கொள்ளுங்கள். வெயில் அலர்ஜி உள்ள இடத்தில் இந்த ஐஸ் கட்டியை ஒரு மெல்லிய துணியில் சுற்றி ஒத்தடம் கொடுங்கள். தேங்காய் தண்ணீரில் உள்ள பொட்டாசியம் மற்றும் ஊட்டச்சத்துக்கள் சேதமடைந்த தோலை மிக வேகமாக புதுப்பிக்கும்.