Gentleman 2 : ஷங்கர் இயக்கிய ஜென்டில்மேன் படத்தை தயாரித்த கே.டி.குஞ்சுமோன், 29 ஆண்டுகளுக்கு பின் தற்போது ஜென்டில்மேன் 2 படத்தை எடுக்க உள்ளார்.
தமிழ் சினிமாவில் பிரம்மாண்ட இயக்குனராக வலம் வரும் ஷங்கர், இயக்குனராக அறிமுகமான படம் ஜென்டில்மேன். கடந்த 1993-ம் ஆண்டு ரிலீசான இப்படத்தில் அர்ஜுன் நாயகனாக நடித்திருந்தார். அவருக்கு ஜோடியாக மதுபாலா நடிக்க ஏ.ஆர்.ரகுமான் இப்படத்திற்கு இசையமைத்திருந்தார். கே.டி.குஞ்சுமோன் தயாரிப்பில் பிரம்மாண்டமாக வெளியான இப்படம் பிளாக்பஸ்டர் ஹிட் ஆனது.
இதனிடையே சுமார் 29 ஆண்டுகளுக்கு பின் தற்போது ஜென்டில்மேன் 2 படத்தை எடுக்க உள்ளனர். முதல் பாகத்தை இயக்கிய ஷங்கர் இப்படத்தை இயக்கவில்லை. அவருக்கு பதில் ஏ.கோகுல் கிருஷ்ணா இப்படத்தை இயக்க உள்ளார். முதல் பாகத்தை விட மிகவும் பிரம்மாண்டமாக இப்படத்தை தயாரிக்க உள்ளதாக கே.டி.குஞ்சுமோன் அறிவித்துள்ளார். பாகுபலி, ஆர்.ஆர்.ஆர் போன்ற பிரம்மாண்ட படங்களுக்கு இசையமைத்த மரகதமணி என்கிற கீரவாணி தான் இப்படத்திற்கும் இசையமைக்க உள்ளார்.
இதையும் படியுங்கள்... பொம்ம படத்துக்கு இத்தனை கோடியா..! ஆதிபுருஷ் படத்தில் நடிக்க பிரபாஸ் வாங்கிய சம்பளம் எவ்வளவு தெரியுமா?
இப்படத்தில் யார் ஹீரோ, ஹீரோயினாக நடிக்க உள்ளார்கள் என்பது குறித்த எதிர்பார்ப்பு இருந்த நிலையில், முதலில் கடந்த சில மாதங்களுக்கு முன்னர் ஹீரோயின் குறித்த அறிவிப்பு வெளியானது. அந்த சமயத்தில் நயன்தாரா நடிக்க உள்ளதாக தகவல் பரவியது. ஆனால் இறுதியில் ஜூனியர் நயன்தாரா என்றழைக்கப்படும் நயன்தாரா சக்ரவர்த்தி இப்படத்தில் ஹீரோயினாக நடிக்க உள்ளதாக அறிவித்தனர்.
மறுபுறம் ஹீரோ யாராக இருக்கும் என்கிற எதிர்பார்ப்பும் இருந்து வந்த நிலையில், தற்போது அதுகுறித்த அதிகாரப்பூர்வ அறிவிப்பை படக்குழு வெளியிட்டுள்ளது. அதன்படி தெலுங்கு நடிகர் சேத்தன் சீனு என்பவர் தான் இப்படத்தில் ஹீரோவாக நடிக்க உள்ளதாக அறிவித்துள்ளனர். அவர் இப்படம் மூலம் தமிழ் திரையுலகில் ஹீரோவாக எண்ட்ரி கொடுக்க உள்ளார் என்பது குறிப்பிடத்தக்கது.
இதையும் படியுங்கள்... மாலத்தீவில் ரொமான்ஸில் மல்லு கட்டும் ஷ்ரேயா - சித்து..! காதல் பொங்க... பொங்க... வெளியிட்ட ஹாட் போட்டோஸ்!