Knuckle Cracking: விரல் சொடக்கும்போது 'டக் டக்'னு சத்தம் வருவது ஏன்? ஆபத்தா? சயின்ஸ் சொல்வது என்ன?

Knuckle Cracking: விரல் சொடக்கும்போது 'டக் டக்'னு சத்தம் வருவது ஏன்? அடிக்கடி விரல் சொடுக்குவதால் மூட்டு வாதம் வருமா? என்பதற்கான விரிவான விளக்கத்தை இந்த செய்தியில் பார்க்கலாம்.

விரல் சொடுக்குவது ஆபத்தா?

நம்மில் பலருக்கும் சிறு வயது முதலே இருக்கும் பழக்கங்களில் ஒன்று, விரல்களை 'டக் டக்' எனச் சொடக்குவது. மன அழுத்தம், சலிப்பு எனப் பல காரணங்களுக்காகச் செய்தாலும், "இப்படி அடிக்கடி செய்தால், வயதான காலத்தில் மூட்டுவாதம் வந்துவிடும்" என்ற எச்சரிக்கையையும் நிச்சயம் கேட்டிருப்போம். உண்மையில், விரல் சொடக்குவதற்கும் மூட்டுவாதத்திற்கும் தொடர்பு உள்ளதா?

சோதனை செய்த அமெரிக்க மருத்துவர்

இந்தக் கேள்விக்கு மிகச் சிறந்த உதாரணமாக அமெரிக்க மருத்துவர் டொனால்ட் அங்கரின் கதை சொல்லப்படுகிறது. தன் தாய் மற்றும் உறவினர்களின் எச்சரிக்கையைச் சோதிக்க விரும்பிய அவர், சுமார் 50 ஆண்டுகளாகத் தனது இடது கை விரல்களை மட்டும் தினமும் சொடக்கி வந்துள்ளார். வலது கையை அவர் ஒப்பிடப் பயன்படுத்தினார்.

பல பத்தாண்டுகளுக்குப் பிறகு, தனது 72வது வயதில் அவர் இரு கைகளையும் எக்ஸ்ரே எடுத்துப் பார்த்தபோது, இரண்டு கைகளிலும் மூட்டுவாதத்திற்கான அறிகுறிகள் இல்லை என்பது தெரியவந்தது. இந்த சுவாரஸ்யமான சுய பரிசோதனைக்காக அவருக்கு Ig Nobel பரிசும் வழங்கப்பட்டது. ஆனாலும், இது ஒரு தனிநபர் ஆய்வு என்பதால், இதை மட்டுமே வைத்து மருத்துவ முடிவுக்கு வர முடியாது.

விரல் சொடுக்கும்போது என்னதான் நடக்கிறது?

நமது விரல் மூட்டுகளுக்குள் 'சினோவியல்' என்ற திரவம் உள்ளது. இது மூட்டுகள் எளிதாக அசைய உதவும் ஒரு மசகு எண்ணெய் போன்றது. நாம் விரல்களை வளைக்கும்போது அல்லது இழுக்கும்போது, மூட்டுகளுக்குள் இருக்கும் அழுத்தம் திடீரெனக் குறைந்து, இந்தத் திரவத்தில் கரைந்துள்ள வாயுக்கள் குமிழிகளாக உருவாகி உடைகின்றன. அந்த 'டக்' என்ற சத்தம் இதனால்தான் ஏற்படுகிறது.

எனவே, விரல் சொடக்கும்போது எலும்புகள் உரசுகின்றன அல்லது தேய்கின்றன என்பது தவறான கருத்து. இது ஒரு இயல்பான உடலியல் நிகழ்வுதான். பல ஆய்வுகளும், சாதாரணமாக விரல் சொடக்கும் பழக்கத்திற்கும் 'ஆஸ்டியோஆர்த்ரைட்டிஸ்' எனப்படும் சிதைவு மூட்டுவாதத்திற்கும் நேரடித் தொடர்பு இல்லை என்றே கூறுகின்றன.

மூட்டு வாதத்திற்கு அறிவியல் சான்று இல்லை

ஆஸ்டியோஆர்த்ரைட்டிஸ் என்பது வயது, உடல் பருமன், மரபியல் மற்றும் மூட்டுகளில் ஏற்படும் காயங்கள் போன்ற பல காரணிகளால் ஏற்படுகிறது. விரல் சொடக்கும் பழக்கம் அதன் முக்கியக் காரணியாக இதுவரை கண்டறியப்படவில்லை. அதேபோல, இந்தப் பழக்கத்தால் கைகளின் பிடிமான சக்தி குறையும் என்பதற்கும் உறுதியான அறிவியல் சான்றுகள் இல்லை.

கவனிக்க வேண்டிய முக்கிய விஷயம்

விரல் சொடக்குவது பெரும்பாலும் பாதிப்பில்லாதது என்றாலும், கழுத்து அல்லது முதுகுப் பகுதியை வலுக்கட்டாயமாகத் திருப்புவது முற்றிலும் வேறுபட்டது. கழுத்துப் பகுதியில் தண்டுவடம், முக்கிய நரம்புகள் மற்றும் மூளைக்குச் செல்லும் ரத்த நாளங்கள் இருப்பதால், அங்கு சுயமாக அழுத்தம் கொடுப்பது கடுமையான காயங்களுக்கு வழிவகுக்கக்கூடும். எனவே, கழுத்து மற்றும் முதுகு விஷயத்தில் இந்தத் தர்க்கத்தைப் பயன்படுத்தவே கூடாது.

விரல் சொடக்கும்போது சத்தத்துடன் சேர்த்து வலி, வீக்கம், விரல்களை மடக்க முடியாத நிலை போன்ற அறிகுறிகள் இருந்தால், தாமதிக்காமல் மருத்துவரை அணுகுவது அவசியம். குறிப்பாக, வலியுண்டாகும் அளவுக்கு மூட்டுகளை இழுப்பதையும், முறுக்குவதையும் கண்டிப்பாகத் தவிர்க்க வேண்டும். ஆக, உங்கள் 'டக் டக்' பழக்கத்தால் மட்டும் மூட்டுவாதம் வந்துவிடுமோ என்ற பெரிய கவலை தேவையில்லை என்பதே தற்போதைய மருத்துவ உலகின் கருத்தாக உள்ளது.