கொல்கத்தா – புணே அணிகள் இன்று மோதுகிறது…

கொல்கத்தாவில் இன்று (வெள்ளிக்கிழமை) நடைபெறும் இந்தியன் சூப்பர் லீக் (ஐஎஸ்எல்) கால்பந்து தொடரின் 54-ஆவது லீக் ஆட்டத்தில் அட்லெடிகோ டி கொல்கத்தாவும், புணே சிட்டி அணியும் மோதுகின்றன.

கொல்கத்தா அணி ஏற்கெனவே அரையிறுதிக்கு முன்னேறிவிட்டது. அதநேரத்தில் புணே சிட்டி அணி ஏற்கெனவே அரையிறுதி வாய்ப்பை இழந்துவிட்டது. இதனால் இந்த ஆட்டம் சம்பிரதாய ஆட்டமாகவே பார்க்கப்பட்டாலும், கொல்கத்தா அணி இந்த ஆட்டத்தில் வெல்லும்பட்சத்தில் புள்ளிகள் பட்டியலில் 2-ஆவது இடத்தைப் பிடிக்க வாய்ப்புள்ளது.

இதுதவிர இந்த சீசனில் கொல்கத்தா அணி தனது சொந்த மண்ணில் விளையாடும் கடைசிப் போட்டி இது. எனவே உள்ளூர் ரசிகர்கள் முன்னிலையில் நடைபெறும் இந்தப் போட்டியை வெற்றியோடு முடிக்க கொல்கத்தா அணி தீவிரம் காட்டும் என எதிர்பார்க்கப்படுகிறது. ஐஎஸ்எல் போட்டியின் 3 சீசன்களிலும் அரையிறுதிக்கு முன்னேறியிருக்கும் ஒரே அணி கொல்கத்தா என்பது குறிப்பிடத்தக்கது.

அதேநேரத்தில் புணே அணியும், இந்த சீசனின் கடைசி ஆட்டத்தை வெற்றியோடு முடிக்கப் போராடும் என எதிர்பார்க்கப்படுகிறது. கொல்கத்தா அணியின் முன்னாள் பயிற்சியாளரான ஹபாஸ், இப்போது புணே பயிற்சியாளராக உள்ளார். எனவே இந்த ஆட்டத்தில் கொல்கத்தாவை வீழ்த்துவதற்கு தேவையான ஆலோசனைகளை புணே அணிக்கு ஹபாஸ் அளிப்பார் என நம்பலாம்.