யு-17 உலகக் கோப்பை: மாலி, பராகுவே அணிகள் அடுத்த சுற்றுக்கு முன்னேறியது…

U-17 World Cup Mali and Paraguay teams advanced to next round ...

பதினேழு வயதுக்கு உள்பட்டோருக்கான யு-17 உலகக் கோப்பை கால்பந்து போட்டியில் மாலி அணியும், பராகுவே அணியும் அடுத்த சுற்றுக்கு முன்னேறின. 

பதினேழு வயதுக்கு உள்பட்டோருக்கான யு-17 உலகக் கோப்பை கால்பந்து போட்டி டெல்லியில் நேற்று நடைபெற்றது.

இந்த ஆட்டத்தில் அபாரமாக ஆடிய மாலி அணி 18-வது நிமிடத்தில் முதல் கோலை அடித்தது. இந்த கோலை சாலம் ஜிடோவ் அடித்தார். இதனால் முதல் பாதி ஆட்டநேர முடிவில் மாலி அணி 1-0 என்ற கோல் கணக்கில் முன்னிலையில் இருந்தது. 

பின்னர் நடைபெற்ற 2-வது பாதி ஆட்டத்தின் 50-வது நிமிடத்தில் ஜெமூசா கோலடிக்க, மாலி அணி 2-0 என்ற கோல் கணக்கில் முன்னிலைப் பெற்றது.

மறுமுனையில் போராடிய நியூஸிலாந்து அணி 72-வது நிமிடத்தில் சார்லஸ் மூலம் கோலடித்தது. அதற்குப் பதிலடியாக 82-வது நிமிடத்தில் மாலி வீரர் லஸானா டியே கோலடித்தார்.

இறுதியில் மாலி அணி 3-1 என்ற கோல் கணக்கில் வெற்றிப் பெற்றது.

அதேபோன்று, நவி மும்பையில் நடைபெற்ற மற்றொரு ஆட்டத்தில் பராகுவே அணி 3-1 என்ற கோல் கணக்கில் துருக்கியை வீழ்த்தியது.

பராகுவே தரப்பில் ஜியோவானி 41-வது நிமிடத்திலும், பெர்னாண்டோ கார்டோஸா 43-வது நிமிடத்திலும், கேல்யானோ 61-வது நிமிடத்திலும் கோலடித்தனர்.

மறுமுனையில் திணறிய துருக்கி அணி, "இஞ்சுரி' நேரத்தில் கோலடித்தது. இந்த கோலை கெரீம் அடித்தார். 

துருக்கியை வீழ்த்தியதன் மூலம் 3-வது வெற்றியைப் பெற்ற பராகுவே அணி 9 புள்ளிகளுடன் "பி' பிரிவில் முதலிடத்தைப் பிடித்தது.

இதே பிரிவில் மாலி அணி 6 புள்ளிகளுடன் 2-வது இடத்தைப் பிடித்தது.