சீர்குலைந்த ஸ்டாலின் அரசு.. அமைச்சர்கள் இருக்கும்போது செயலாளர் பேட்டி ஏன்? இ.பி.எஸ். அட்டாக்!

கரூர் துயரச் சம்பவம் குறித்து, வருவாய் துறை செயலாளர் பேட்டி அளித்ததை எதிர்க்கட்சி தலைவர் எடப்பாடி பழனிசாமி கடுமையாக விமர்சித்துள்ளார். அரசின் தலையீடு ஏன் எனக் கேள்வி எழுப்பியுள்ள அவர், ஸ்டாலின் அரசு நாடகமாடுவதாக குற்றம் சாட்டியுள்ளார்.

மக்கள் பிரதிநிதிகள் இருக்கும்போது, வருவாய் துறை செயலாளர் ஊடகங்களுக்குப் பேட்டி அளிக்க வேண்டிய அவசியம் என்ன என எதிர்க்கட்சி தலைவர் எடப்பாடி பழனிசாமி கேள்வி எழுப்பியுள்ளார். கரூர் சம்பவத்துக்குப் பிறகு ஸ்டாலின் முற்றிலும் சீர்குலைந்து விட்டது எனவும் விமர்சித்துள்ளார்.

கரூர் பொதுக்கூட்ட நெரிசல் மரணங்கள் குறித்து தமிழக அரசுத் தரப்பில் உயர் அதிகாரிகள் ஊடகங்களுக்கு விளக்கம் அளித்ததைக் கண்டித்து, அ.தி.மு.க. பொதுச்செயலாளர் திரு. எடப்பாடி கே. பழனிசாமி அவர்கள் இன்று தனது 'எக்ஸ்' (X) சமூக வலைதளப் பக்கத்தில் மிகக் காட்டமான பதிவை வெளியிட்டுள்ளார்.

"கரூர் துயரச் சம்பவம் நடந்ததிலிருந்து, மு.க. ஸ்டாலின் தலைமையிலான அரசு முற்றிலும் சீர்குலைந்த நிலையில் உள்ளது. அப்பாவி மக்களைப் பாதுகாக்கத் தவறிய தங்களது படுதோல்வியை விரைவாக மறைத்து, இந்த விபத்துக்கான பழியை மற்றவர்கள் மீது சுமத்த வேண்டும் என்பதே இந்த அரசின் ஒரே நோக்கமாகத் தெரிகிறது" என எடப்பாடி பழனிசாமி கூறியுள்ளார்.

விசாரணைக் குழுவில் தலையீடு!

அரசுத் தரப்பு விளக்கம் அளித்ததற்கான அவசியத்தை எடப்பாடி பழனிசாமி கடுமையாகச் சாடினார்.

"தேர்ந்தெடுக்கப்பட்ட மக்கள் பிரதிநிதிகள், அமைச்சர்கள் போன்றோர் இருக்கும்போது, வருவாய் செயலாளர் ஊடகங்களுக்கு பேட்டி அளிப்பதன் அவசியம் என்ன? ஏற்கனவே ஓய்வு பெற்ற உயர்நீதிமன்ற நீதிபதி திருமதி. அருணா ஜெகதீசன் தலைமையில் ஒரு விசாரணைக்குழு நியமிக்கப்பட்டு, தனது பணியைத் தொடங்கியுள்ள நிலையில், அரசின் பேச்சாளர் என்ற முறையில் கூட ஒரு செயலாளர் இதுபோன்ற விஷயங்களைப் பேசுவது ஏன்?" என்று அவர் கேள்வி எழுப்பினார்.

"இது, விசாரணைக் குழுவின் சுதந்திரமான கருத்துக்களைப் பாதிக்கும் வகையில் அமைந்து, நீதியிலான அவமதிப்பாக கருதப்பட வேண்டியதில்லையா?" என்றும் அவர் வினவியுள்ளார்.

நெறிமுறையற்ற ஸ்டாலின் அரசு!

ஸ்டாலின் அரசு நெறிமுறைகளையும், ஒழுக்கத்தையும் இழந்துவிட்டதாக இ.பி.எஸ். குற்றம் சாட்டினார். "ஸ்டாலின் அரசுக்கு எந்த விதமான நெறிமுறைகளும், ஒழுக்கமும் இல்லை. அவர்களுக்கு முக்கியமானது, 41 அப்பாவி மக்கள் உயிரிழந்த இந்தக் கொடூரமான சம்பவத்துக்கான பொறுப்பிலிருந்து எப்படியாவது தப்பித்துக் கொள்வதுதான். உண்மையை மறைப்பதற்காக இப்படிப்பட்ட நாடகத்தை இந்த அரசு அரங்கேற்றி இருப்பது, தமிழக மக்களிடையே மிகப்பெரிய சந்தேகத்தையும், அச்சத்தையும் ஏற்படுத்துகிறது" என்று எடப்பாடி பழனிசாமி தனது பதிவில் ஆவேசமாகக் குறிப்பிட்டுள்ளார்.

அ.தி.மு.க. பொதுச் செயலாளரின் இந்தக் கண்டனம், கரூர் துயரம் குறித்த அரசியல் விவாதத்தை மேலும் சூடாக்கியுள்ளது.