Virat Kohli: கங்குலி சொன்ன மாதிரி ஒரு சம்பவம் நடக்கவே இல்ல..! பிசிசிஐ முகத்திரையை கிழித்த கோலி

விராட் கோலியை டி20 கேப்டன்சியிலிருந்து விலக வேண்டாம் என்று பிசிசிஐ கேட்டுக்கொண்டதாகவும், ஆனால் கோலி மறுத்துவிட்டதாகவும் கங்குலி கூறியிருந்த நிலையில், அதுமாதிரியான ஒரு சம்பவம் நடக்கவேயில்லை என்று விராட் கோலி கூறியுள்ளார்.  

டி20 உலக கோப்பையுடன் விராட் கோலி இந்திய டி20 அணியின் கேப்டன்சியிலிருந்து விலகினார். இந்திய ஒருநாள் அணியின் கேப்டன்சியிலிருந்தும் விராட் கோலி விலகிவிடுவார் என்ற தகவல் வெளியாகிவந்தது. ஆனால் ஒருநாள் அணியின் கேப்டன்சியிலிருந்து விலகும் ஐடியா கோலிக்கு இல்லை.

ஆனாலும், வெள்ளைப்பந்து கிரிக்கெட் அணிகளை (ஒருநாள் மற்றும் டி20) வெவ்வேறு கேப்டன்கள் வழிநடத்துவது சரியாக இருக்காது என்பதால், ஒருநாள் கேப்டன்சியும் ரோஹித்திடமே ஒப்படைக்கப்பட்டது.

தென்னாப்பிரிக்க சுற்றுப்பயணத்துக்கான டெஸ்ட் அணி அறிவிக்கப்பட்டபோதே, இந்த அறிவிப்பும் வெளியானது. ஒருநாள் அணியின் கேப்டன்சியிலிருந்து விராட் கோலி நீக்கப்பட்டு ரோஹித் சர்மா நியமிக்கப்பட்டார். 

இந்த கேப்டன்சி மாற்றம் தொடர்பாக பல்வேறு தகவல்கள் வலம்வந்தன. ஒருநாள் அணியின் கேப்டன்சியிலிருந்து விலக கோலிக்கு 48 மணி நேரம் அவகாசம் கொடுக்கப்பட்டதாகவும், அதற்குள் கோலி கேப்டன்சியிலிருந்து விலக மறுத்ததால், அவர் கேப்டன்சியிலிருந்து நீக்கப்பட்டதாகவும் பேசப்பட்டது. கோலி பிசிசிஐ மீது அதிருப்தியில் இருப்பதாகவும், ரோஹித்தின் கேப்டன்சியில் ஆட விரும்பாததால் தென்னாப்பிரிக்காவுக்கு எதிரான ஒருநாள் தொடரிலிருந்து விலக்கு கேட்டதாகவும் தகவல் வெளியானது.

இதற்கிடையே, ஒருநாள் அணியின் கேப்டன்சி மாற்றம் குறித்து பேசிய பிசிசிஐ தலைவர் சௌரவ் கங்குலி, விராட் கோலியை டி20 கேப்டன்சியிலிருந்து விலகவேண்டாம் என்று பிசிசிஐ கேட்டுக்கொண்டதாகவும், ஆனால் அவர் அதை ஏற்க மறுத்து கேப்டன்சியிலிருந்து விலகியதாகவும் கூறினார். மேலும், அதன்விளைவாக வெள்ளைப்பந்து அணிகளுக்கு ஒரே கேப்டனை நியமிக்க வேண்டும் என்று தேர்வாளர்கள் விரும்பியதால் தான், கோலி நீக்கப்பட்டு ரோஹித் கேப்டனாக நியமிக்கப்பட்டதாகவும் கங்குலி கூறியிருந்தார்.

கோலியின் கேப்டன்சி நீக்கம், கோலி - ரோஹித் மோதல் என பல சர்ச்சை பேச்சுகளுக்கு ஒரே பேட்டியில் விளக்கம் கொடுத்துள்ளார் கோலி. கேப்டன் ரோஹித் மற்றும் பயிற்சியாளர் ராகுல் டிராவிட்டுக்கு தனது ஆதரவு எப்போதுமே இருக்கும் என்றும், அணியின் வளர்ச்சிக்கு கண்டிப்பாக பங்களிப்பேன் என்றும் நம்பிக்கையளித்தார் கோலி.

மேலும், தன்னை கேப்டன்சியிலிருந்து விலகவேண்டாம் என்று பிசிசிஐ கேட்டுக்கொண்டதாக கங்குலி கூறியது குறித்து பேசிய விராட் கோலி, நான் டி20 அணியின் கேப்டன்சியிலிருந்து விலகுகிறேன் என்று அதற்கான காரணங்களுடன் பிசிசிஐயிடம் தெரிவித்தபோது, அதை அவர்கள் எந்த மறுப்பும் இன்றி உடனடியாக ஏற்றுக்கொண்டனர். எனது முடிவை ஏற்றுக்கொள்வதில் பிசிசிஐ எந்த தயக்கமும் காட்டவில்லை. என்னை டி20 கேப்டன்சியிலிருந்து விலகவேண்டாம் என்று பிசிசிஐ சார்பில் அறிவுறுத்தவேயில்லை என்று கோலி தெரிவித்துள்ளார்.