Leader Day 1 Box Office : லெஜண்ட் வசூலில் பாதிகூட வசூலிக்காத லீடர்... முதல் நாள் பாக்ஸ் ஆபிஸ் நிலவரம் இதோ

துரை செந்தில்குமார் இயக்கத்தில் லெஜண்ட் சரவணன் ஹீரோவாக நடித்துள்ள லீடர் படம் நேற்று திரையரங்குகளில் ரிலீஸ் ஆன நிலையில், அப்படத்தின் முதல் நாள் வசூல் நிலவரம் வெளியாகி உள்ளது.

Leader Movie Day 1 Box Office

லெஜண்ட் சரவணன் ஹீரோவாக நடித்துள்ள இரண்டாவது படம் லீடர். இவர் கடந்த 2022-ம் ஆண்டு வெளிவந்த லெஜண்ட் திரைப்படம் மூலம் ஹீரோவாக அறிமுகமானார். அப்படம் தோல்வியை சந்தித்த பின்னர் கட்டாயம் ஹிட் கொடுக்க வேண்டும் என்கிற முனைப்போடு அவர் நடித்துள்ள படம் தான் லீடர். அப்படத்தை துரை செந்தில்குமார் இயக்கி இருக்கிறார். இவர் இதற்கு முன்னர் எதிர்நீச்சல், கொடி, கருடன் போன்ற சூப்பர் ஹிட் படங்களை கொடுத்திருக்கிறார். லீடர் படத்தில் ஹீரோவாக நடித்துள்ள லெஜண்ட் சரவணன் தான் அப்படத்தை தயாரித்தும் உள்ளார். அப்படத்திற்கு ஜிப்ரான் இசையமைத்துள்ளார்.

லீடர் படத்தின் வசூல்

லீடர் திரைப்படத்தில் சரவணன் உடன் அறந்தாங்கி நிஷா, விடிவி கணேஷ், ஆண்ட்ரியா, ஷியாம், பாயல் ராஜ்புட் என மிகப்பெரிய நட்சத்திர பட்டாளமே நடித்துள்ளது. ஜிப்ரான் இப்படத்திற்கு இசையமைத்துள்ளார். இப்படம் தியேட்டர்களில் ரிலீஸ் ஆக அமோக வரவேற்பை பெற்று வருகிறது. இப்படத்தின் முதல் நாள் பாக்ஸ் ஆபிஸ் வசூல் நிலவரம் வெளியாகி உள்ளது. அதன்படி லீடர் திரைப்படம் முதல் நாளில் ரூ.83 லட்சம் வசூலித்துள்ளதாக கூறப்படுகிறது. லெஜண்ட் படத்தைக் காட்டிலும் இப்படத்தின் முதல் நாள் வசூல் குறைவாக இருந்தாலும் படத்திற்கு பாசிடிவ் ரெஸ்பான்ஸ் உள்ளதால் இனி வரும் நாட்களில் பிக் அப் ஆகும் என எதிர்பார்க்கப்படுகிறது.

லீடர் படத்தின் கதை

சரவணன், ஒரு சாதாரண கார் மெக்கானிக்காக தனது மகளுடன் அமைதியான வாழ்க்கையை வாழ்கிறார். மனைவி இல்லாத குறையை உணர்த்தாமல், மகளை உயிராகக் காத்து வளர்க்கும் அப்பாவின் பாசம் படத்தின் ஆரம்பத்திலேயே நன்றாக பதிகிறது. இதே நேரத்தில், தூத்துக்குடி துறைமுகத்தில் சட்டவிரோதமாக வரும் ஒரு மர்ம கண்டெய்னரைச் சுற்றி சம்பவங்கள் சுழல தொடங்குகின்றன. அதைத் துரத்திச் செல்லும் இன்ஸ்பெக்டர் ஆண்ட்ரியா, உண்மையை கண்டுபிடிக்க பல சவால்களை எதிர்கொள்கிறார்.

ஒரு கட்டத்தில், துறைமுகத்துடன் தொடர்புடைய ஒரு ரவுடியின் கார் சரவணனிடம் வேலைக்கு வருகிறது. அதன்பிறகு அந்த ரவுடி சரவணனின் வாழ்க்கையில் அடிக்கடி நுழையத் தொடங்குகிறார். இதை பயன்படுத்திக் கொள்ளும் ஆண்ட்ரியா, சரவணனின் மகளை மறைத்து வைத்து, அந்த ரவுடி தான் கடத்தியதாக நம்ப வைக்கிறார். மகளை மீட்கும் அவசரத்தில், சரவணன் போலீஸ் கூறும் வழியில் நடக்கத் தொடங்குகிறார். ஆனால் கதை முன்னேறும்போது, இந்த முழு விளையாட்டையும் வடிவமைத்தது ஆண்ட்ரியா அல்ல, சரவணனே என்பதும் தெரிய வருகிறது. ஏன் அவர் இப்படிச் செய்தார்? அந்த ரவுடியுடன் அவருக்கு என்ன பகை? என்பதுதான் படத்தின் மீதிக் கதை.

லீடர் விமர்சனம்

நடிப்பில் சரவணன் இந்த முறை அதிக நம்பிக்கையுடன் தெரிகிறார். முதல் படத்தை விட மிகுந்த முன்னேற்றம் தென்படுகிறது. குறிப்பாக மகளுடன் இருக்கும் உணர்ச்சி காட்சிகளிலும், ஆக்‌ஷன் சீன்களிலும் அவர் வித்தியாசமான முயற்சியை காட்டியிருக்கிறார். மாஸ் ஹீரோவாக தன்னை நிலைநிறுத்த முயற்சித்திருப்பது தெளிவாக தெரிகிறது. இயக்குநர் கதையை நகர்த்தும் விதம் சீராகவும் சுவாரஸ்யமாகவும் உள்ளது. ஆரம்பத்தில் மெதுவாக நகரும் திரைக்கதை, இடைவெளிக்குப் பிறகு வேகம் பெறுகிறது. கிளைமாக்ஸ் பகுதி திருப்திகரமாக அமைந்துள்ளது.

ஆண்ட்ரியா, ஷியாம் உள்ளிட்ட நடிகர்கள் தங்களுக்கான கதாபாத்திரங்களை சிறப்பாக செய்து நிறைவு தருகிறார்கள். தொழில்நுட்ப ரீதியாகவும் படம் வலுவாக உள்ளது. ஜிப்ரானின் பின்னணி இசை பல காட்சிகளில் அதிர்வை ஏற்படுத்துகிறது. சண்டைக் காட்சிகளும், காட்சிப்பதிவும் படத்திற்கு கூடுதல் பலமாக உள்ளன. மொத்தத்தில், இந்த படம் சரவணனுக்கு ஒரு வலுவான கம்பேக் ஆக அமைந்திருக்கிறது. ரசிகர்களுக்கு ஒரு நல்ல மாஸ் என்டர்டெய்னராக லீடர் உள்ளது.