Kitchen Safety: சமையலறையில் இந்த 6 பொருட்கள் இருந்தால் பேராபத்து! உடனடியாக அப்புறப்படுத்துங்கள்.!

Kitchen Safety: நாம் சமையலறையில் பயன்படுத்தும் சில பொருட்கள் உடல்நலத்திற்கும், தீ விபத்துகளுக்கும் காரணமாக அமையலாம். உங்கள் சமையலறையில் இந்த ஆபத்தான பொருட்கள் இருக்கிறதா என உடனடியாகச் சரிபார்க்கவும்.

Kitchen Safety

ஒவ்வொரு வீட்டின் ஆரோக்கியமும் அதன் சமையலறையில்தான் தீர்மானிக்கப்படுகிறது. குடும்பத்தினரின் ஆரோக்கியம் சமையலறையின் சுத்தத்தில் இருந்து தொடங்குகிறது. ஆனால், நம்மில் பலரும் பழக்கத்தின் காரணமாக, காலாவதியான மற்றும் பாதுகாப்பற்ற சில பொருட்களை சமையலறையில் தொடர்ந்து பயன்படுத்துகிறோம். இவை உணவின் தரத்தைக் குறைப்பதோடு, உடல்நலப் பிரச்சினைகளுக்கும் தீ விபத்துகளுக்கும் வழிவகுக்கும் என நிபுணர்கள் எச்சரிக்கின்றனர்.

பிளாஸ்டிக் முதல் பழைய துணி வரை

நீண்ட நாள் பயன்படுத்தியதால் மஞ்சள் நிறமாக மாறிய பிளாஸ்டிக் டப்பாக்கள் பல வீடுகளில் காணப்படும் ஒரு பொதுவான பொருள். வெப்பம் மற்றும் எண்ணெய் மசாலாக்களின் தாக்கத்தால், இந்த டப்பாக்களின் தரம் குறைந்து, சூடான உணவை வைக்கும்போது நச்சு ரசாயனங்களை வெளியிட வாய்ப்புள்ளது. எனவே, பிளாஸ்டிக்கிற்கு பதிலாக கண்ணாடி அல்லது உயர்தர ஸ்டீல் பாத்திரங்களைப் பயன்படுத்துவது சிறந்த பாதுகாப்பை வழங்கும். 

அதேபோல், பாத்திரங்கள் மற்றும் கைகளைத் துடைக்கப் பயன்படுத்தப்படும் பழைய துணிகளில் ஈரப்பதம் தங்கி, பாக்டீரியா மற்றும் பூஞ்சைகள் வளர ஏதுவாகிறது. இந்தத் துணிகளை மீண்டும் பயன்படுத்தும்போது, கிருமிகள் உணவு மற்றும் பாத்திரங்களுக்குப் பரவி, உடல்நலக் கோளாறுகளை ஏற்படுத்தக்கூடும். இது நம்மில் பலரும் கவனிக்கத் தவறும் ஒரு விஷயமாகும்.

உடல்நலனுக்கு கேடு விளைவிக்கும் உபகரணங்கள்

சமையலறையில் பயன்படுத்தப்படும் கரண்டிகள், கத்திகள் போன்ற இரும்புப் பொருட்களில் துருப்பிடித்திருந்தால், அவற்றை உடனடியாக மாற்றுவது அவசியம். துரு, உணவின் சுவையையும் தரத்தையும் பாதிப்பதோடு, அவற்றைச் சுத்தப்படுத்துவதும் கடினம். துருப்பிடித்த கருவிகளைத் தொடர்ந்து பயன்படுத்துவது ஆரோக்கியத்திற்கு நல்லதல்ல. இதைவிட அபாயகரமானது, விரிசல் விட்ட கண்ணாடிப் பாத்திரங்கள். சிறிய விரிசல் இருந்தாலும், அவை எந்த நேரத்திலும் உடைந்து கைகளில் காயம் ஏற்படுத்தலாம். மேலும், கண்ணாடித்துகள்கள் தவறுதலாக உணவில் கலந்தால், அது பேராபத்தில் முடிந்துவிடும்.

தீ விபத்துக்கான அழைப்பிதழ்கள்!

சமையல் எரிவாயு அடுப்புக்கு மிக அருகில் எளிதில் தீப்பற்றக்கூடிய பொருட்களை வைப்பது மிகவும் ஆபத்தான பழக்கம். சமையல் எண்ணெய், காகித டவல்கள், பிளாஸ்டிக் பைகள் மற்றும் மர சாமான்களை அடுப்பிலிருந்து பாதுகாப்பான தூரத்தில் வைக்க வேண்டும். சமையலின்போது ஏற்படும் சிறு தீப்பொறி கூட பெரிய விபத்துக்கு வழிவகுத்துவிடும்.

பிளாஸ்டிக் கவர்கள்

கடைகளில் இருந்து வாங்கி வரும் பிளாஸ்டிக் கவர்களை சமையலறையில் குவித்து வைப்பதும் தவிர்க்கப்பட வேண்டும். இவை தூசியையும் கிருமிகளையும் ஈர்ப்பதோடு, வெப்பம் பட்டால் உருகி தீப்பற்றும் அபாயத்தையும் கொண்டுள்ளன. தேவையற்ற கவர்களை அகற்றி, சமையலறையை நேர்த்தியாகப் பராமரிப்பது அவசியம்.

இறுதியாக, காலாவதியான மசாலாப் பொருட்கள், சரியாக மூடப்படாத டப்பாக்கள் மற்றும் பழுதடைந்த மின்சாதனங்கள் போன்றவற்றை அவ்வப்போது சரிபார்த்து அப்புறப்படுத்துங்கள். சுத்தமான, காற்றோட்டமான மற்றும் பாதுகாப்பான சமையலறையே ஆரோக்கியமான வாழ்வின் அடித்தளம் என்பதை நினைவில் கொள்வது நல்லது.