ENG vs SA முதல் டெஸ்ட்: முதல் இன்னிங்ஸ் முடிவில் தென்னாப்பிரிக்கா வலுவான முன்னிலை..! இங்கி.,க்கு பின்னடைவு

இங்கிலாந்து - தென்னாப்பிரிக்கா இடையேயான முதல் டெஸ்ட்டின் முதல் இன்னிங்ஸில் இங்கிலாந்து அணி வெறும் 165 ரன்கள் மட்டுமே அடித்த நிலையில், தென்னாப்பிரிக்க அணி 326 ரன்களை குவித்து 161 ரன்கள் முன்னிலை பெற்றது.  

இங்கிலாந்து - தென்னாப்பிரிக்கா இடையேயான 3 டெஸ்ட் போட்டிகள் கொண்ட தொடரின் முதல் போட்டி லண்டன் லார்ட்ஸில் நடந்துவருகிறது. இந்த போட்டியில் டாஸ் வென்ற தென்னாப்பிரிக்க அணி ஃபீல்டிங்கை தேர்வு செய்தது.

முதலில் பேட்டிங் ஆடிய இங்கிலாந்து அணி வீரர்கள் தென்னாப்பிரிக்க ஃபாஸ்ட் பவுலர்களிடம் தொடக்கம் முதலே சீரான இடைவெளியில் தொடர்ச்சியாக அடுத்தடுத்து விக்கெட்டுகளை இழந்தனர்.

இதையும் படிங்க- கங்குலியின் விலா எலும்பை உடைக்க சொல்லி டீம் மீட்டிங்கில் சொன்னாங்க.. நானும் உடைத்தேன் - அக்தர் ஃப்ளாஷ்பேக்

இங்கிலாந்து அணியில் ஆலி போப்பை தவிர வேறு யாருமே சரியாக பேட்டிங் ஆடவில்லை. அபாரமாக ஆடி அரைசதம் அடித்த ஆலி போப், 73 ரன்களை குவித்தார். அவரைத்தவிர மற்ற அனைவரும் சொற்ப ரன்களில் ஆட்டமிழந்ததால் முதல் இன்னிங்ஸில் இங்கிலாந்து அணி வெறும் 165 ரன்களுக்கு ஆல் அவுட்டானது.

தென்னாப்பிரிக்க அணி சார்பில் அதிகபட்சமாக ரபாடா 5 விக்கெட்டுகளும், நோர்க்யா 3 விக்கெட்டுகளும், மார்கோ யான்சென் 2 விக்கெட்டுகளும் வீழ்த்தினர்.

இதையும் படிங்க - ZIM vs IND: 2வது ஒருநாள் போட்டிக்கான இந்திய அணியின் உத்தேச ஆடும் லெவன்..! என்னென்ன மாற்றங்கள்..?

இதையடுத்து முதல் இன்னிங்ஸை ஆடிய தென்னாப்பிரிக்க வீரர்கள் இங்கிலாந்து அணியின் பவுலிங்கை கவனமுடன் எதிர்கொண்டு சிறப்பாக பேட்டிங் ஆடினர். தொடக்க வீரர்கள் எல்கர் - எர்வீ இணைந்து முதல் விக்கெட்டுக்கு 85 ரன்களை குவித்தனர். எல்கர் 47 ரன்களுக்கு ஆட்டமிழக்க, அபாரமாக பேட்டிங் ஆடிய எர்வீ 73 ரன்களை குவித்தார்.

மார்கோ யான்சென் (48), மஹராஜ் (41), நோர்க்யா(28) ஆகிய பவுலர்களும் நல்ல பங்களிப்பை செய்ய, முதல் இன்னிங்ஸில் 326 ரன்களை குவித்த தென்னாப்பிரிக்க அணி, 161 ரன்கள் முன்னிலை பெற்றது. 161 ரன்கள் பின் தங்கிய நிலையில், 3ம் நாள் ஆட்டத்தின் முதல் செசனில் 2வது இன்னிங்ஸை தொடங்கி ஆடிவருகிறது இங்கிலாந்து அணி.