தடகளத்தில் தங்கம் வென்றார் இந்தியாவின் ஜிஸ்னா மேத்யூ... குவியும் பாராட்டுகள்...

Gold in the athletics India Jisna Mathew ...

ஆசிய ஜூனியர் தடகள சாம்பியன்ஷிப் போட்டியில் இந்தியாவின் ஜிஸ்னா மேத்யூ தங்கம் வென்று அனைவரின் பாராட்டுகளையும் பெற்றுள்ளார்.

ஆசிய ஜூனியர் தடகள சாம்பியன்ஷிப் போட்டி ஜப்பானின் ஜிபு நகரில் கடந்த வியாழக்கிழமை தொடங்கின. 

இதில், 400 மீ ஓட்டத்தில் நடப்புச் சாம்பியன், இந்திய வீராங்கனை ஜிஸ்னா மேத்யூ 53.26 வினாடிகளில் கடந்து தங்கப்பதக்கம் வென்றார். இதில் இலங்கை வெள்ளியும், சீன தைபே வெண்கலமும் வென்றன.

பிடி. உஷா நடத்தும் பயிற்சி மைய மாணவியான ஜிஸ்னா ஏற்கெனவே சீனியர் ஆசிய தடகளப் போட்டியிலும் தொடர் ஓட்டம், 400 மீ ஓட்டத்தில் தங்கம், வெண்கலம் வென்றவர் என்பது குறிப்பிடத்தக்கது. 

நீளம் தாண்டுதலில் எம்.ஸ்ரீசங்கர் 7.47 மீ தூரம் தாண்டி வெண்கலம் வென்றார். 

குண்டு எறிதலில் அஜய் பத்தோலியா வெள்ளியும், உயரம் தாண்டுதலில் அபிநய சுதாகர ஷெட்டி வெண்கலமும் வென்றனர். 

மேலும், 10000 மீ ஓட்டத்தில் கார்த்திக் குமார், 1500 மீ மகளிர் ஓட்டத்தில் துர்கா பிரமோத் ஆகியோரும் வெண்கலம் வென்றனர்.

இரண்டாவது நாள் முடிவில் 2 தங்கம், ஒரு வெள்ளி, 7 வெண்கலப் பதக்கங்களை இந்தியா வென்றிருந்தது.