25 வயதில் ஆடாத ஆட்டமா? சர்ச்சைகளுக்கு பிறகு 20ஆவது போட்டியாளராக பிக் பாஸ் வீட்டிற்குள் சென்ற கலையரசன்!

Bigg Boss Tamil Season 9 Aghori Kalaiyarasan : பிக் பாஸ் தமிழ் சீசன் 9 நிகழ்ச்சியின் 20ஆவது போட்டியாளராக அகோரி கலையரசன் பங்கேற்றுள்ளார்.

பிக் பாஸ் வீட்டில் அகோரி கலையரசன்

அகோரி கலையரசனைப் பற்றி தெரியாதவர்கள் யாரும் இருக்க முடியாது. கோவையைச் சேர்ந்தவர் தான் நாட்டுப்புற கலைஞர் கலையரசன். தொடர்ந்து பலருக்கும் நாட்டுப்புற கலைகளை கற்று கொடுத்து வந்த கலையரசன் ஒரு கட்டத்தில் அகோரியாக மாறினார். காசிக்கு சென்று அகோரிகளுடன் வாழ்ந்து வந்ததகாவும் சாப்பாடு எதுவும் சாப்பிடாமல் இருந்ததாகவும் டீ, எலும்புகளை மட்டுமே சாப்பிட்டு வந்ததாகவும் கூறி பெரும் சர்ச்சையை ஏற்படுத்தினார்.

வீட்டில் பூஜை செய்து சர்ச்சைகளை ஏற்படுத்தினார். யூடியூப் சேனல்களுக்கு பேட்டியளித்து அதிகளவில் டிரெண்டானார். ஒரு கட்டத்தில் கலையரசனின் மனைவி பிரகாவிற்கும் கலையரசனுக்கும் இடையில் பெரிய பூகம்பம் வெடித்தது. இருவரும் ஒருவர் மாற்றி ஒருவர் புகார் அளித்தனர். இருவரும் பிரிந்து வாழ்ந்து வந்தனர். இதற்கிடையில் கலையரசனின் அப்பா இறந்துவிட்டார். பிறகு நீண்ட இடைவெளிக்கு பின் இப்போது கலையரசன் மற்றும் பிரகா இருவரும் ஒன்று சேர்ந்துள்ளனர்.

இது தொடர்பாக அகோரி கலையரசன் வெளியிட்ட வீடியோவில் தான் பிக் பாஸ் வீட்டிற்கு செல்ல இருப்பதாகவும், நானும் மனைவி பிரகா இருவரும் மீண்டும் ஒன்று சேர்ந்துவிட்டோம் என்றும் கூறியிருந்தார். என்னை என்னுடைய மனைவி மன்னித்து ஏற்றுக் கொண்டார். எப்படி சேர்ந்தோம், என்ன நடந்தது என்பது குறித்து என்னுடைய மனைவி பிரகா வீடியோ வெளியிட்டு உண்மையை வெளிப்படுத்துவார் என்று கூறியிருந்தார்.

இந்த நிலையில் தான் விஜய் சேதுபதி தொகுத்து வழங்கிய பிக் பாஸ் தமிழ் சீசன் 9 நிகழ்ச்சியின் தொடக்க விழா இன்று அக்டோபர் 5ஆம் தேதி பிரம்மாண்டமாக தொடங்கியது. இந்த நிகழ்ச்சியில் மொத்தமாக 20 போட்டியாளர்கள் பங்கேற்றுள்ளனர். முதல் போட்டியாளராக வாட்டர்மெலன் ஸ்டார் திவாகர் பங்கேற்றார். கடைசி போட்டியாளராக அகோரி கலையரசன் பங்கேற்று தன்னைப் பற்றிய வீடியோவில் எல்லாவற்றையும் குறிப்பிட்டிருந்தார்.

இந்நிகழ்ச்சிக்கு அவருடன் அவரது மனைவி பிரகாவும் வந்திருந்தார். அப்போது அவர் புகுந்து விளையாடு என்று சொல்லவே அப்புறம் என்ன அனுமதி கிடைத்துவிட்டது இனி விளையாட வேண்டியது தான் என்றார். அதற்கு விஜய் சேதுபதி எத்தனை வயதாகிறது என்று கேட்க, தனக்கு 25 வயதாகிறது என்றார். 25 வயதிலேயே ஆடாத ஆட்டமா? நீங்கள் பிக் பாஸ் வீட்டிற்குள் சென்று வந்த பிறகு இனி பிக் பாஸ் கலையரசன் என்றே அழைக்கப்படுவீர்கள் என்று வாழ்த்தி அவரை வீட்டிற்குள் அனுப்பி வைத்தார்.

இதைத் தொடர்ந்து போட்டியாளர்கள் எடுத்த ஊதா மற்றும் சிகப்பு நிற பேட்ஜ்களின் அடிப்படையில் வீடு இரண்டாக பிரிந்தது. இதில் குறைவான எண்ணிக்கை கொண்ட போட்டியாளர்கள் மட்டுமே பிக் பாஸ் டீலக்ஸ் அறைக்குள் அனுமதிக்கப்பட்டனர். மேலும், நாளை பிக் பாஸ் கொடுக்கும் வரையில் அவர்களுக்கு கொடுக்கப்பட்ட தண்ணீரை மட்டுமே பயன்படுத்திக் கொள்ள வேண்டும். பாத்ரூம் ஏரியாவைத் தவிர மற்ற இடங்களில் சிண்டேக்ஸ் டேங்கில் வைக்கப்பட்டிருக்கும் தண்ணீரை மட்டுமே பயன்படுத்த அனுமதி வழங்கப்பட்டது.

மேலும் போட்டியாளர்களுக்கு 2 பிராமிஸ் வழங்கப்பட்டது. அதன்படி போட்டி கடுமையாக இருக்கும். சவால்களை எதிர்கொள்ள நேரிடும். எல்லா நேரமும் விழிப்புடன் இருந்து சவால்களை சமாளித்து பெஸ்டை கொடுத்து முன்னேறி செல்ல வேண்டும். 2ஆவது பிராமிஸ் எவ்வளவோ பார்த்துவிட்டோம் இதை சமாளிக்க முடியாதா என்ற எண்ணம் கொண்ட ஒருவராகத்தான் வெளியில் செல்வீர்கள் என்று பிக் பாஸ் கூறினார்.