கூகுளை அலறவிட்ட '5201314'.. விடிய விடிய இந்தியர்கள் தேடிய அந்த வார்த்தைக்கு என்ன அர்த்தம்?

5201314 2025-ல் கூகுளில் இந்தியர்கள் அதிகம் தேடிய '5201314' என்ற எண்ணின் அர்த்தம் என்ன? இதோ அந்தச் சீன எண்ணின் சுவாரஸ்யமான காதல் பின்னணி.

கூகுள் நிறுவனம் ஒவ்வொரு ஆண்டும் மக்கள் எதை அதிகம் தேடினார்கள் என்ற பட்டியலை 'யியர் இன் சர்ச்' (Year in Search) என்ற பெயரில் வெளியிடுவது வழக்கம். அந்த வகையில் 2025-ம் ஆண்டிற்கான அறிக்கை தற்போது வெளியாகியுள்ளது. வழக்கம் போல சினிமா மற்றும் கிரிக்கெட் பற்றிய தேடல்கள் இருந்தாலும், இந்தியர்கள் ஒரு குறிப்பிட்ட சீன எண்ணை அதிகம் தேடியுள்ளது பெரும் ஆச்சரியத்தை ஏற்படுத்தியுள்ளது. அதுதான் '5201314'. அதிகம் தேடப்பட்ட அர்த்தங்கள் (Meanings) பட்டியலில் இந்த எண் 5-வது இடத்தைப் பிடித்துள்ளது.

'5201314' - இந்த எண்ணின் ரகசியம் என்ன?

பார்ப்பதற்கு இது சாதாரண எண்களின் வரிசையாகத் தோன்றலாம். ஆனால், இந்த '5201314' என்ற எண்ணுக்குப் பின்னால் ஆழமான காதல் அர்த்தம் ஒளிந்துள்ளது. சீன கலாச்சாரத்தில் எண்களை வைத்து அன்பை வெளிப்படுத்தும் முறை பிரபலம். அந்த வகையில், சீன மொழியில் இந்த எண்களைக் குறியீடாக மாற்றினால், அதற்கு "என் வாழ்நாள் முழுவதும் உன்னை நேசிப்பேன்" (I will love you all my life) என்று அர்த்தம்.

எப்படி இந்த அர்த்தம் வந்தது?

இதன் பின்னணி மிகவும் சுவாரஸ்யமானது. சீன மொழியில் '520' (Wu Er Ling) என்று உச்சரிப்பது, ஆங்கிலத்தில் 'I Love You' என்று சொல்வது போலவே ஒலிக்கும். அதேபோல், '1314' (Yi San Yi Si) என்பது சீன மொழியில் 'வாழ்நாள் முழுவதும்' (Yi Sheng Yi Si) என்ற அர்த்தம் தரும் வார்த்தையைப் போலவே ஒலிக்கும். இந்த ஒலி ஒற்றுமையை வைத்துத்தான், "நான் உன்னை வாழ்நாள் முழுவதும் காதலிப்பேன்" என்பதைச் சொல்லாமல் சொல்ல, காதலர்கள் இந்த '5201314' எண்ணைப் பயன்படுத்துகிறார்கள். சமூக வலைத்தளங்களில் இந்த ரகசியக் குறியீடு இப்போது இந்தியாவிலும் வைரலாகிவிட்டது.

இந்தியர்கள் தேடிய மற்ற வார்த்தைகள்

இந்த எண்ணைத் தவிர, 2025-ல் இந்தியர்கள் அர்த்தம் தேடிய வேறு சில வார்த்தைகளும் இந்தப் பட்டியலில் இடம்பிடித்துள்ளன. அவை:

• போர் நிறுத்தம் (Ceasefire)

• ஒத்திகை (Mock Drill)

• பூக்கி (Pookie - செல்லமாக அழைப்பது)

• மேடே (Mayday - ஆபத்துக்கால உதவி அழைப்பு)

• நெரிசல் (Stampede)

• ஈ சாலா கப் நம்தே (Ee Sala Cup Namde)

போன்ற வார்த்தைகளுக்கான அர்த்தங்களை மக்கள் அதிகம் தேடியுள்ளனர்.

கூகுளின் புதிய தொழில்நுட்பம்

உலகின் மிகப்பெரிய தேடுபொறியான கூகுள், தனது தளத்தில் செயற்கை நுண்ணறிவு (AI) வசதிகளைத் தொடர்ந்து புகுத்தி வருகிறது. இந்த ஆண்டு, பயனர்கள் எதைத் தேடினாலும், அதற்கான சுருக்கமான விளக்கத்தை 'AI Overview' மூலம் உடனுக்குடன் வழங்குகிறது. தேவைப்பட்டால் முழு விவரங்களையும் விரிவாகப் பார்க்கும் வசதியும் அளிக்கப்பட்டுள்ளது.