ஜிம்பாப்வேயை வச்சு செஞ்ச வணிந்து ஹசரங்கா – அசால்டா 7 விக்கெட் எடுத்து சாதனை!

ஜிம்பாப்வே அணிக்கு எதிரான கடைசி ஒருநாள் போட்டியில் இலங்கை வீரர் வணிந்து ஹசரங்கா 7 விக்கெட்டுகள் கைப்பற்றி அசத்தியுள்ளார்.

இலங்கையில் சுற்றுப்பயணம் மேற்கொண்ட ஜிம்பாப்வே அணியானது 3 ஒருநாள் போட்டிகள் தொடர் மற்றும் 3 டி20 போட்டிகள் கொண்ட தொடரில் விளையாடி வருகிறது. முதலில் 3 போட்டிகள் கொண்ட ஒருநாள் தொடர் நடந்தது. இதில் முதல் போட்டியானது மழையால் ரத்து செய்யப்பட்டது. இதையடுத்து நடந்த 2ஆவது ஒருநாள் போட்டியில் இலங்கை 2 விக்கெட் வித்தியாசத்தில் வெற்றி பெற்றது.

கடைசியாக நேற்று இரு அணிகளுக்கு இடையிலான 3ஆவது மற்றும் கடைசி டி20 போட்டி நடந்தது. இந்தப் போட்டியில் மழை பெய்த நிலையில் போட்டியானது 27 ஓவர்களாக குறைக்கப்பட்டது. டாஸ் வென்று முதலில் பேட்டிங் செய்த ஜிம்பாப்வே 22.5 ஓவர்களில் அனைத்து விக்கெட்டுகளையும் இழந்து 96 ரன்கள் மட்டுமே எடுத்தது. இதில் அதிகபட்சமாக விக்கெட் கீப்பர் ஜாய்லார்ட் கும்பி 29 ரன்கள் எடுத்தார்.

முதல் 10 ஓவர்களில் ஒரு விக்கெட் இழந்து 44 ரன்கள் எடுத்திருந்த ஜிம்பாப்வே அடுத்து ஹசரங்காவின் ஒரே ஓவரில் மட்டும் 2 விக்கெட்டுகளை இழந்து தடுமாறியது. அதன் பிறகு மழை பெய்யவே போடியானது 27 ஓவர்களாக குறைக்கப்பட்டது. அடுத்தடுத்து ஹசரங்கா விக்கெட்டுகள் எடுக்க ஜிம்பாப்வே 96 ரன்கள் மட்டும் எடுத்தது. சுழற்பந்து வீச்சாளரான வணிந்து ஹசரங்கா 5.5 ஓவர்களில் ஒரு மெய்டன் உள்பட 19 ரன்கள் கொடுத்து 7 விக்கெட்டுகள் கைப்பற்றி சாதனை படைத்துள்ளார்.

பின்னர், எளிய இலக்கை துரத்திய இலங்கை அணியில் கேப்டன் குசால் மெண்டிஸ் 66 ரன்களும், சதீரா சமரவிக்ரமா 14 ரன்களும் எடுக்க இலங்கை 16.4 ஓவர்களில் 2 விக்கெட்டுகளை இழந்து 8 விக்கெட்டுகள் வித்தியாசத்தில் வெற்றி பெற்று 3 போட்டிகள் கொண்ட ஒருநாள் தொடரை 2-0 என்று கைப்பற்றியது. இந்தப் போட்டியில் வணிந்து ஹசரங்கா ஆட்டநாயகன் விருது வென்றார். இதைத் தொடர்ந்து வரும் 14 ஆம் தேதி இரு அணிகளுக்கு இடையிலான முதல் டி20 போட்டி நடக்க இருக்கிறது என்பது குறிப்பிடத்தக்கது.