முர்ரே, கெர்பர் இருவரும் அதிர்ச்சித் தோல்வி…

ஆஸ்திரேலிய ஓபன் டென்னிஸ் போட்டியின் 4-ஆவது சுற்றில் உலகின் முதல் நிலை வீரர்களான பிரிட்டனின் ஆன்டி முர்ரே, ஜெர்மனியின் ஏஞ்ஜெலிக் கெர்பர் ஆகியோர் அதிர்ச்சித் தோல்வி அடைந்தனர்.

அதேநேரத்தில் ஸ்விட்சர்லாந்தின் ரோஜர் ஃபெடரர், வாவ்ரிங்கா, அமெரிக்காவின் வீனஸ் வில்லியம்ஸ் உள்ளிட்டோர் காலிறுதிக்கு முன்னேறியுள்ளனர்.

ஆண்டின் முதல் கிராண்ட்ஸ்லாம் போட்டியான ஆஸ்திரேலிய ஓபன் டென்னிஸ் போட்டி மெல்போர்னில் நடைபெற்று வருகிறது.

இதில் 7-ஆவது நாளான ஞாயிற்றுக்கிழமை நடைபெற்ற காலிறுதிக்கு முந்தைய சுற்றில் போட்டித் தரவரிசையில் முதலிடத்தில் இருந்த ஆன்டி முர்ரே 5-7, 7-5, 2-6, 4-6 என்ற செட் கணக்கில் உலகின் 50-ஆம் நிலை வீரரான ஜெர்மனியின் மிஸ்கா ஸ்வெரெவிடம் அதிர்ச்சித் தோல்வி கண்டார்.

ஆஸ்திரேலிய ஓபனில் 6 முறை சாம்பியன் பட்டம் வென்றவரான செர்பியாவின் நோவக் ஜோகோவிச் 2-ஆவது சுற்றோடு வெளியேறிய நிலையில், இப்போது முர்ரேவும் தோற்றுள்ளார்.

ஃபெடரர் தனது காலிறுதிக்கு முந்தைய சுற்றில் கடும் போராட்டத்துக்குப் பிறகு 6-7 (4), 6-4, 6-1, 4-6, 6-3 என்ற செட் கணக்கில் ஜப்பானின் நிஷிகோரியைத் தோற்கடித்தார். ஃபெடரர் தனது காலிறுதியில் ஸ்வெரெவை சந்திக்கிறார்.

வாவ்ரிங்கா தனது காலிறுதிக்கு முந்தைய சுற்றில் 7-6 (2), 7-6 (4), 7-6 (4) என்ற நேர் செட்களில் இத்தாலியின் ஆண்ட்ரியாஸ் செப்பியை வீழ்த்தி காலிறுதிக்கு முன்னேறினார். வாவ்ரிங்கா தனது காலிறுதியில் பிரான்ஸின் ஜோ வில்பிரைட் சோங்காவை சந்திக்கிறார்.

மகளிர் ஒற்றையர் காலிறுதிக்கு முந்தைய சுற்றில் போட்டித் தரவரிசையில் முதலிடத்தில் இருந்த ஏஞ்ஜெலிக் கெர்பர் 2-6, 3-6 என்ற நேர் செட்களில் அமெரிக்காவின் கோகோ வான்டேவெக்கிடம் அதிர்ச்சித் தோல்வி கண்டார்.

வான்டேவெக் தனது காலிறுதியில் ஸ்பெயினின் கார்பைன் முகுருஸாவை சந்திக்கிறார். முகுருஸா தனது முந்தைய சுற்றில் 6-2, 6-3 என்ற நேர் செட்களில் ருமேனியாவின் கிறிஸ்டியாவை தோற்கடித்தார்.

அமெரிக்காவின் மூத்த வீராங்கனையான வீனஸ் வில்லியம்ஸ் 6-3, 7-5 என்ற நேர் செட்களில் ஜெர்மனியின் மோனா பார்த்தேலை தோற்கடித்து காலிறுதிக்கு முன்னேறினார்.