Australia vs England: என்னதான் ஆச்சு இந்த இங்கிலாந்து அணிக்கு?ஆரம்பத்துலயே 2 விக்கெட்டை இழந்து திணறும் இங்கி.,

ஆஷஸ் தொடரின் 2வது டெஸ்ட்டின் முதல் இன்னிங்ஸில் ஆஸ்திரேலிய அணி 473 ரன்களை குவித்த நிலையில், இங்கிலாந்து அணி தொடக்கத்திலேயே 2 விக்கெட்டுகளை இழந்துவிட்டது.  

ஆஸ்திரேலியா - இங்கிலாந்து இடையே நடத்தப்படும் பாரம்பரிய டெஸ்ட் தொடர் ஆஷஸ். ஆஷஸ் டெஸ்ட் தொடர் ஆஸ்திரேலியா மற்றும் இங்கிலாந்து நாடுகளுக்கு உலக கோப்பை போன்றது. அதனால் ஆஷஸ் தொடரில் இருநாடுகளுமே கடும் வெற்றி வேட்கையுடன் ஆடும்.

2020-2021ம் ஆண்டுக்கான ஆஷஸ் தொடர் ஆஸ்திரேலியாவில் நடக்கிறது. 5 டெஸ்ட் போட்டிகள் கொண்ட ஆஷஸ் தொடரின் முதல் போட்டியில் பேட்டிங் மற்றும் பவுலிங் என இரண்டிலுமே சரியாக ஆடாத இங்கிலாந்து அணி 9 விக்கெட் வித்தியாசத்தில் படுதோல்வி அடைந்தது. ஆஸ்திரேலிய அணி முழுக்க முழுக்க இங்கிலாந்து மீது ஆதிக்கம் செலுத்தி அபார வெற்றி பெற்றது. 

இதையடுத்து 2வது டெஸ்ட் போட்டி நேற்று(டிசம்பர் 16) தொடங்கி நடந்துவருகிறது. அடிலெய்டில் பகலிரவு டெஸ்ட் போட்டியாக இது நடந்துவருகிறது.  இந்த போட்டியில் ஆஸ்திரேலிய கேப்டன் பாட் கம்மின்ஸ் ஆடாததால் ஸ்டீவ் ஸ்மித் கேப்டனாக செயல்படுகிறார். டாஸ் வென்று பேட்டிங்கை தேர்வு செய்தார்.

முதலில் பேட்டிங் ஆடிய ஆஸ்திரேலிய அணியின் தொடக்க வீரர் மார்கஸ் ஹாரிஸ் வெறும் 3 ரன்னில் ஆட்டமிழந்தார். அதன்பின்னர் டேவிட் வார்னரும், லபுஷேனும் இணைந்து மிகச்சிறப்பாக பேட்டிங் ஆடி 2வது விக்கெட்டுக்கு 172 ரன்களை குவித்தனர். சிறப்பாக பேட்டிங் ஆடி சதத்தை நெருங்கிய வார்னர் 95 ரன்னில் ஆட்டமிழந்து சதத்தை தவறவிட்டார். 

அதன்பின்னர் லபுஷேனும் ஸ்மித்தும் இணைந்து நன்றாக ஆடினர். லபுஷேன் 21 ரன் மற்றும் 95 ரன்னில் இருந்தபோது கொடுத்த 2 கேட்ச் வாய்ப்பையும் இங்கிலாந்து விக்கெட் கீப்பர் ஜோஸ் பட்லர் கோட்டைவிட, அந்த வாய்ப்பை பயன்படுத்தி சதமடித்த லபுஷேன் 2ம் நாள் ஆட்டமான இன்று 103 ரன்னில் ஆட்டமிழந்தார். சிறப்பாக ஆடி சதத்தை நெருங்கிய ஸ்டீவ் ஸ்மித் 93 ரன்னில் ஆட்டமிழந்து வார்னரை போலவே, ஸ்மித்தும் சதத்தை தவறவிட்டார்.

டிராவிஸ் ஹெட் (18), கேமரூன் க்ரீன் (2) ஆகியோர் சொற்ப ரன்களில் ஆட்டமிழந்தாலும், அலெக்ஸ் கேரி (51), மிட்செல் ஸ்டார்க் (39) மற்றும் மைக்கேல் நெசெர் (35) ஆகிய மூவரும் நன்றாக ஆட, 473 ரன்களை குவித்த ஆஸ்திரேலிய அணி, 9 விக்கெட் இழப்பிற்கு 473 ரன்களை குவித்து முதல் இன்னிங்ஸை டிக்ளேர் செய்தது. 

இதையடுத்து 2ம் நாள் ஆட்டத்தின் கடைசி செசனில் முதல் இன்னிங்ஸை தொடங்கிய இங்கிலாந்து அணி, ஆரம்பத்திலேயே தொடக்க வீரர்கள் இருவரின் விக்கெட்டுகளையும் இழந்துவிட்டது. மிட்செல் ஸ்டார்க் வீசிய 3வது ஓவரின் முதல் பந்தில் ரோரி பர்ன்ஸ் 4 ரன்னில் ஆட்டமிழந்தார். அதன்பின்னர் டேவிட் மலான் களத்திற்கு வந்தார். அதன்பின்னர் ஆஸ்திரேலிய அணியின் அறிமுக ஃபாஸ்ட் பவுலர் மைக்கேல் நெசெரின் பவுலிங்கில் 7வது ஓவரில் 6 ரன்னுக்கு ஆட்டமிழந்தார் ஹசீப் ஹமீத்.

12 ரன்னுக்கே 2 விக்கெட்டுகளை இழந்துவிட்டது இங்கிலாந்து அணி. ஜோ ரூட்டும் டேவிட் மலானும் களத்தில் இருந்த நிலையில், 2ம் நாள் ஆட்டம் முடிந்தது. 2ம் நாள் ஆட்ட முடிவில் இங்கிலாந்து அணி 2 விக்கெட் இழப்பிற்கு 17 ரன்கள் அடித்துள்ளது.

இங்கிலாந்து அணி பவுலிங்கில் பெரிதாக சோபிக்காத நிலையில், பேட்டிங்கிலும் தொடக்கத்திலேயே 2 விக்கெட்டுகளை இழந்து திணறிவருகிறது. 3ம் நாளான நாளைய ஆட்டத்தில் சுதாரித்து கவனமாக ஆடி பெரிய பார்ட்னர்ஷிப் அமைக்கவில்லை என்றால், மீண்டுமொரு படுதோல்வியை அடைய நேரிடும்.