Keto Diet: இறைச்சி போன்ற கொழுப்பு வகை உணவுகளை சாப்பிட பரிந்துரைக்கும், இந்த பேலியோ உணவு முறையை பின்பற்றினால் கிட்னி பாதிப்பு ஏற்படுமா..? என்பதற்கு மருத்துவர்கள் விளக்கம் அளித்துள்ளனர்.
இன்றைய நவீன கலாச்சாரத்தில் உடல் எடையை குறைக்கும் முயற்சிக்கும் பலரும் பேலியோ டயட் அல்லது கீட்டோ முறையை பின்பற்றி வருகின்றனர். கார்போஹைட்ரேட் மற்றும் சர்க்கரை உணவுகளை தவிர்த்து, இந்த டயட்டின் போது பெரும்பாலும் கொழுப்பை மட்டுமே சாப்பிட பரிந்துரைக்கப்படுகிறது. இறைச்சிகள், மீன் மற்றும் கடல் உணவில் ட்ரவுட், சால்மன், இறால், ஒமேகா -3 செறிவூட்டப்பட்ட முட்டைகள், பழங்கள், காய்கறிகள், சீட்ஸ் மற்றும் நட்ஸ் உள்ளிட்டவற்றை சாப்பிடுவது இந்த டயட்டில் அடங்கும்.
இந்த பேலியோ டயட் முறையை பின்பற்றுவது கணிசமான எடை இழப்புக்கு உதவும் மற்றும் அதிக கொழுப்பு மற்றும் நீரிழிவு நோய்க்கான அறிகுறிகளைத் தடுக்கவும் உதவுகிறது. அதே சமயம் நாம் இந்த டயட்டின் போது எடுத்து கொள்ளும் நேரடி கொழுப்பு உணவுகள் மூலம் கிட்னி செயலிழப்பு போன்ற பாதிப்புகள் ஏற்படுமா என்பது குறித்த கேள்விக்கு விடை கிடைத்துள்ளது.
அமெரிக்க சிறுநீரக சிறப்பு நிபுணர்களின் இதழில் வெளியிடப்பட்டுள்ள ஆய்வின் முடிவில், இரண்டு வருடங்கள் தொடர்ந்து கீட்டோ உணவு முறையில் இருந்தவர்களுக்கு சிறுநீரகத்தில் எந்த பாதிப்பும் ஏற்படவில்லை என்று கண்டறியப்பட்டுள்ளது. இருப்பினும், சில வழிகாட்டு நெறிமுறைகள் பின்பற்றப்பட்டுள்ளது.
பேலியோ உணவு முறைக்கு வருவதற்கு முன்னர் முழு ரத்தப் பரிசோதனையும், அல்ட்ரா சவுண்ட் ஸ்கேன் போன்றவை வயிற்றுப்பகுதியில் எடுத்துப் பார்க்கப்படுகிறது. அதில் சிறுநீரகத்தில் கற்கள் அல்லது பாதிப்பு ஏதேனும் இருந்தால் அதற்கேற்ற மாதிரி புரதத்தின் அளவு குறைக்கப்படுகிறது.
இன்னும் பலருக்கு விலங்குகளின் மாமிசம் அவற்றில் உள்ள புரதச்சத்திற்காக தவிர்க்க அறிவுறுத்தப்படுகிறது. சிறுநீரகம் முழுவதும் பழுதான நோயாளிகளுக்கும் கூட தினமும் கட்டாயம் 60 கிராம் புரதச்சத்து பரிந்துரைக்கப்படுகிறது.
எனவே, கீட்டோ உணவு முறையில சிறுநீரகத்தின் செயல் திறன் பாதிப்பு ஏற்படும் என்பது ஒரு மூட நம்பிக்கையாகும். மேலும், இந்த கீட்டோ உணவு முறையில் பலர் தங்களது நீரிழிவு ரத்த கொதிப்பை கண்ட்ரோல் செய்து சிறுநீரகத்தின் செயல் திறனை மீட்டுள்ளனர் என்று கண்டறியப்பட்டுள்ளது.
ஆனால், நம் உடல் உறுப்புகள் இளமையில் இருப்பது போன்றே, முதுமையிலும் இருப்பதில்லை. நாளாக நாளாக எளிமையான உணவை செரிக்கக்கூடிய தன்மையையே ஜீரண உறுப்புக்கள் பெற்றிருக்கும். அப்போது கொழுப்பு அதிகமுள்ள உணவு பிரச்சினை யாகும் என்பதைக் கவனத்தில் கொள்வோம்.