பெங்களூருவை வீழ்த்திய மும்பை இண்டியன்ஸ்க்கு அசத்தல் வெற்றி...

Mumbai Indians defeat Bengaluru

பெங்களூரு ராயல் சேலஞ்சர்ஸ் அணியை 46 ஓட்டங்களில் வீழ்த்தி அசத்தல் வெற்றிப்  பெற்றது மும்பை இண்டியன்ஸ்.

மும்பைக்கும் - பெங்களூரு அணிகள் இடையே வான்கடே மைதானத்தில் ஐபிஎல் கிரிக்கெட் போட்டிகளின் 14-வது ஆட்டம் நேற்று நடைபெற்றது. 

டாஸ் வென்ற பெங்களூரு அணி பீல்டிங்கை தேர்வு செய்தது. இதையடுத்து மும்பை தரப்பில் சூர்யகுமார் யாதவ், எவின் லெவிஸ் ஆகியோர் தொடக்க வீரர்களாக களமிறங்கினர்.

மும்பை அணியின் சூர்யகுமார் யாதவ் , இஷான் கிஷான் ஆகியோர் முதல் பந்திலேயே உமேஷ் பந்துவீச்சில் போல்டானார்கள். லெவிஸ் 65 ஓட்டங்கள், கருணால் பாண்டியா 15 ஓட்டங்கள், பொல்லார்ட் 5 ஓட்டங்களிலும் ஆட்டமிழந்தனர். 

ரோஹித் சர்மா 5 சிக்ஸர், 10 பவுண்டரியுடன் 52 பந்தில் 94 ஓட்டங்களில் ஆட்டமிழந்தார். ஹர்திக் பாண்டியா 17 ஓட்டங்களிலும், மிச்செல் ஓட்டம் ஏதும் எடுக்காமல் களத்தில் இருந்தனர். 20 ஓவர்கள் முடிவில் 6 விக்கெட் இழப்புக்கு 213 ரன்களை மும்பை அணி எடுத்திருந்தது.

பெங்களூரு தரப்பில் உமேஷ், ஆண்டர்சன் தலா 2 விக்கெட்டுகளையும், வோக்ஸ் 1 விக்கெட்டையும் வீழ்த்தினர். 

214 ஓட்டங்களை பெற்றால் வெற்றி என்ற இலக்குடன் பெங்களூரு அணி தரப்பில் கேப்டன் விராட் கோலி, டி காக் தொடக்க வீரர்களாக களமிறங்கினர். டிகாக் 19 ஓட்டங்களில் ஆட்டமிழந்தார். 

அதிரடி வீரர்களான டி வில்லியர்ஸ் வெறும் 1 ஓட்டத்திலும், மந்தீப் சிங் 16 ஓட்டங்களிலும், ஆண்டர்சன் ஓட்டம் ஏதுமின்றியும், வாஷிங்டன் சுந்தர் 7 ஓட்டங்களிலும் ஆட்டமிழந்தது பெங்களூரு அணிக்கு சரிவை ஏற்படுத்தியது. 

மறுமுனையில் கோலி மட்டுமே நிலைத்து ஆடிக் கொண்டிருந்தார். 12 ஓவர்கள் முடிவில் 5 விக்கெட் இழப்பு வெறும் 87 ஓட்டங்களுக்கு பெங்களூரு அணி தடுமாறியது.

அப்போது பீல்டிங் செய்த ஹர்திக் பாண்டியா வீசிய பந்து பட்டு விக்கெட் கீப்பர் இஷான் கிஷான் தலையில் காயம் ஏற்பட்டதால் அவர் வெளியேறினார். சர்பராஸ் கான் 5 ஓட்டங்கள், கிறிஸ் வோக்ஸ் 11 ஓட்டங்கள், உமேஷ் யாதவ் 1 ஓட்டத்திலும் ஆட்டமிழந்தனர். 

கேப்டன் விராட் கோலி அதிரடியாக ஆடி 92 ஓட்டங்களுடனும், மொகமது சிராஜ் 8 ஓட்டங்களுடனும் ஆட்டமிழக்காமல் இருந்தனர்.  20 ஓவர்கள் முடிவில் 8 விக்கெட் இழப்புக்கு பெங்களூரு அணி 167 ரன்களை மட்டுமே எடுக்க முடிந்தது. 

மும்பை தரப்பில் கருணால் பாண்டியா 3, பும்ரா, மிச்செல் மெக்ளேனகன் தலா 2, மார்கண்டே 1 விக்கெட்டையும் வீழ்த்தினர். 

இறுதியில் 46 ஓட்டங்கள்வித்தியாசத்தில் மும்பை அணி அசத்தலாக வெற்றியைப் பெற்றது.