போஸ்னியா வீரரை வீழ்த்தி ரஃபேல் நடால் அடுத்த சுற்றுக்கு அசத்தல் முன்னேற்றம்...

Rafael Nadal advanced to the next round

இத்தாலியன் ஓபன் டென்னிஸ் போட்டியில் போஸ்னியா வீரரை வீழ்த்தி ஸ்பெயினின் ரஃபேல் நடால் 3-வது சுற்றுக்கு அசத்தலாக முன்னேறினார்.

இத்தாலியன் ஓபன் டென்னிஸ் போட்டி இத்தாலியில் நடைப்பெற்று வருகிறது. இதில் ஆடவர் ஒற்றையர் பிரிவு 2-வது சுற்றில் போட்டித் தரவரிசையில் முதலிடத்தில் இருக்கும் ரஃபேல் நடால் மற்றும் போஸ்னியா வீரர் டாமிஸ் ஜும்ஹூர் மோதினர். இதில், 6-1, 6-0 என்ற செட்களில் டாமிஸ் ஜும்ஹூரை எளிதாக வீழ்த்தினார் நடால்.

அதேபோன்று மற்றொரு ஆட்டத்தில் போட்டித் தரவரிசையில் 11-வது இடத்தில் இருக்கும் செர்பியாவின் நோவக் ஜோகோவிச் 6-4, 6-2 என்ற செட்களில் ஜியார்ஜியாவின் நிகோலஸ் பாசிலாஷ்விலியை தோற்கடித்தார்.

பிற ஆட்டங்களில் இத்தாலியின் ஃபாபியோ ஃபாக்னினி 6-4, 1-6, 6-3 என்ற செட்களில், போட்டித் தரவரிசையில் 6-வது இடத்தில் இருந்த ஆஸ்திரியாவின் டொமினிக் தீமை தோற்கடித்தார். 

அதேபோன்று ஸ்பெயினின் ஆல்பர்ட் ரமோஸ் 6-7(5/7), 7-6(7/2), 7-6(7/5) என்ற செட்களில் அமெரிக்காவின் ஜான் ஐஸ்னரையும் தோற்கடித்தார். 

ஜெர்மனியின் ஃபிலிப் கோல்ஷ்ரைபர் 6-4, 6-3 என்ற செட்களில் அமெரிக்காவின் ஜேக் சாக்கை வீழ்த்தி அசத்தினார்.