எச்.வினோத் இயக்கத்தில் அஜித்குமார், மஞ்சு வாரியர் நடிப்பில் உருவாகி இருக்கும் துணிவு திரைப்படத்தை வெளிநாட்டில் ரிலீஸ் செய்ய தடைவிதிக்கப்பட்டு உள்ளது.
எச்.வினோத் இயக்கத்தில் நடிகர் அஜித் நடித்துள்ள மூன்றாவது திரைப்படம் துணிவு. இப்படம் வருகிற ஜனவரி 11-ந் தேதி பொங்கல் பண்டிகைக்கு திரையரங்குகளில் ரிலீஸாக உள்ளது. இப்படத்திற்கான முன்பதிவும் தொடங்கி விறுவிறுப்பாக நடைபெற்று வருகிறது. இப்படத்தில் அஜித்துடன் மஞ்சு வாரியர், ஜான் கொகேன், சமுத்திரக்கனி, அமீர், பாவனி, சிபி என மிகப்பெரிய நட்சத்திர பட்டாளமே நடித்துள்ளது.
ஜிப்ரான் இசையமைத்துள்ள இப்படத்துக்கு நீரவ் ஷா ஒளிப்பதிவு செய்துள்ளார். இப்படத்தின் தமிழக வெளியீட்டு உரிமையை ரெட் ஜெயண்ட் மூவீஸ் நிறுவனமும், வெளிநாட்டு உரிமையை லைகா நிறுவனமும் கைப்பற்றி உள்ளது. வங்கிக் கொள்ளையை மையமாக வைத்து உருவாகி உள்ள இப்படத்தில் நடிகர் அஜித் சற்று நெகடிவ்வான கேரக்டரில் நடித்து இருக்கிறார்.
இதையும் படியுங்கள்... சற்று முன்... பிக்பாஸ் வீட்டில் இருந்து வெளியேறினாரா யாரும் எதிர்பாராத பிரபலம்? ரசிகர்கள் ஷாக்..!
இந்நிலையில், அஜித்தின் துணிவு படத்தை சவுதி அரேபியாவில் ரிலீஸ் செய்ய தடைவிதிக்கப்பட்டு உள்ளது. அப்படத்தில் திருநங்கைகள் தொடர்பான காட்சி ஒன்று இடம்பெற்றுள்ளதன் காரணமாக அதனை அங்கு ரிலீஸ் செய்ய தடை விதிக்கப்பட்டுள்ளதாக கூறப்படுகிறது. சவுதி அரேபியாவை ஒட்டியுள்ள குவைத் மற்றும் கத்தார் நாடுகளில் இன்னும் துணிவு படத்திற்கு சென்சார் செய்யப்படவில்லை. அப்படி செய்யப்பட்டால் அங்கும் இப்படத்திற்கு தடைவிதிக்கப்பட அதிக வாய்ப்புகள் உள்ளதாக தகவல்கள் தெரிவிக்கின்றன.
இந்திய படங்களுக்கு அரபு நாடுகளில் தடைவிதிக்கப்படுவது இது முதன்முறை அல்ல, இதற்கு முன் விஜய் நடித்த பீஸ்ட், துல்கர் சல்மான் நடித்திருந்த குரூப், விஷ்ணு விஷால் நடித்த எஃப் ஐ ஆர் போன்ற படங்களுக்கும் அரபு நாடுகளில் தடைவிதிக்கப்பட்டு இருந்தது. இந்த படங்களில் முஸ்லீம்களை தீவிரவாதிகளாக சித்தரிக்கும் படியான காட்சிகள் இடம்பெற்று இருந்ததால் அங்கு வெளியிட தடைவிதிக்கப்பட்டது குறிப்பிடத்தக்கது.
இதையும் படியுங்கள்... பாரம்பரிய படுகா இன உடையில் நடிகை சாய் பல்லவி! குடும்பத்துடன் எடுத்து கொண்ட புகைப்படங்கள் வைரலாகி வருகிறது!