"பழைய பாசம் விடல!" - மடிக்கக்கூடிய ஐபோனில் மீண்டும் வரும் டச் ஐடி?

iPhone நீண்ட கால எதிர்பார்ப்புக்குப் பிறகு, 2026-ல் ஆப்பிள் தனது முதல் மடிக்கக்கூடிய ஐபோனை (Foldable iPhone) வெளியிடவுள்ளது. இதில் ஃபேஸ் ஐடிக்கு (Face ID) பதிலாக மீண்டும் 'டச் ஐடி' (Touch ID) இடம்பெற வாய்ப்புள்ளதாகத் தகவல்கள் வெளியாகியுள்ளன. 

"ஃபேஸ் ஐடி (Face ID) சூப்பர்தான்... ஆனாலும் பழைய டச் ஐடி (Touch ID) சுகமே தனி" என்று ஏங்கும் ஆப்பிள் வெறியரா நீங்கள்? உங்களுக்கு ஒரு மகிழ்ச்சியான செய்தி காத்திருக்கிறது.

ஸ்மார்ட்போன் உலகில் சாம்சங், மோட்டோரோலா போன்ற நிறுவனங்கள் மடிக்கக்கூடிய போன்களை (Foldable Phones) வெளியிட்டு கலக்கிக் கொண்டிருக்கும் வேளையில், "ஆப்பிள் எப்பதான் மடிக்கும்?" என்ற கேள்வி பல ஆண்டுகளாகவே இருந்து வருகிறது. அந்தக் கேள்விக்கு இப்போது ஒரு தெளிவான பதில் கிடைத்துள்ளது. அதுவும் ஒரு கூடுதல் சர்ப்ரைஸுடன்!

2026: ஆப்பிளின் கனவுத் திட்டம்

பிரபல சீன தொழில்நுட்ப கசிவாளர் (Tipster) 'டிஜிட்டல் சாட் ஸ்டேஷன்' வெளியிட்டுள்ள தகவலின்படி, 2026-ம் ஆண்டு ஆப்பிள் தனது முதல் மடிக்கக்கூடிய ஐபோனை அறிமுகப்படுத்தவுள்ளது.

இது வெறும் சாதாரண மடிப்பு போன் அல்ல. ஆப்பிளின் நீண்ட கால கனவான "முழுமையான திரை அனுபவத்தை" (All-screen experience) நோக்கிய முதல் படியாக இது இருக்கும். அதாவது நாட்ச் (Notch) இல்லை, துளைகள் (Punch hole) இல்லை, டைனமிக் ஐலேண்ட் (Dynamic Island) கூட இல்லை! முழுக்க முழுக்க திரை மட்டுமே.

மீண்டும் வருகிறதா 'டச் ஐடி'?

ஐபோன் X வந்ததில் இருந்து ஆப்பிள் நிறுவனம் 'ஹோம் பட்டனை' நீக்கிவிட்டு, ஃபேஸ் ஐடி தொழில்நுட்பத்திற்கு மாறியது. ஆனால், 2026-ல் வரவுள்ள இந்த மடிக்கக்கூடிய ஐபோனில் மீண்டும் 'டச் ஐடி' (Touch ID) கொண்டுவரப்பட உள்ளதாம்.

ஏன் இந்த திடீர் மாற்றம்?

மடிக்கக்கூடிய போன்களில் உள்ளே இருக்கும் பாகங்களை மிக நெருக்கமாக வடிவமைக்க வேண்டும். ஃபேஸ் ஐடிக்குத் தேவையான சென்சார்களை உள்ளே வைப்பதற்கு போதுமான இடவசதி இருக்காது என்று கூறப்படுகிறது. எனவே, எளிமையான மற்றும் பாதுகாப்பான வழியாக, போனின் பக்கவாட்டில் உள்ள பட்டனில் (Side Button) கைரேகை ஸ்கேனரை வைக்க ஆப்பிள் திட்டமிட்டுள்ளது.

கேமராவில் என்ன புதுமை?

இந்த போனில் செல்ஃபி கேமரா எங்கே இருக்கும் தெரியுமா? திரைக்கு அடியில்! (Under-display Camera).

• 24 மெகாபிக்சல் கேமரா: திரைக்கு அடியில் மறைந்திருக்கும் இந்த கேமரா, ஆண்ட்ராய்டு போன்களில் இருப்பதை விட மிகத் துல்லியமாக இருக்கும்.

• சிறப்பு லென்ஸ்: திரைக்கு அடியில் இருந்து படம் பிடிக்கும்போது ஒளி குறையும் என்பதால், அதைச் ஈடுகட்ட 6-எலிமெண்ட் பிளாஸ்டிக் லென்ஸ் மற்றும் அதிநவீன இமேஜ் பிராசஸிங் தொழில்நுட்பத்தைப் பயன்படுத்தவுள்ளனர்.

2027: ஐபோனின் 20-வது ஆண்டு விழா

இந்த 2026 மடிப்பு போன் ஒரு முன்னோட்டம் மட்டும்தானாம். 2007-ல் முதல் ஐபோன் வெளியானது. அதன் 20-வது ஆண்டைக் கொண்டாடும் விதமாக, 2027-ல் ஒரு மெகா ஐபோனை ஆப்பிள் வெளியிடவுள்ளது.

அதில் ஃபேஸ் ஐடி, கேமரா என அனைத்தும் திரைக்கு அடியில் சென்றுவிடும். பெசல்களே (Bezels) இல்லாத, நான்கு பக்கமும் வளைந்த திரையுடன் ஒரு "மேஜிக்கல் கண்ணாடித் துண்டு" போல அந்த போன் இருக்கும் என்று எதிர்பார்க்கப்படுகிறது.

ஆக, 2026-ல் மடிப்பு போன், 2027-ல் முழுத்திரை ஐபோன் என அடுத்தடுத்த ஆண்டுகளில் ஆப்பிள் ரசிகர்களுக்குத் திருவிழாதான்!