பிக் பாஸ் சீசன் 6 டைட்டில் வின்னரான அசீம், தற்போது வெள்ளி திரையில் ஹீரோவாக அறிமுகமாக உள்ள தகவல் வெளியாகி அவரது ரசிகர்களை உச்சாகப்படுத்தியுள்ளது.
பிக் பாஸ் நிகழ்ச்சியில் சின்னத்திரையை சேர்ந்த பிரபலங்கள் கலந்து கொள்வதன் முக்கிய காரணமே, வெள்ளித்திரையில் கால் பதிக்க வேண்டும் என்பதற்காக தான். அந்த கனவு சிலருக்கு நிஜமானாலும், பலருக்கு ஏனோ சரியான வாய்ப்புகள் அமைவதில்லை.
இவ்வளவு ஏன்? வெள்ளித்திரையில் ஹீரோ, ஹீரோயினாக, நடித்து பிக் பாஸ் வீட்டிற்குள் தங்களுடைய அடுத்த கட்ட வளர்ச்சியை நோக்கி அடி எடுத்து வைத்த, பிரபலங்கள் மற்றும் டைட்டில் கைப்பற்றிய ரித்விகா, ஆரி ஆகியோருக்கு கூட இன்னும் திருப்புமுனையை ஏற்படுத்தும் படியான படங்கள் அமையவில்லை என்றே கூறலாம்.
மேலும் ஆரவ் போன்ற சில பிரபலங்களுக்கு பிக் பாஸ் நிகழ்ச்சிக்கு பின்னர் வாய்ப்பு கிடைத்தும், சரியான படங்களை தேர்வு செய்யாத காரணத்தால்... தற்போது வரை அவர்களால் வெள்ளித்திரையில் மின்ன முடியவில்லை. அதே நேரம் ஹரிஷ் கல்யாண், ரைசா, கவின், வனிதா விஜயகுமார், ஷிவானி, ரம்யா பாண்டியன் போன்ற சிலருக்கு பிக் பாஸ் நிகழ்ச்சி பெரிதும் கை கொடுத்தது.
இந்நிலையில் பிக் பாஸ் சீசன் 6 போட்டியில் கலந்து கொண்ட முக்கிய போட்டியாளர்களின் ஒருவர் அசீம். பிக் பாஸ் வீட்டிற்குள் வந்த நாளிலிருந்து, இவர் சண்டை போடாத நாளும்... பிரச்சனை செய்யாத நாளும் இல்லை என்று கூறலாம். சண்டை போட்டால் தான் பிக் பாஸ் ப்ரோவில் இடம் பெற முடியும் என்பதை நோக்கமாக வைத்து இவர் சண்டை போடுவதாகவும் இவரை பிக்பாஸ் வீட்டை விட்டு வெளியேற்ற வேண்டும் என சிலர் கொந்தளித்தனர்.
அதேநேரம் மற்றொரு தரப்பினர், பிக் பாஸ் வீட்டிற்குள் அசீம் இருப்பதால்தான் இந்த நிகழ்ச்சியை ஏதோ பரபரப்பாக போய் கொண்டிருக்கிறது என அவருக்கு ஆதரவு தெரிவித்து வந்தனர்.
அசீமை தாண்டி விக்ரமனுக்கு ஆதரவு இருந்த போதிலும், கடைசி நேரத்தில் அரசியல் கட்சி ஓவராக விக்ரமனுக்கு சப்போர்ட் செய்ததன் விளைவு, விக்ரமனுக்கு விழ வேண்டிய ஓட்டுக்கள் அசீமுக்கு விழுந்தது. இதன் காரணமாக அசீம் டைட்டில் வின்னராகவும், அறம் வெல்லும் விக்ரமன் இரண்டாவது இடத்தையும் பிடித்தார்.
பிக்பாஸ் நிகழ்ச்சிக்கு பின்னர் அசீமை தேடி சில வாய்ப்புகள் வந்த போதும், அதனை ஏற்காத அவர்... தற்போது பிரபல சூப்பர் ஹிட் இயக்குனர் இயக்கத்தில் நடிக்க உள்ள தகவல் வெளியாகியுள்ளது. அதன்படி தற்போது வெளியாகியுள்ள தகவலில், நடிகர் சிவகார்த்திகேயனை வைத்து வருத்தப்படாத வாலிபர் சங்கம், ரஜினி முருகன், போன்ற சூப்பர் ஹிட் படங்களை இயக்கிய இயக்குனர் பொன்ராம் இயக்கத்தில் தான் அசீம் ஹீரோவாக அவதாரம் எடுக்கிறாராம்.
இந்த படத்தின் பணிகள் கிட்டத்தட்ட முடிந்துவிட்ட நிலையில், விரைவில் இப்படம் குறித்த அதிகாரப்பூர்வ தகவல் வெளியாகும் என எதிர்பார்க்கப்படுகிறது. மேலும் இப்படம் கிராமத்து கதைக்களம் கொண்ட திரைப்படமாக இருக்கும் என கூறப்படுகிறது. அதை போல் இப்படத்தின் நாயகி, மற்றும் தொழில்நுட்ப கலைஞர்களின் தேடுதல்களும் தீவிரமடைந்துள்ளதாக கூறப்படுகிறது. அசீம் பிக் பாஸ் நிகழ்ச்சியில் எப்படியோ அடித்து பிடித்து டைட்டில் கைப்பற்றியது போல், ஒரு ஹீரோவாகவும் ரசிகர்கள் மனதில் நீங்காத இடத்தை பிடிப்பாரா? என்பதை பொறுத்திருந்து பார்ப்போம்.