Re-release Race: திரையரங்குகளில் மீண்டும் வசூல் திருவிழா! தமிழ் சினிமாவில் ரீ-ரிலீஸ் ரேஸ்! என்னப்பா நடக்குது தமிழ்நாட்டில்?!

தமிழ் சினிமாவில் பழைய ஹிட் படங்களின் மறுவெளியீடு, ரசிகர் கொண்டாட்டத்தைத் தாண்டி லாபகரமான வணிகமாக மாறியுள்ளது. 'கில்லி', 'மங்காத்தா' போன்ற படங்கள் மீண்டும் பெரிய வசூல் சாதனைகளை படைக்கின்றன. இந்த வெற்றி, ரீ-ரிலீஸ் நிரந்தர சந்தை என்பதை உறுதி செய்கிறது.

ரீ-ரிலீஸ்: தற்காலிக ட்ரெண்ட் அல்ல, நிரந்தர சந்தை

ஹிட்டான படங்களை மீண்டும் தியேட்டர்களில் பார்ப்பது ரசிகர்களுக்கு புது சந்தோஷத்தை கொடுக்கிறது. இதனால் ரீ ரிலீஸ் படங்கள் மீண்டும் கல்லா கட்ட தொடங்கியுள்ளன. தமிழ் திரையுலகில் ஒருகாலத்தில் அரிதாக நடந்த மறுவெளியீடு இன்று ஒரு தனி பாக்ஸ் ஆபிஸ் பிரிவாக வளர்ந்துள்ளது. புதிய படங்கள் வெளியாகும் அதே வாரத்தில் கூட, பல ஆண்டுகளுக்கு முன்பு வெளியான ஹிட் படங்கள் திரையரங்குகளை நிரப்புவது இன்றைய நிலை. 2024–2025 காலகட்டத்தில் இந்த ரீ-ரிலீஸ் கலாச்சாரம், ரசிகர் கொண்டாட்டத்தைத் தாண்டி, தயாரிப்பாளர்கள் மற்றும் தியேட்டர் உரிமையாளர்களுக்கு உறுதியான வருமானத்தை வழங்கும் வணிக மாடலாக மாறியுள்ளது.

நாஸ்டால்ஜியா + தொழில்நுட்பம் = புதிய அனுபவம்

ஏற்கனவே பார்த்தாலும், பழைய படங்களை தியேட்டரில் பார்ப்பது அனைத்துதரப்பினரையும் மகிழ்ச்சியில் ஆழ்த்தியுள்ளது. ரீ-ரிலீஸ் படங்களின் வெற்றிக்கு முக்கிய காரணம் நாஸ்டால்ஜியா உணர்வு. முதல் முறை அந்தப் படத்தை பார்த்த நினைவுகள், இன்று 4K ரீமாஸ்டரிங், டால்பி சவுண்ட் போன்ற நவீன தொழில்நுட்பங்களுடன் இணையும் போது, ரசிகர்களுக்கு முற்றிலும் புதிய அனுபவமாக மாறுகிறது. இதனால் பழைய படம் என்ற எண்ணமே மறைந்து, “பெரிய திரையில் பார்க்க வேண்டிய படம்” என்ற மதிப்பு உருவாகிறது.

‘கில்லி’ உருவாக்கிய டர்னிங் பாயிண்ட்

சூப்பர் டூப்பர் ஹீட்டான 2004-ல் வெளியான ‘கில்லி’ படம், 20 ஆண்டுகளுக்குப் பிறகு மீண்டும் திரையரங்குகளில் வெளியாகி சுமார் 25 கோடி ரூபாய் வரை வசூல் செய்து அனைவரையும் ஆச்சரியப்படுத்தியது. ரீ-ரிலீஸ் படத்திற்காக மிட்நைட் ஷோ, ஃபேன் ஷோ போன்றவை திட்டமிடப்பட்ட முதல் முக்கிய படம் இதுவாகும். இதன் வெற்றியே, ரீ-ரிலீஸ் என்பது கொண்டாட்டம் மட்டுமல்ல; அது லாபம் தரும் பிசினஸ் என்பதையும் நிரூபித்தது. கில்லி படத்தை தியேட்டர்களில் பார்த்த ரசிகர்கள் ஆட்டம் பாட்டத்துடன் கொண்டாடி மகிழ்ந்தனர்.

மங்காத்தா: ஓப்பனிங் டே மாஸ் மறுபடியும்

படமும் பாட்டும் ரசிகர்களை அப்படியே கட்டிப்போட்டது. அஜித்தின் 50-வது படமான ‘மங்காத்தா’, மறுவெளியீட்டின் போதும் ஓப்பனிங் டே கலெக்‌ஷனில் சாதனை படைத்தது. நெகட்டிவ் ஹீரோ கதாபாத்திரமாக அஜித் நடித்த விதம், யுவன் சங்கர் ராஜாவின் தீம் மியூசிக் ஆகியவை இன்றும் ரசிகர்களை கவர்கின்றன. சென்னை உள்ளிட்ட நகரங்களில் நள்ளிரவு காட்சிகள் ஹவுஸ்ஃபுல் ஆனது, இந்தப் படத்தின் கல்ட் மதிப்பை மீண்டும் உறுதிப்படுத்தியது.

படையப்பா: தலைமுறைகளை இணைக்கும் சூப்பர்ஸ்டார் படம்

1999-ல் வெளியான ‘படையப்பா’, மறுவெளியீட்டிலும் குடும்பம் குடும்பமாக ரசிகர்களை திரையரங்குகளுக்கு இழுத்து வந்தது. ரஜினிகாந்தின் ஸ்டைலும், நீலாம்பரி கதாபாத்திரத்தின் வலிமையும் இன்றும் பேசப்படும் விஷயங்களாகவே உள்ளன. பல தசாப்தங்களை கடந்தும் இந்தப் படம் வசூலில் வெற்றி பெறுவது, உண்மையான கிளாசிக்குகளுக்கு காலாவதி இல்லை என்பதற்கான சான்றாகும்.

காலம் கொடுத்த இரண்டாவது வாழ்க்கை

‘சச்சின்’, ‘குஷி’ போன்ற படங்கள், வெளியான சமயத்தில் பெற்ற வரவேற்பை விட, காலப்போக்கில் ரசிகர்களின் மனதில் ஆழமாக இடம்பிடித்தவை. டிவி ரிப்பீட் டெலிகாஸ்ட் மற்றும் சமூக வலைதளங்களில் உருவான நினைவுகள், இந்தப் படங்களை ரீ-ரிலீஸில் பெரிய வசூல் வெற்றியாக மாற்றின. இதன் மூலம், மென்மையான காதல் படங்களுக்கும் மறுவெளியீட்டில் நிலையான சந்தை இருப்பது தெளிவானது.

பிரம்மாண்டமும் அதிரடியும் மீண்டும் பெரிய திரையில்

‘பாகுபலி: தி எபிக்’ போன்ற பிரம்மாண்ட படங்கள், பெரிய திரையில் பார்க்கும் அனுபவத்திற்காகவே மீண்டும் ரசிகர்களை திரையரங்குகளுக்கு அழைத்தன. அதேபோல், ‘அட்டகாசம்’ போன்ற அதிரடி படங்கள், பண்டிகை கால வெளியீடுகளின் பலத்தால் நல்ல வசூலைப் பெற்றன. சரியான டைமிங் மற்றும் சரியான திரை எண்ணிக்கை ரீ-ரிலீஸ் வெற்றிக்கு முக்கியம் என்பதை இவை நிரூபிக்கின்றன.

ரஜினி படங்கள்: எப்போதும் திருவிழா

பாபா மற்றும் ‘பாட்ஷா’ போன்ற ரஜினிகாந்த் படங்கள், எந்த காலகட்டத்தில் மீண்டும் வெளியானாலும் திருவிழா சூழலை உருவாக்குகின்றன. குறிப்பாக ரீமாஸ்டரிங் செய்யப்பட்ட ‘பாபா’ படம், பழைய கதைக்கும் புதிய தொழில்நுட்பத்துக்கும் இடையே பாலமாக அமைந்தது. சூப்பர்ஸ்டார் என்ற பிராண்ட், ரீ-ரிலீஸ் மார்க்கெட்டிலும் தனி சக்தியாக இருப்பதை இது காட்டுகிறது.

எதிர்கால ரீ-ரிலீஸ் மார்க்கெட்டின் திசை

திரையுலக வட்டாரங்களில் கிடைக்கும் தகவல்களின் படி, ‘தளபதி’, ‘வாலி’, ‘இந்தியன்’, ‘அலைபாயுதே’ போன்ற படங்களும் வருங்காலத்தில் மறுவெளியீடு செய்யப்படலாம். தற்போதைய வசூல் போக்கு தொடர்ந்தால், ரீ-ரிலீஸ் படங்களுக்கு தனி காலெண்டர் மற்றும் தனி பாக்ஸ் ஆபிஸ் பட்டியல் உருவாகும் வாய்ப்பும் உள்ளது.