பாரிஸ் பாராலிம்பிக் போட்டிகள் 2024: அவனி லெகாரா, மோனா அகர்வால் இறுதிப் போட்டிக்குத் தகுதி!

இந்திய துப்பாக்கி சுடும் வீரர்களான அவனி லெகாரா மற்றும் மோனா அகர்வால் ஆகியோர் இன்று நடைபெற்ற பாரிஸ் பாராலிம்பிக் 2024 தொடரில் மகளிர் 10 மீட்டர் ஏர் ரைபிள் (SH1) போட்டியின் இறுதிப் போட்டிக்குத் தகுதி பெற்றனர்.

வெள்ளிக்கிழமை பாரிஸ் பாராலிம்பிக்கில் மகளிர் 10 மீட்டர் ஏர் ரைபிள் (SH1) இறுதிப் போட்டிக்கு 2ஆவது இடத்தைப் பிடித்து இந்தியாவின் சிறந்த துப்பாக்கி சுடும் வீராங்கனை அவனி லெகாரா தகுதி பெற்றார். இந்த சாதனையானது அவரது டோக்கியோ விளையாட்டுப் போட்டிகளில் தங்கப் பதக்க வெற்றியை மீண்டும் நிகழ்த்தும் என்ற நம்பிக்கையைத் தூண்டியுள்ளது.

கடந்த ஒரு வருடமாக விதிவிலக்கான ஆட்டத்தை வெளிப்படுத்தி வரும் தோழமை வீராங்கனை மோனா அகர்வாலும் இறுதிப் போட்டிக்குத் தகுதி பெற்றுள்ளார். ஐந்தாவது இடத்தைப் பிடித்த அகர்வால், இந்தியாவுக்கு இந்தப் பிரிவில் இரண்டு பதக்கங்களை வெல்லும் வாய்ப்பை வழங்கியுள்ளார். இந்தப் பிரிவில் இரண்டு இந்திய பெண் துப்பாக்கி சுடும் வீரர்கள் இறுதிப் போட்டிக்கு முன்னேறியது இதுவே முதல் முறையாகும், இது ஒரு வரலாற்று சாதனையாகும்.

அவனி லெகாரா 625.8 புள்ளிகள் பெற்று பாரிஸ் பாராலிம்பிக்கில் மகளிர் 10 மீட்டர் ஏர் ரைபிள் (SH1) இறுதிப் போட்டியில் இரண்டாவது இடத்தைப் பிடித்தார். 627.5 புள்ளிகளுடன் புதிய பாராலிம்பிக் தகுதிச் சுற்று சாதனையைப் படைத்த இரினா ஷ்செட்னிக் பின்னால் அவர் இருந்தார். தனது முதல் பாராலிம்பிக்கில் பங்கேற்றுள்ள மோனா அகர்வால் 623.1 புள்ளிகள் பெற்று ஐந்தாவது இடத்தைப் பிடித்தார்.

11 வயதில் ஏற்பட்ட கார் விபத்தில் இடுப்பிற்குக் கீழே செயலிழந்து சக்கர நாற்காலியைப் பயன்படுத்தும் அவனி, 2021 டோக்கியோ பாராலிம்பிக்கில் பதக்கம் வென்ற முதல் இந்திய பெண் துப்பாக்கி சுடும் வீரர் என்ற வரலாற்றைப் படைத்தார். 10 மீட்டர் ஏர் ரைபிளில் தங்கம் வென்றது மட்டுமின்றி, 50 மீட்டர் ரைபிள் 3-பொசிஷன்களில் வெண்கலத்தையும் வென்றார்.துப்பாக்கி சுடுதலில் SH1 பிரிவு என்பது கைகள், கீழ் உடல், கால்கள் அல்லது மூட்டுகள் இல்லாதவர்களுக்கானது என்பது குறிப்பிடத்தக்கது.