Simbu Net Worth : கோலிவுட் ‘அரசன்’ சிம்பு இத்தனை கோடி சொத்துக்களுக்கு அதிபதியா?

தமிழ் திரையுலகில் முன்னணி மாஸ் நடிகராக வலம் வரும் சிம்பு, இன்று தனது 43-வது பிறந்தநாளை கொண்டாடி வரும் நிலையில், அவரின் சொத்து மதிப்பு பற்றி இந்த தொகுப்பில் பார்க்கலாம்.

Actor Simbu Birthday

சிறுவயதிலேயே திரையுலகில் அடியெடுத்து வைத்த சிம்பு, காலப்போக்கில் நடிகர் என்ற அடையாளத்தைத் தாண்டி பாடலாசிரியர், பின்னணி பாடகர், இயக்குநர், நடனக் கலைஞர் என பன்முகத் திறமைகளை வெளிப்படுத்தினார். கோலிவுட்டில் கமல் ஹாசன் உள்ளிட்ட சில முன்னணி நடிகர்களுக்குப் பிறகு, அதிகமான கலைத்திறன்களை கொண்ட நடிகர்களில் சிம்புவும் ஒருவர் என்பதில் மாற்றுக்கருத்தே இல்லை.

தன்னைச் சுற்றி எழும் விமர்சனங்கள், சர்ச்சைகள் என எதையும் பெரிதாக எடுத்துக்கொள்ளாமல், அடுத்தடுத்த கட்டத்தை நோக்கி அசால்ட்டாக நகரும் அவரது அணுகுமுறை பலருக்கும் ஆச்சரியமளிப்பதாகவே இருந்து வருகிறது.

சிம்புவின் கம்பேக்

இப்படியான நிலையில், அவரது வாழ்க்கையில் ஏற்பட்ட தொடர் காதல் தோல்விகள் ஒரு கட்டத்தில் அவரை ஆன்மீக பாதையை நோக்கி அழைத்துச் சென்றன. இமயமலை பயணம் உள்ளிட்ட ஆன்மீக தேடல்களால், சிம்பு இனி சினிமாவில் முன்னணி இடத்தை பிடிக்க முடியாது; அவரின் இடத்தை வேறு நடிகர்கள் கைப்பற்றிவிடுவார்கள் என்றெல்லாம் பேச்சு அடிபட்டு வந்தது.

ஆனால், “அந்த சீனே இங்க இல்லை” என்பதை நிரூபிப்பதுபோல், ‘மாநாடு’ படத்தின் மூலம் சிம்பு தரமான கம்பேக் கொடுத்தார். 100 கோடி ரூபாய்க்கும் அதிகமான வசூலை பெற்ற அந்த படம், அவரது மார்க்கெட் இன்னும் உறுதியானதாக இருப்பதை வெளிப்படுத்தியது. தொடர்ந்து வெளியான ‘பத்து தல’, ‘வெந்து தணிந்தது காடு’, ‘தக் லைஃப்’ ஆகிய படங்களில், ‘வெந்து தணிந்தது காடு’ மெகா ஹிட் அடித்து ரசிகர்களிடையே பெரும் வரவேற்பைப் பெற்றது. ‘தக் லைஃப்’ படம் வசூலில் தோல்வியடைந்தாலும், அதில் சிம்புவின் நடிப்பு விமர்சகர்களால் பாராட்டப்பட்டது.

அரசன் சிம்பு

தற்போது வெற்றிமாறன், அஸ்வத் மாரிமுத்து, தேசிங்கு பெரியசாமி போன்ற முக்கிய இயக்குநர்களின் படங்களில் நடிக்க ஒப்பந்தமாகியுள்ள சிம்பு, ‘அரசன்’ படத்தின் படப்பிடிப்பில் பிசியாக இருக்கிறார். ‘அரசன்’ படம் ரசிகர்களிடையே மிகப்பெரிய எதிர்பார்ப்பை உருவாக்கியுள்ளது.

தனுஷ் – வெற்றிமாறன் கூட்டணி கோலிவுட்டில் தொடர் வெற்றி படங்களை கொடுத்ததுபோல், அதே மாதிரியான ஒரு வெற்றிப் பயணத்துக்கு ‘அரசன்’ முதல் அடியாக அமையும் என்ற நம்பிக்கையில் STR ரசிகர்கள் இருக்கிறார்கள். இப்படியான சூழலில், இன்று சிம்பு தனது 43வது பிறந்தநாளை கொண்டாடி வருகிறார். இதனை முன்னிட்டு திரையுலகினர், ரசிகர்கள், நண்பர்கள் என பலரும் சமூக வலைதளங்களில் வாழ்த்து தெரிவித்து வருகின்றனர்.

சிம்பு சொத்து மதிப்பு

இதனிடையே, சிம்புவின் சொத்து மதிப்பு குறித்த தகவல்களும் கவனம் பெற்றுள்ளன. அதன்படி, அவரது மொத்த சொத்து மதிப்பு சுமார் 100 முதல் 120 கோடி ரூபாய் வரை இருக்கும் என கூறப்படுகிறது. சென்னையில் பல கோடி மதிப்புள்ள அவரது பங்களாவில் நவீன வசதிகளுடன் கூடிய ரெக்கார்டிங் ஸ்டூடியோ அமைந்துள்ளதாகவும், அதிலேயே அவர் தனது பாடல் பணிகளை மேற்கொள்வதாகவும் சொல்லப்படுகிறது.

துபாயில் வீடு வாங்கிய சிம்பு

மேலும், ஒரு படத்துக்கு சுமார் 20 முதல் 30 கோடி ரூபாய் வரை சம்பளம் பெறுகிறார் என தகவல்கள் தெரிவிக்கின்றன. சிம்புவிடம் வேல் ஃபயர், மினி கூப்பர் உள்பட பல உயர்தர சொகுசு கார்கள் இருப்பதாகவும், அவற்றின் மொத்த மதிப்பு பல கோடிகளைத் தாண்டும் எனவும் தகவல்கள் தெரிவிக்கின்றன. அண்மையில் துபாயில் புது வில்லா ஒன்றையும் சிம்பு வாங்கி இருப்பதாக சொல்லப்படுகிறது. அங்கு அஜித்தின் வீடு அமைந்துள்ள பகுதியில் அவர் வில்லா வாங்கி இருப்பது கூடுதல் சிறப்பாகும்.