WPL 2023: அட கொடுமையே... ஆர்சிபிக்கு தொடர்ச்சியாக 5வது தோல்வி..! டெல்லி கேபிடள்ஸ் வெற்றி

மகளிர் பிரீமியர் லீக்கில் ஆர்சிபிக்கு எதிரான போட்டியில் 6 விக்கெட் வித்தியாசத்தில் அபார வெற்றி பெற்றது டெல்லி கேபிடள்ஸ் அணி. இந்த தொடரில் இதுவரை ஆடிய 5 போட்டிகளிலும் ஆர்சிபி அணி தொடர்ச்சியாக தோல்வியடைந்துள்ளது.  

மகளிர் பிரீமியர் லீக் தொடர் விறுவிறுப்பாக நடந்துவருகிறது. முதல் 4 போட்டிகளிலும் தோல்வியை தழுவிய ஆர்சிபி அணி, முதல் வெற்றியை எதிர்நோக்கி வலுவான டெல்லி கேபிடள்ஸை எதிர்கொண்டது. ஆனால் இந்த போட்டியிலும் ஏமாற்றமே மிஞ்சியது. மும்பை டி.ஒய் பாட்டீல் ஸ்டேடியத்தில் நடக்கும் இந்த போட்டியில் டாஸ் வென்ற டெல்லி கேபிடள்ஸ் அணி ஃபீல்டிங்கை தேர்வு செய்தது. 

டெல்லி கேபிடள்ஸ் அணி: 

மெக் லானிங் (கேப்டன்), ஷஃபாலி வெர்மா, அலைஸ் கேப்ஸி, ஜெமிமா ரோட்ரிக்ஸ், மேரிஸன் கேப், டானியா பாட்டியா, ஜெஸ் ஜோனாசென், அருந்ததி ரெட்டி, ராதா யாதவ், ஷிகா பாண்டே, ராதா நோரிஸ். 

ஆர்சிபி அணி: 

ஸ்மிரிதி மந்தனா (கேப்டன்), சோஃபி டிவைன், எலைஸ் பெர்ரி, ஹீதர் நைட், ரிச்சா கோஷ்ஹ், ஷ்ரேயங்கா பாட்டீல், திஷா கசட், மேகன் ஸ்கட், ஆஷா சோபனா, ரேணுகா சிங், பிரீத்தி போஸ்.

முதலில் பேட்டிங் ஆடிய ஆர்சிபி அணியின் தொடக்க வீராங்கனையும் கேப்டனுமான ஸ்மிரிதி மந்தனா 15 பந்தில் 8 ரன் மட்டுமே அடித்து ஏமாற்றமளித்தார். மற்றொரு தொடக்க வீராங்கனையான டிவைன் 19 பந்தில் 21 ரன்கள் மட்டுமே அடித்தார். 3ம் வரிசையில் இறங்கிய எலைஸ் பெர்ரி பொறுப்புடன் பேட்டிங் ஆடி அரைசதம் அடித்தார். 5ம் வரிசையில் இறங்கிய ரிச்சா கோஷ் அடித்து ஆடி 16 பந்தில் 3 பவுண்டரிகள் மற்றும் 3 சிக்ஸர்களுடன் 37 ரன்களை விளாசினார். எலைஸ் பெர்ரி 67 ரன்கள் அடித்து கடைசிவரை நின்று இன்னிங்ஸை முடித்து கொடுத்தார். 20 ஓவரில் 150 ரன்கள் அடித்து ஆர்சிபி அணி.

151 ரன்கள் என்ற இலக்கை விரட்டிய டெல்லி கேபிடள்ஸ் அணியின் தொடக்க வீராங்கனைகள் ஷஃபாலி வெர்மா(0) மற்றும் மெக் லானிங்(15) ஆகிய இருவரும் சொதப்பினர். 3ம் வரிசையில் இறங்கிய அலைஸ் கேப்ஸி 24 பந்தில் 8 பவுண்டரிகளுடன் 38 ரன்கள் அடித்தார். ஜெமிமா ரோட்ரிக்ஸ் 32 ரன்கள் அடித்தார். அதன்பின்னர் இறங்கிய மேரிஸன் கேப் மற்றும் ஜெஸ் ஜோனாசென் ஆகிய இருவரும் இணைந்து இலக்கை அடித்து போட்டியை முடித்து கொடுத்தனர். 6 விக்கெட் வித்தியாசத்தில் டெல்லி கேபிடள்ஸ் அணி அபார வெற்றி பெற்றது.

முதல் வெற்றியை எதிர்நோக்கி ஆடிய ஆர்சிபிக்கு மீண்டும் ஏமாற்றமே மிஞ்சியது. தொடர்ச்சியாக 5 போட்டிகளில் தோற்றுள்ளது ஆர்சிபி அணி.