நடிகர் விஜய் நடிப்பில் பொங்கல் விருந்தாக ரிலீசான திரைப்படம் வாரிசு. வம்சி பைடிபல்லி இயக்கியிருந்த இப்படத்தை தில் ராஜு தயாரித்து இருந்தார். பெரும் பொருட்செலவில் தயாரிக்கப்பட்ட இப்படத்தில் விஜய்யுடன் யோகிபாபு, ராஷ்மிகா மந்தனா, ஜெயசுதா, ஷியாம், சங்கீதா, சம்யுக்தா, சரத்குமார், பிரபு, எஸ்.ஜே.சூர்யா, விடிவி கணேஷ், சதீஷ் என மிகப்பெரிய நட்சத்திர பட்டாளமே நடித்திருந்தது.
பொங்கல் பண்டிகைக்காக தொடர் விடுமுறை விடப்பட்டதால், கடந்த 4 நாட்களாக பேமிலி ஆடியன்ஸ் அதிகளவில் வாரிசு படத்தை பார்த்து ரசித்துள்ளனர். இதன் எதிரொலியாக படத்தின் வசூலும் குவிந்துள்ளது. இந்நிலையில், வாரிசு படம் 7 நாட்களில் உலகளவில் ரூ.210 கோடி வசூலித்து உள்ளதாக தயாரிப்பு நிறுவனம் அதிகாரப்பூர்வமாக அறிவித்துள்ளது. நடிகர் விஜய் நடித்த படங்களில் ரூ.200 கோடிக்கு மேல் வசூலித்த 6-வது படம் இதுவாகும்.