உலகக்கோப்பையை வென்ற இந்திய வீராங்கனைகளுக்கு சொகுசு காரை பரிசாக வழங்கும் டாடா..

தென்னாப்பிரிக்கா அணியை வீழ்த்தி மகளிர் உலகக்கோப்பையை வென்ற இந்திய அணியில் இடம் பெற்ற ஒருவொரு வீராங்கனைக்கும் தலா 1 டாடா சியாரா கார் பரிசாக வழங்கப்படும் என டாடா மோட்டார்ஸ் அறிவித்துள்ளது.

மகளிர் கிரிக்கெட் வீராங்கனைகளுக்கு டாடா சியரா கார்: 2025 மகளிர் உலகக் கோப்பையில் இந்திய மகளிர் அணி முதல் முறையாக கோப்பையை வென்று வரலாறு படைத்துள்ளது. நவம்பர் 2 அன்று நவி மும்பையில் உள்ள டி.ஒய். பாட்டீல் ஸ்போர்ட்ஸ் அகாடமியில் நடந்த இறுதிப் போட்டியில் தென்னாப்பிரிக்காவை 52 ரன்கள் வித்தியாசத்தில் வீழ்த்தி உலகக் கோப்பையை கைப்பற்றியது. ஹர்மன்பிரீத் கவுர் தலைமையிலான இந்திய அணி இந்த வரலாற்றுச் சாதனையை படைத்துள்ளது. இதற்காக பரிசுத் தொகையாக அவர்களுக்கு 39.55 கோடி ரூபாய் வழங்கப்பட்டது. இது தவிர, இந்திய மகளிர் அணிக்கு 51 கோடி ரூபாய் வழங்குவதாகவும் பிசிசிஐ அறிவித்துள்ளது. தற்போது இந்திய அணியின் மன உறுதியை அதிகரிக்க டாடா மோட்டார்ஸ் நிறுவனமும் ஒரு பெரிய அறிவிப்பை வெளியிட்டுள்ளது.

ஒவ்வொரு வீராங்கனைக்கும் இந்த காரை வழங்கும் டாடா மோட்டார்ஸ்

மகளிர் உலகக் கோப்பை வென்ற பிறகு, இந்திய மகளிர் அணி மீது பரிசுகள் குவிந்து வருகின்றன. இந்த வரிசையில், டாடா மோட்டார்ஸ் நிறுவனம் தனது வரவிருக்கும் டாடா சியரா காரை அணியின் ஒவ்வொரு வீராங்கனைக்கும் வழங்குவதாக அறிவித்துள்ளது. இந்த காரின் ஆரம்ப விலை 12.5 லட்சம் ரூபாயில் இருந்து தொடங்குகிறது. டாடா மோட்டார்ஸ் தலைமை செயல் அதிகாரி சைலேந்திர சந்திரா கூறுகையில், இந்திய அணி தனது அசாதாரண செயல்திறன் மற்றும் அற்புதமான வெற்றியால் ஒட்டுமொத்த நாட்டையும் பெருமைப்படுத்தியுள்ளது. அவர்களின் பயணம், ஒவ்வொரு இந்தியரையும் ஊக்குவிக்கும் உறுதி மற்றும் வளர்ச்சியின் சக்தி என்றார். விரைவில் அறிமுகப்படுத்தப்பட உள்ள டாடா சியரா, இந்திய அணியின் ஒவ்வொரு வீராங்கனைக்கும் வழங்கப்படும் என்றும் அவர் கூறினார்.

சமீபத்தில் பிரதமர் மோடியை சந்தித்தனர்

உலகக் கோப்பை வென்ற அணியில் இடம்பெற்றிருந்த அனைத்து வீராங்கனைகளும் புதன்கிழமை அன்று பிரதமர் நரேந்திர மோடியை சந்தித்தனர். அவர்கள் பிரதமருக்கு 'நமோ 1' என்ற ஜெர்சியையும் பரிசளித்தனர். மேலும், பிரதமர் மோடியுடன் நீண்ட நேரம் உரையாடினர். இது தவிர, இந்திய அணிக்கு பிசிசிஐ சார்பில் 51 கோடி ரூபாய் பரிசுத் தொகை வழங்கப்பட்டுள்ளது. அதே சமயம், ஐசிசி சார்பில் அவர்களுக்கு 39.55 கோடி ரூபாய் பரிசுத் தொகை வழங்கப்பட்டுள்ளது. மேலும், இந்திய அணியின் ஒவ்வொரு வீராங்கனைக்கும் பல இடங்களில் வரவேற்பு அளிக்கப்பட்டு வருகிறது.

இறுதிப் போட்டியில் தென்னாப்பிரிக்காவை வீழ்த்திய இந்தியா

ஐசிசி மகளிர் உலகக் கோப்பை 2025 இறுதிப் போட்டியில் இந்திய அணி தென்னாப்பிரிக்காவை 52 ரன்கள் வித்தியாசத்தில் வீழ்த்தியது. முதலில் பேட்டிங் செய்த இந்தியா, நிர்ணயிக்கப்பட்ட 50 ஓவர்களில் 7 விக்கெட் இழப்புக்கு 298 ரன்கள் எடுத்தது. பதிலுக்கு ஆடிய தென்னாப்பிரிக்க அணி 45.3 ஓவர்களில் அனைத்து விக்கெட்டுகளையும் இழந்து 246 ரன்கள் மட்டுமே எடுத்தது. இதன் மூலம் இந்தியா இந்த வரலாற்று வெற்றியை பதிவு செய்தது.