AI யால் ஆட்டம் காணும் டெக் உலகம்! Google-இன் கிளவுட் டீமிலும் கூண்டோடு லேஆஃப்! இனி மனிதர்கள் என்ன செய்யப்போறாங்க?

Google Cloud Layoffs Google நிறுவனம் AI-யில் கவனம் செலுத்த, கிளவுட் பிரிவில் இருந்து 100-க்கும் மேற்பட்ட வடிவமைப்பாளர்களைப் பணி நீக்கம் செய்துள்ளது. 2025-ல் மைக்ரோசாஃப்ட், அமேசான் போன்ற நிறுவனங்களிலும் பணி நீக்கங்கள் தொடர்கின்றன.

தொழில்நுட்ப உலகில் கூட்டப் பணி நீக்கங்கள் தொடரும் நிலையில், அமெரிக்காவின் அசுர நிறுவனமான Google-ம் தற்போது அதில் இணைந்துள்ளது. அண்மையில் வெளியான CNBC அறிக்கையின்படி, Google தனது கிளவுட் (Cloud) பிரிவில் இருந்து நூற்றுக்கும் மேற்பட்ட வடிவமைப்பாளர்களை (Designers) பணி நீக்கம் செய்துள்ளது. இது செயற்கை நுண்ணறிவில் (Artificial Intelligence - AI) அதிக கவனம் செலுத்தும் நிறுவனத்தின் ஒரு பகுதியாகவே பார்க்கப்படுகிறது. ஊழியர்களை AI-யில் கவனம் செலுத்தும்படி Google வலியுறுத்திய சில காலத்திலேயே இந்தக் பணி நீக்கச் செய்தி வெளியாகி இருப்பது குறிப்பிடத்தக்கது.

பணியாளர்களை Google நீக்கியதன் காரணம் என்ன?

Google கிளவுட் பிரிவின் Quantitative User Experience Research Team, Platform and Service Experience Team மற்றும் சில தொடர்புடைய குழுக்களில் பணிபுரிந்தவர்களே இந்த நடவடிக்கையால் பாதிக்கப்பட்டுள்ளனர். Google சில வடிவமைப்பு (Design) குழுக்களில் உள்ள ஊழியர்களின் எண்ணிக்கையை பாதியாகக் குறைத்துள்ளது. சில பதவிகள் முற்றிலுமாக நீக்கப்பட்டுள்ளன. இந்த வேலையிழப்பைச் சந்தித்தவர்களில் பெரும்பாலானோர் அமெரிக்காவைத் தளமாகக் கொண்டவர்கள். பாதிக்கப்பட்டுள்ள சில ஊழியர்களுக்கு புதிய வேலை தேடிக் கொள்ள டிசம்பர் ஆரம்பம் வரை கால அவகாசம் அளிக்கப்பட்டுள்ளது. AI உட்கட்டமைப்பை (AI Infrastructure) மேம்படுத்துவதில் Google தீவிரமாகப் பணியாற்றும் வேளையில் இந்தக் கூட்டப் பணி நீக்கம் வந்துள்ளது. எனினும், இந்தக் குறைப்பு குறித்து Google அதிகாரிகள் அதிகாரப்பூர்வமாக CNBC-யிடம் பதிலளிக்கத் தயாராகவில்லை.

AI-யில் கவனம் செலுத்த வேண்டியதன் அவசியம்

தினசரி வேலைகளில் AI-யை அதிகமாகப் பயன்படுத்துமாறு Google தனது ஊழியர்களை சமீபத்தில் கேட்டுக் கொண்டது. இந்த ஆண்டின் தொடக்கத்தில், அமெரிக்காவை மையமாகக் கொண்ட பல பிரிவுகளில் உள்ள ஊழியர்களுக்கு சுயமாகப் பிரிந்து செல்ல Google வாய்ப்பளித்தது. மேலும், சிறிய குழுக்களை மேற்பார்வையிடும் மேலாளர்களில் மூன்றில் ஒரு பகுதியினரை Google நீக்கியிருந்தது. மனிதவளம் (HR), வன்பொருள், தேடல் (Search), விளம்பரங்கள், சந்தைப்படுத்தல், நிதி மற்றும் வர்த்தகப் பிரிவுகள் உட்பட பல அமெரிக்கப் பிரிவுகளுக்கு Google இந்த விருப்பப் பிரிதல் திட்டத்தை வழங்கியது. Google-ஐத் தவிர, மைக்ரோசாஃப்ட், அமேசான், மெட்டா போன்ற பெரிய டெக் நிறுவனங்களும் 2025-ல் ஊழியர்களைப் பணி நீக்கம் செய்துள்ளன. சமீப காலத்தில் டெக் துறையில் அதிக வேலை இழப்புகள் ஏற்பட்ட ஆண்டுகளில் 2025-ம் இடம்பிடித்துள்ளது.