மிரட்டப்போகும் கங்குவா; பான் இந்தியா மட்டுமல்ல, இனி சூர்யா பான் வேர்ல்ட் ஸ்டார் - ஞானவேல் உறுதி!

Kanguva Release : இன்னும் சில மணி நேரங்களில் நடிகர் சூர்யாவின் கங்குவா திரைப்படம் உலக அளவில் சுமார் 38 மொழிகளில் வெளியாகிறது.

Gnanavel Raja

இந்த ஆண்டின் மிகவும் எதிர்பார்க்கப்பட்ட ஒரு திரைப்படமாக சூர்யாவின் கங்குவா மாறி உள்ளது என்றால் அது மிகையல்ல. கிட்டத்தட்ட இரண்டு முறை இந்த திரைப்படத்தின் வெளியீட்டு தேதி தள்ளி வைக்கப்பட்டு, தற்பொழுது நாளை நவம்பர் 14ஆம் தேதி உலக அளவில் கங்குவா திரைப்படம் 38 மொழிகளில் சுமார் 11,500 திரையரங்குகளில் வெளியாகிறது. முதல் முறையாக தமிழ் சினிமாவில் ஒரு பான் வேர்ல்ட் திரைப்படம் வெளியாக உள்ளதாக கூறி, ரசிகர்கள் மிகப்பெரிய அளவில் ஆர்ப்பரித்து வருகின்றனர். நடிகர் சூர்யாவின் திரை வாழ்க்கையில் மட்டுமல்ல, தமிழ் சினிமா வரலாற்றிலேயே மிகச்சிறந்த பெஞ்ச் மார்க்காக இந்த திரைப்படம் மாறும் என்று எதிர்பார்க்கப்படுகிறது.

Actor Suriya

பிரபல ஸ்டுடியோ கிரீன் தயாரிப்பு நிறுவனத்தின் சார்பில் கே.இ ஞானவேல் ராஜா தயாரிக்கும் மெகா பட்ஜெட் திரைப்படமான கங்குவா கிட்டத்தட்ட இரண்டு ஆண்டுகளாக, ஆயிரக்கணக்கான நபர்களின் உழைப்பில் உருவாகி இருக்கிறது. நடிகர் சூர்யாவின் திரை வரலாற்றிலேயே மிகப்பெரிய பட்ஜெட்டில் உருவாகியுள்ள திரைப்படம் இது. கிட்டத்தட்ட இரண்டு மணி நேரம் 36 நிமிடங்கள் ஓடும் இந்த திரைப்படத்தில், இரண்டு மணி நேரம் ஹிஸ்டாரிக்கல் போஷனும், 36 நிமிடங்கள் தற்காலத்தில் நடக்கும் விஷயங்களும் படமாக்கப்பட்டுள்ளது. இந்த திரைப்படத்தின் இரண்டாம் பாகமும் விரைவில் உருவாக உள்ளது குறிப்பிடத்தக்கது.

Suriya Kanguva Movie

வசூல் என்கின்ற விஷயத்தை பொறுத்த வரை, கங்குவா திரைப்படம் உலக அளவில் 2000 கோடி ரூபாயை தாண்டி வசூல் செய்யும் என்றும், முதல் நாளிலேயே உலக அளவில் கங்குவா திரைப்படம் 100 கோடி ரூபாய் வசூலை எளிதாக எட்டிவிடும் என்றும் இப்படத்தின் தயாரிப்பாளர் ஞானவேல் ராஜா உறுதியாக தெரிவித்திருக்கிறார். இந்த திரைப்படத்திற்காக பல்லாயிரம் கலைஞர்கள் தங்களுடைய உழைப்பை திறன்பட செயல்படுத்தி இருக்கிறார்கள், ஆகவே நிச்சயம் கங்குவா திரைப்படம் மிகப்பெரிய வெற்றி திரைப்படமாக மாறும் என்று அவர் கூறியிருக்கிறார். மேலும் இது ஒரு பான் வேர்ல்ட் திரைப்படம் என்பதால், இந்த திரைப்படத்திற்கு பிறகு ஒரு பான் இந்தியா நடிகராக மட்டுமல்லாமல், பான் வேர்ல்ட் நடிகராக சூர்யா மாற உள்ளதாக ஞானவேல் நம்பிக்கை தெரிவித்து இருக்கிறார்.

Producer Gnanavel Raja

இறுதி நிமிடம் வரை சில பிரச்சனைகளை கங்குவா சந்தித்து வந்தாலும் கேரளா, தமிழகம் மற்றும் வட மாநிலங்களிலும் அதிக அளவிலான முன்பதிவுகள் இந்த திரைப்படத்திற்காக நடந்து வருகிறது. பல மாநிலங்களில் காலை நான்கு மணி காட்சிகளுக்கும் அனுமதி அளிக்கப்பட்டிருக்கிறது. தமிழகத்தை பொறுத்தவரை நாளை காலை 4 மணி முதல் கங்குவா திரைப்படம் திரையரங்குகளில் திரையிடப்படவுள்ளது. தமிழகத்திற்கு இணையாக கேரளாவிலும் ரசிகர்கள் கங்குவா திரைப்படத்தை பெரிய அளவில் கொண்டாடி வருகின்றனர். நிச்சயம் இந்த திரைப்படம் மிகப்பெரிய வெற்றி திரைப்படமாக மாறும் என்று சூர்யாவின் ரசிகர்கள் நம்பிக்கை தெரிவித்து வருகின்றனர்.