50 செகண்டுக்கு 5 கோடி..! அதிர வைக்கும் நயன்தாராவின் ஃபீஸ்

தென்னிந்திய திரையுலகில் அதிக சம்பளம் வாங்கும் நடிகையாக வலம் வரும் நயன்தாரா, ஒரு 50 விநாடி ஓடக்கூடிய விளம்பரத்தில் நடிக்க 5 கோடி சம்பளம் வாங்கி அதிர வைத்திருக்கிறார்.

Nayanthara 5 Crore Salary

கேரளாவில் இருந்து வந்து தமிழ் சினிமாவில் கோலோச்சிய நடிகைகளில் நயன்தாராவும் ஒருவர். இவர் ஐயா படம் மூலம் கோலிவுட்டில் அறிமுகமானார். அவர் அறிமுகமாகி 20 ஆண்டுகள் கடந்துவிட்டது. அன்று முதல் இன்று வரை கோலிவுட்டில் டாப் ஹீரோயினாக வலம் வருகிறார் நயன்தாரா. இவர் தமிழ் மட்டுமின்றி இந்தி, மலையாளம், தெலுங்கு உள்ளிட்ட மொழிகளிலும் முன்னணி ஹீரோக்களுடன் நடித்திருக்கிறார். இதன்மூலம் பான் இந்தியா அளவில் ஜொலித்து வருகிறார் நயன்தாரா. இந்த நிலையில், அவர் வாங்கும் சம்பளம் பற்றிய தகவல் வெளியாகி பரவலாக பேசப்பட்டு வருகிறது.

நயன்தாரா சம்பளம்

நடிகை நயன்தாரா சினிமாவில் நடிக்க ஒரு படத்துக்கு 10 முதல் 15 கோடி வரை சம்பளம் வாங்குகிறார். தென்னிந்தியாவில் அதிக சம்பளம் வாங்கும் நடிகைகள் பட்டியலில் முதலிடத்தில் இருக்கிறார். இவர் சினிமா மட்டுமின்றி விளம்பரங்களிலும் நடித்து, அதன் வாயிலாகவும் கோடி கோடியாய் சம்பாதித்து வருகிறார். அந்த வகையில் அவர் விளம்பரத்தில் நடிக்க வாங்கும் சம்பளம் பலரையும் ஆச்சர்யத்தில் ஆழ்த்தி உள்ளது. குறிப்பாக 50 விநாடிகள் மட்டுமே ஒளிபரப்பாகக் கூடிய விளம்பரம் ஒன்றில் நடிப்பதற்காக அவர் ரூ.5 கோடி சம்பளமாக வாங்கி இருக்கிறார். டாடா ஸ்கை விளம்பரத்தில் நடிக்கவே அவர் இவ்வளவு பெரிய தொகையை சம்பளமாக வாங்கி உள்ளதாக கூறப்படுகிறது.

40 வயதிலும் செம பிசி

பொதுவாக நடிகைகளுக்கு திருமணம் ஆனாலே மார்க்கெட் போய்விடும் என சொல்வார்கள். அதுமட்டுமின்றி 40 வயதை எட்டிவிட்டால், ஹீரோயின் வாய்ப்பெல்லாம் குறைந்துவிடும் என்கிற எழுதப்படாத விதியும் சினிமாவில் உள்ளது. ஆனால் நயன்தாரா அதையெல்லாம் தகர்த்தெறிந்துள்ளார். தற்போது கோலிவுட்டில் பிசியான ஹீரோயினாக வலம் வருகிறார் நயன்தாரா. இவர் கைவசம் தமிழ், தெலுங்கு, மலையாளம், கன்னடம் என பல்வேறு மொழிப் படங்கள் இருக்கின்றன. இதுமட்டுமின்றி ரெளடி பிக்சர்ஸ் என்கிற தயாரிப்பு நிறுவனம் மூலம் சில படங்களை தயாரித்தும் வருகிறார் நயன்தாரா.

நயன்தாரா கைவசம் உள்ள படங்கள்

தமிழில் அவர் கைவசம் ராக்காயி, மண்ணாங்கட்டி, ஹாய், மூக்குத்தி அம்மன் 2 போன்ற படங்கள் உள்ளன. இதுதவிர மலையாளத்தில் நிவின் பாலி ஜோடியாக டியர் ஸ்டூடண்ட்ஸ், மம்முட்டி, மோகன்லால் இணைந்து நடிக்கும் படம் ஆகியவை உள்ளன. அதேபோல் தெலுங்கில் அனில் ரவிபுடி இயக்கத்தில் சிரஞ்சீவிக்கு ஜோடியாக ஒரு படம், கோபிசந்த் இயக்கத்தில் பாலகிருஷ்ணாவுக்கு ஜோடியாக ஒரு படம் இருக்கிறது. கன்னடத்தில் ராக்கிங் ஸ்டார் யாஷ் உடன் டாக்ஸிக் திரைப்படத்தில் நடித்து வருகிறார் நயன்தாரா. கீது மோகன்தாஸ் இயக்கும் இப்படத்தில் யாஷுக்கு அக்காவாக நடிக்கிறார் நயன்.