Asian Games 2026: ஆசிய விளையாட்டுப் போட்டியில் தங்கம் வென்று இந்திய மகளிர் கிரிக்கெட் அணி சாதனை!

Asian Games 2026: ஆசிய விளையாட்டுப் போட்டியில் ஹர்மன்பிரீத் கவுர் தலைமையிலான இந்திய மகளிர் அணி 147 ரன்கள் வித்தியாசத்தில் இலங்கையை வீழ்த்தி முதல் தங்கத்தை வென்றுள்ளது. 216 ரன்கள் குவித்த இந்தியா, இலங்கையை 69 ரன்களுக்கு சுருட்டி சாதனை படைத்தது.

ஜப்பான் நாட்டின் நிஷின் நகரில் உள்ள கோரோகி ஸ்போர்ட்ஸ் பார்க்கில் செப்டம்பர் 22, செவ்வாய்க்கிழமை ஆசிய விளையாட்டுப் போட்டிகளுக்கான மகளிர் கிரிக்கெட் இறுதிப்போட்டி நடந்தது. இதில் ஹர்மன்பிரீத் கவுர் தலைமையிலான இந்திய மகளிர் கிரிக்கெட் அணி, இலங்கையை 147 ரன்கள் வித்தியாசத்தில் வீழ்த்தி அபார வெற்றி பெற்றது. இதன் மூலம், 2026 ஆசிய விளையாட்டுப் போட்டியில் இந்தியாவுக்கு முதல் தங்கம் கிடைத்துள்ளது.

முதலில் பேட்டிங் செய்த இந்திய அணி 20 ஓவர்களில் 3 விக்கெட் இழப்புக்கு 216 ரன்கள் குவித்தது. அடுத்து களமிறங்கிய இலங்கை அணி, இந்திய வீராங்கனைகளின் சுழற்பந்து வீச்சை சமாளிக்க முடியாமல் 15.4 ஓவர்களில் வெறும் 69 ரன்களுக்கு சுருண்டது. தீப்தி சர்மா (3/6), ஷஃபாலி வர்மா (2/3), ஷ்ரேயங்கா பாட்டீல் (2/9), ஸ்ரீ சரணி (2/13) ஆகியோர் தங்களது அபாரமான பந்துவீச்சால் இலங்கை அணியை நிலைகுலையச் செய்தனர். கடந்த 2023 ஆம் ஆண்டும் ஹர்மன்பிரீத் கவுர் தலைமையிலான இந்திய அணிதான் தங்கம் வென்றிருந்தது குறிப்பிடத்தக்கது.

இந்த வெற்றியின் மூலம், ஆசிய விளையாட்டுப் போட்டிகளில் தொடர்ந்து இரண்டு முறை தங்கம் வென்று, தங்களது சாம்பியன் பட்டத்தை தக்கவைத்த முதல் மகளிர் கிரிக்கெட் அணி என்ற வரலாற்றுச் சாதனையை இந்தியா படைத்துள்ளது. அதுமட்டுமின்றி 20 ஓவர்களில் 3 விக்கெட் இழப்புக்கு 216 ரன்கள் குவித்து, ஆசிய விளையாட்டு வரலாற்றிலேயே புதிய சாதனையை இந்திய மகளிர் அணி பதிவு செய்துள்ளது என்பது குறிப்பிடத்தக்கது.