Aattukal Paya : தீபாவளி காலையில் எண்ணெய் குளியலுக்கு பிறகு சூடான இட்லி, மணக்க மணக்க ஆட்டுக்கால் பாயா!

Aattukal Paya: தீபாவளி காலையில் எண்ணெய் குளியல் முடித்து சூடான இட்லியுடன் மணக்க மணக்க ஆட்டுக்கால் பாயா சாப்பிட்டால் அசத்தல் சுவை. மென்மையான ஆட்டுக்கால், காரசாரமான மசாலா, தேங்காய் மணம் நிறைந்த பாயாவை வீட்டிலேயே எளிதாக செய்வது எப்படி? இதோ செய்முறை.

ஆட்டுக்கால் பாயா

தீபாவளி என்றாலே அதிகாலையில் எழுந்து எண்ணெய் தேய்த்து, வெந்நீரில் குளித்து, புத்தாடை அணிந்து, வீட்டில் பட்டாசு சத்தம் முழங்க குடும்பத்துடன் கொண்டாடும் அந்த மகிழ்ச்சியே தனி.

அதிலும், தீபாவளி காலையில் குளித்துவிட்டு வந்து, ஆவி பறக்கும் இட்லியை தட்டில் வைத்து, அதன் மீது மணக்க மணக்க தயாரான ஆட்டுக்கால் பாயாவை ஊற்றி சாப்பிட்டால் அந்த சுவைக்கு ஈடு இணை எதுவுமே இருக்காது.

மென்மையான இட்லிக்குள் இறங்கும் ஆட்டுக்கால் பாயாவின் காரசாரமான சுவையும், மசாலா மணமும், நாவில் கரையும் ஆட்டுக்கால் துண்டுகளும் சேர்ந்து முதல் வேளையிலேயே தீபாவளியை இன்னும் சிறப்பாக்கிவிடும்.

ஹோட்டல் ஸ்டைலில், வீட்டிலேயே கெட்டியான சுவையான ஆட்டுக்கால் பாயா செய்து, இந்த தீபாவளியை வயிறும் மனமும் நிறைந்த கொண்டாட்டமாக மாற்றலாம். இதோ, இட்லிக்கு தொட்டுக்க சாப்பிட ஏற்ற ஆட்டுக்கால் பாயா செய்முறை.

தேவையான பொருட்கள்

ஆட்டுக்கால் வேகவைக்க

• ஆட்டுக்கால் - 4 முதல் 6
• பெரிய வெங்காயம் - 1
• தக்காளி - 1
• மஞ்சள் தூள் - 1\2 டீஸ்பூன்
• உப்பு - தேவையான அளவு
• தண்ணீர் - தேவையான அளவு

பாயா மசாலா தயாரிக்க

• பெரிய வெங்காயம் - 2 (பொடியாக நறுக்கியது)
• தக்காளி - 2 (நறுக்கியது)
• இஞ்சி-பூண்டு விழுது - 2 டேபிள்ஸ்பூன்
• பச்சை மிளகாய் - 2
• மிளகாய் தூள் - 1 டீஸ்பூன்
• மல்லித்தூள் - 2 டீஸ்பூன்
• மஞ்சள் தூள் - 1\4 டீஸ்பூன்
• கரம் மசாலா - 1\2 டீஸ்பூன்
• மிளகுத்தூள் - 1\2 டீஸ்பூன்
• தேங்காய் - 1\2 கப்
• சோம்பு - 1 டீஸ்பூன்
• கசகசா - 1 டீஸ்பூன் (விருப்பப்பட்டால்)
• பட்டை - 1 சிறிய துண்டு
• கிராம்பு - 3
• ஏலக்காய் - 2
• பிரியாணி இலை - 1
• எண்ணெய் - 3 டேபிள்ஸ்பூன்
• கறிவேப்பிலை - சிறிதளவு
• கொத்தமல்லி - சிறிதளவு
• உப்பு - தேவையான அளவு

ஆட்டுக்கால் பாயா செய்வது எப்படி? - படி 1

ஆட்டுக்காலை சுத்தம் செய்தல்

ஆட்டுக்கால்களை வாங்கும்போதே நன்றாக சுத்தம் செய்து, முடிகள் நீக்கப்பட்டுள்ளதா என்பதை உறுதி செய்துகொள்ளவும். வீட்டிற்கு வந்ததும் வெந்நீரில் நன்றாக கழுவி, தேவையற்ற அழுக்குகளை நீக்கவும்.

ஒரு பாத்திரத்தில் ஆட்டுக்கால், மஞ்சள் தூள், சிறிதளவு உப்பு சேர்த்து நன்றாக அலசி மீண்டும் சுத்தமான தண்ணீரில் கழுவி எடுத்துக்கொள்ளவும்.

படி 2

ஆட்டுக்காலை வேகவைத்தல்

குக்கரில் சுத்தம் செய்த ஆட்டுக்கால், ஒரு நறுக்கிய வெங்காயம், ஒரு தக்காளி, இஞ்சி-பூண்டு விழுது, மஞ்சள் தூள், உப்பு மற்றும் தேவையான அளவு தண்ணீர் சேர்த்து 10 முதல் 15 விசில் வரும் வரை வேகவைக்கவும். ஆட்டுக்கால் நன்றாக மென்மையாக வேக வேண்டும்.

குறிப்பு: ஆட்டுக்கால் எலும்பிலிருந்து எளிதாக பிரியும் அளவுக்கு வெந்திருக்க வேண்டும். வேகவைத்த தண்ணீரை வடிகட்டாமல் அப்படியே வைத்துக்கொள்ளவும். அதுதான் பாயாவுக்கு சுவையும் கெட்டித்தன்மையும் கொடுக்கும்.

படி 3

தேங்காய் மசாலா அரைத்தல்

மிக்ஸி ஜாரில் தேங்காய், சோம்பு, கசகசா மற்றும் முந்திரி சேர்த்து தண்ணீர் சேர்த்து நைசாக அரைத்து வைத்துக்கொள்ளவும்.

படி 4

பாயாவுக்கு மசாலா தாளித்தல்

• ஒரு பெரிய அடிகனமான பாத்திரத்தில் எண்ணெய் ஊற்றி சூடானதும் பட்டை, கிராம்பு, ஏலக்காய், பிரியாணி இலை சேர்த்து தாளிக்கவும்.
• பின்னர் நறுக்கிய வெங்காயம், பச்சை மிளகாய், கறிவேப்பிலை சேர்த்து பொன்னிறமாக வதக்கவும்.
• இஞ்சி-பூண்டு விழுது சேர்த்து பச்சை வாசனை போகும் வரை வதக்கவும்.
• தக்காளியை சேர்த்து நன்றாக மசியும் வரை வதக்கவும்.

படி 5

மசாலா தூள்கள் சேர்த்தல்

இப்போது மிளகாய் தூள், மல்லித்தூள், மஞ்சள் தூள், கரம் மசாலா, மிளகுத்தூள் மற்றும் தேவையான அளவு உப்பு சேர்த்து குறைந்த தீயில் கிளறவும். மசாலா கருகாமல் இருக்க சிறிதளவு தண்ணீர் தெளித்து நன்றாக வதக்கவும்.

படி 6

ஆட்டுக்கால் மற்றும் தேங்காய் விழுது சேர்த்தல்

• வேகவைத்த ஆட்டுக்காலையும் அதன் தண்ணீரையும் மசாலாவில் சேர்த்து நன்றாக கிளறவும்.
• பின்னர் அரைத்த தேங்காய் விழுதை சேர்த்து கலக்கவும்.
• பாத்திரத்தை மூடி மிதமான தீயில் 10 முதல் 15 நிமிடங்கள் கொதிக்க விடவும்.

படி 7

ஆட்டுக்கால் பாயா தயார்

ஆட்டுக்காலில் மசாலா நன்றாக இறங்கி, பாயா சற்று கெட்டியாகி எண்ணெய் மேலே மிதக்கத் தொடங்கும். இறுதியாக கொத்தமல்லி தூவி இறக்கினால் சுவையான ஆட்டுக்கால் பாயா தயார்.

தீபாவளி இட்லியுடன் ஆட்டுக்கால் பாயா சாப்பிட சில டிப்ஸ்

• பாயாவை முதல் நாள் இரவே தயாரித்து வைத்தால், மறுநாள் காலையில் மசாலா நன்றாக ஊறி இன்னும் சுவையாக இருக்கும்.
• இட்லி மிகவும் மென்மையாகவும் சூடாகவும் இருக்க வேண்டும்.
• பாயாவை இட்லியின் மீது ஊற்றி, சிறிதளவு மிளகுத்தூள் தூவி சாப்பிட்டால் ஹோட்டல் ஸ்டைல் சுவை கிடைக்கும்.
• விருப்பப்பட்டால் பாயாவில் சிறிதளவு எலுமிச்சைச் சாறு சேர்த்து சாப்பிடலாம்.
• பாயா மிகவும் தண்ணீராக இல்லாமல், இட்லிக்குள் இறங்கும் அளவுக்கு சற்று கெட்டியாக இருக்க வேண்டும்.
• கூடவே வெங்காயம், கொத்தமல்லி தூவி பரிமாறினால் மணமும் சுவையும் அதிகரிக்கும்.

சுவையான ஆட்டுக்கால் பாயா தயார்

தீபாவளி காலையில் எண்ணெய் குளியல் முடித்து, புத்தாடை அணிந்து, வீட்டில் தயாரான சூடான இட்லியுடன் இந்த ஆட்டுக்கால் பாயாவை பரிமாறுங்கள். முதல் இட்லியிலேயே பாயாவின் மசாலா சுவை நாவில் இறங்க, குடும்பத்தினர் அனைவரும் இன்னும் ஒரு இட்லி கேட்பது நிச்சயம்.

சிறப்பு

இந்த பாயாவை இட்லி மட்டுமின்றி தோசை, ஆப்பம், இடியாப்பம் கியவற்றுடனும் சேர்த்து சாப்பிடலாம்.