Mutton: மட்டன் வேகலையா? இந்த ஒரு ஸ்பூன் மேஜிக் பொருளை மட்டும் சேர்த்து பாருங்க!

Mutton: மட்டன் கறி சமைக்கும்போது சரியா வேக மாட்டேங்குதா? குக்கர்ல வெச்சாலும் கறி ரப்பர் மாதிரி இருக்கா? கவலைப்படாதீங்க, இந்த சிம்பிள் டிப்ஸ் உங்களுக்காகத்தான். இத ஃபாலோ பண்ணா, மட்டன் பஞ்சு மாதிரி வெந்து, வாயில வெச்சதும் கரையும்.

Mutton Curry

அசைவ பிரியர்களுக்கு மட்டன் மீது ஒரு தனி பிரியம் உண்டு. ஆனால், அதை சமைப்பதுதான் பலருக்கும் பெரிய தலைவலி. 'சீக்கிரம் வேகாது' என்பதே பொதுவான புகார். இளம் ஆட்டுக்கறி என்றால் எளிதில் வெந்துவிடும். ஆனால், முத்தலான கறி வேக அதிக நேரம் எடுக்கும். கறி எவ்வளவு முத்தலாக இருந்தாலும், சில எளிய பொருட்களைச் சேர்த்து அதை வெண்ணெய் போல வேக வைக்கலாம். அது எப்படி என்று பார்ப்போம்.

1.பச்சை பப்பாளி

முத்தலான மட்டனை சீக்கிரம் வேகவைக்க பச்சை பப்பாளி ஒரு சூப்பர் தீர்வு. பச்சை பப்பாளியின் தோலை சீவி, அதை சிறு துண்டுகளாக நறுக்கி, மென்மையான பேஸ்ட்டாக அரைத்துக்கொள்ளுங்கள். ஒரு கிலோ மட்டனுக்கு, ஒன்று முதல் இரண்டு டீஸ்பூன் பப்பாளி பேஸ்ட் போதும். இந்த பேஸ்ட்டை கறியில் தடவி, அரை மணி நேரம் ஊறவைத்து (marinate) பிறகு சமைத்தால், கறி மென்மையாக வெந்துவிடும். பப்பாளியில் உள்ள 'பப்பாயின்' (papain) என்ற என்சைம், கறியை வேகமாக வேகவைக்க உதவுகிறது.

2. தயிர் சேர்த்து ஊறவைத்தல்

தயிரில் உள்ள லாக்டிக் அமிலம், கறியை மென்மையாக்கும். தயிர், இஞ்சி-பூண்டு விழுது, உப்பு, மசாலா சேர்த்து குறைந்தது 2 மணி நேரம் ஊறவைத்தால் நல்ல பலன் கிடைக்கும். 

3. எலுமிச்சை சாறு அல்லது வினிகர்:

 சிறிதளவு எலுமிச்சை சாறு அல்லது வினிகர் சேர்த்தாலும் கறி மென்மையாகும். ஆனால், அதிகமாகச் சேர்த்தால் கறியின் சுவையும் தன்மையும் மாறிவிடும், கவனம் தேவை. 

4. பிரஷர் குக்கர்: 

முத்தலான கறி குக்கரில் வேகவும் கூடுதல் நேரம் எடுக்கும். அதனால், வழக்கத்தை விட இரண்டு விசில் கூடுதலாக மிதமான தீயில் வேகவிடுங்கள். கறி சீராகவும் சீக்கிரமாகவும் வெந்துவிடும். 

5. வெந்நீர் பயன்படுத்துங்கள்:

சமைக்கும்போது இடையில் தண்ணீர் சேர்க்க வேண்டுமென்றால், பச்சைத் தண்ணீருக்குப் பதில் வெந்நீரை ஊற்றுங்கள். இது சமையல் வெப்பநிலையை குறைக்காமல், கறி இறுக்கமாகாமல் பார்த்துக்கொள்ளும். 

6. சிறிய துண்டுகள்: 

பெரிய துண்டுகளை விட, நடுத்தர அளவுத் துண்டுகளாக நறுக்கினால் கறி சீக்கிரம் வேகும். மசாலாவும் நன்றாகப் பிடிக்கும். இந்த டிப்ஸ்களைப் பின்பற்றினால், எவ்வளவு முத்தலான மட்டனாக இருந்தாலும், அதை சுவையாகவும், ஜூசியாகவும், பஞ்சு போலவும் சமைத்து அசத்தலாம்.