NZ vs ENG: என்னதான் ஆச்சு இந்த நியூசிலாந்து அணிக்கு.? 2வது டெஸ்ட்டிலும் சீட்டுக்கட்டாய் சரிந்த பேட்டிங் ஆர்டர்

இங்கிலாந்துக்கு எதிரான 2வது டெஸ்ட்டிலும் நியூசிலாந்து அணியின் பேட்டிங் ஆர்டர் சீட்டுக்கட்டாய் சரிந்தது. முதல் இன்னிங்ஸில் இங்கிலாந்து அணி 435 ரன்களை குவித்து டிக்ளேர் செய்த நிலையில், 2ம் நாள் ஆட்ட முடிவில் நியூசிலாந்து அணி முதல் இன்னிங்ஸில் 7 விக்கெட் இழப்பிற்கு 138 ரன்கள் மட்டுமே அடித்துள்ளது.  

இங்கிலாந்து அணி நியூசிலாந்தில் சுற்றுப்பயணம் செய்து 2 டெஸ்ட் போட்டிகள் கொண்ட தொடரில் ஆடிவருகிறது. முதல் டெஸ்ட்டில் 267 ரன்கள் வித்தியாசத்தில் அபார வெற்றி பெற்று 1-0 என இங்கிலாந்து அணீ தொடரில் முன்னிலை வகிக்கும் நிலையில், 2வது டெஸ்ட் போட்டி வெலிங்டனில் பிப்ரவரி 24ம் தேதி தொடங்கி நடந்துவருகிறது. 2வது டெஸ்ட் போட்டியில் டாஸ் வென்ற இங்கிலாந்து அணி பேட்டிங்கை தேர்வு செய்தது. 

இங்கிலாந்து அணி:

ஜாக் க்ராவ்லி, பென் ட்க்கெட், ஆலி போப், ஜோ ரூட், ஹாரி ப்ரூக், பென் ஸ்டோக்ஸ் (கேப்டன்), பென் ஃபோக்ஸ் (விக்கெட் கீப்பர்), ஆலி ராபின்சன், ஸ்டூவர்ட் பிராட், ஜாக் லீச், ஜேம்ஸ் ஆண்டர்சன்.

நியூசிலாந்து அணி:

டாம் லேதம், டெவான் கான்வே, கேன் வில்லியம்சன், வில் யங், ஹென்ரி நிகோல்ஸ், டேரைல் மிட்செல், டாம் பிளண்டெல் (விக்கெட் கீப்பர்), மைக்கேல் பிரேஸ்வெல், டிம் சௌதி (கேப்டன்), மேட் ஹென்ரி, நீல் வாக்னர்.

முதலில் பேட்டிங் ஆடிய இங்கிலாந்து அணியின் தொடக்க வீரர்கள் ஜாக் க்ராவ்லி(2) மற்றும் பென் டக்கெட் (9) ஆகிய இருவருமே ஒற்றை இலக்கத்தில் வெளியேறினர். ஆலி போப்பும் 10 ரன்களுக்கு ஆட்டமிழக்க, 21 ரன்களுக்கே இங்கிலாந்து அணி 3 விக்கெட்டுகளை இழந்துவிட்டது. அதன்பின்னர் ஹாரி ப்ரூக்கும் ஜோ ரூட்டும் இணைந்து அபாரமாக பேட்டிங் ஆடி இருவருமே சதமடித்தனர். ஹாரி ப்ரூக் அடித்து ஆடி சதமடிக்க, அவருடன் இணைந்து பொறுப்புடன் ஆடிய ரூட்டும் சதமடித்தார்.

ப்ரூக் - ரூட் ஜோடியின் சிறப்பான பேட்டிங்கால் முதல் நாள் ஆட்ட முடிவில் இங்கிலாந்து அணி 3 விக்கெட் இழப்பிற்கு 315 ரன்களை குவித்திருந்தது. ஹாரி ப்ரூக் 169 பந்தில் 184 ரன்களுடனும், ரூட் 101 ரன்களுடனும் களத்தில் இருந்தனர். 2ம் நாளான இன்றைய ஆட்டம் தொடங்கிய சில நிமிடங்களில் 186 ரன்களுக்கு ப்ரூக் ஆட்டமிழந்தார். அதன்பின்னர் ரூட் ஒருமுனையில் நிலைத்து நின்று ஆட, மறுமுனையில் கேப்டன் பென் ஸ்டோக்ஸ்(27), பென் ஃபோக்ஸ்(0), ஸ்டூவர்ட் பிராட் (14), ஆலி ராபின்சன் (18) ஆகியோர் ஆட்டமிழக்க, ரூட் 153 ரன்களுடன் அவுட்டாகாமல் இருந்த நிலையில், 8 விக்கெட் இழப்பிற்கு 435 ரன்களை குவித்த நிலையில், இங்கிலாந்து அணி முதல் இன்னிங்ஸை டிக்ளேர் செய்தது.

இதையடுத்து முதல் இன்னிங்ஸை தொடங்கிய நியூசிலாந்து அணி தொடக்கம் முதலே சீரான இடைவெளியில் மளமளவென விக்கெட்டுகளை இழந்தது. முதல் டெஸ்ட்டில் பேட்டிங் மோசமாக ஆடியதால் தான் நியூசிலாந்து அணி படுதோல்வி அடைந்தது. முதல் முறையாக நடத்தப்பட்ட டெஸ்ட் சாம்பியன்ஷிப்பில் கோப்பையை வென்ற நடப்பு டெஸ்ட் சாம்பியனான நியூசிலாந்து அணி, சொந்த மண்ணில் இங்கிலாந்துக்கு எதிராக படுமோசமாக ஆடிவருகிறது.

கேன் வில்லியம்சன் டெஸ்ட் கேப்டன்சியிலிருந்து விலகிய நிலையில், டிம் சௌதியின் கேப்டன்சியில் நியூசிலாந்து அணி டெஸ்ட் கிரிக்கெட்டில் ஆடிவருகிறது. 

2வது டெஸ்ட்டில் முதல் இன்னிங்ஸை தொடங்கிய நியூசிலாந்து அணி வீரர்கள் டெவான் கான்வே(0), கேன் வில்லியம்சன்(4), வில் யங்(2) ஆகியோர் படுமோசமாக ஆடி ஆட்டமிழந்தனர். கொஞ்ச நேரம் தாக்குப்பிடித்து ஆடிய தொடக்க வீரர் டாம் லேதமும் 35 ரன்களுக்கு ஆட்டமிழந்தார். ஹென்ரி நிகோல்ஸ் 30 ரன்களுக்கும், டேரைல் மிட்செல் 13 ரன்களுக்கும் ஆட்டமிழந்தனர். பிரேஸ்வெல் 6 ரன் மட்டுமே அடித்து அவுட்டானார். 103 ரன்களுக்கே நியூசிலாந்து அணி 7 விக்கெட்டுகளை இழந்துவிட்டது. 2ம் நாள் ஆட்ட முடிவில் நியூசிலாந்து அணி 7 விக்கெட் இழப்பிற்கு 138 ரன்கள் அடித்துள்ளது. டாம் பிளண்டெல் 25 ரன்களுடனும், கேப்டன் டிம் சௌதி 23 ரன்களுடனும் களத்தில் உள்ளனர்.