ஷார் டேங்கின் கெவின் ஓ'லியரி, ஸ்டீவ் ஜாப்ஸின் "சிக்னல்-டு-நாய்ஸ்" ரகசிய ஃபார்முலாவை வெளிப்படுத்தினார். இது ஆப்பிளை ஒரு உலக நிறுவனமாக மாற்றியது என்பதை இக்கட்டுரையில் காண்போம்.
“ஷார் டேங்க்” (Shark Tank) நிகழ்ச்சியின் பிரபல முதலீட்டாளர் கெவின் ஓ’லியரி, ஆப்பிள் நிறுவனத்தின் புகழ்பெற்ற இணை நிறுவனர் ஸ்டீவ் ஜாப்ஸை ஒரு நேர்காணலில் விவரித்துள்ளார். ஓ’லியரியின் கூற்றுப்படி, ஜாப்ஸ் மிகவும் திமிர் பிடித்தவர், கறாரானவர் ஆனால், வெற்றியில் முழு கவனம் செலுத்திய ஒரு தொழில்முனைவர். 1990களின் தொடக்கத்தில் ஜாப்ஸுடன் பணிபுரிந்த காலத்தை நினைவுகூரும் ஓ’லியரி, ஜாப்ஸ் நள்ளிரவில் கூட மின்னஞ்சல் அனுப்புவார் என்றும், அதற்கு உடனடியாகப் பதில் எதிர்பார்க்கிறார் என்றும் கூறுகிறார். “நீ சும்மா இரு, நான் சொல்வதைச் செய்!” என்று கூட ஒருமுறை ஜாப்ஸ் தன்னிடம் கூறியதாக ஓ’லியரி ‘தி டைரி ஆஃப் எ சி.இ.ஓ’ (The Diary of a CEO) பாட்காஸ்டில் கூறியுள்ளார். ஜாப்ஸுடன் பணிபுரிவது கடினமானது என்றாலும், அவரது தீவிரமான கவனம், ஆப்பிள் நிறுவனத்தை உலகின் மிகவும் வெற்றிகரமான நிறுவனங்களில் ஒன்றாக மாற்றியது.
24
ஆப்பிளை உருவாக்கிய ரகசிய ஃபார்முலா
ஜாப்ஸின் வெற்றிக்கு முக்கிய காரணம், அவர் பின்பற்றிய ஒரு ஃபார்முலாதான் என்று ஓ’லியரி கூறுகிறார். அதுதான் ‘சிக்னல்-டு-நாய்ஸ்’ (signal-to-noise) விகிதம்.
• சிக்னல் (Signal): ஒரு நாளில் செய்ய வேண்டிய மிக முக்கியமான 3 முதல் 5 வேலைகளில் மட்டும் கவனம் செலுத்துவது.
• நாய்ஸ் (Noise): அந்த முக்கியமான வேலைகளிலிருந்து கவனத்தை சிதறடிக்கும் மற்ற அனைத்து விஷயங்களும்.
ஜாப்ஸைப் பொறுத்தவரை, அது எப்போதும் 80% சிக்னல் மற்றும் 20% நாய்ஸ் ஆக இருந்தது. இந்த கூர்மையான கவனம் தான் ஜாப்ஸை மற்றவர்களிடமிருந்து வேறுபடுத்திக் காட்டியது, மேலும் ஆப்பிளை ஒரு உலகளாவிய சக்தியாக மாற்றியது என்கிறார் ஓ’லியரி.
34
ஜாப்ஸிற்குப் பிறகு அடுத்து யார்?
ஜாப்ஸைப் போலவே, முழுமையான கவனம் மற்றும் அர்ப்பணிப்பு கொண்ட மற்றொரு தொழில்முனைவர் எலான் மஸ்க் என்று ஓ’லியரி நம்புகிறார். மஸ்க்-இன் ஒரு நாளில் "சத்தம் (noise)" என்பது இல்லை என்றும், அவரது ஒவ்வொரு நிமிடமும் டெஸ்லா, நியூராலிங்க், ஸ்பேஸ்எக்ஸ் மற்றும் அவரது பிற முயற்சிகளுக்காக அர்ப்பணிக்கப்பட்டுள்ளது என்றும் அவர் கூறுகிறார். மஸ்க் ஒரு நாளைக்கு 18 மணி நேரம் வரை கூட வேலை செய்கிறார். ஜாப்ஸ் தனிப்பட்ட தொழில்நுட்பத்தில் புரட்சி செய்தது போல, மஸ்க் எலெக்ட்ரிக் வாகனங்கள் (EV), விண்வெளி ஆய்வு (ஸ்பேஸ்எக்ஸ்), செயற்கை நுண்ணறிவு (Grok AI) போன்ற துறைகளில் புரட்சி செய்து வருகிறார். இந்த ‘அனைத்தும் சிக்னல், சத்தம் இல்லை’ (all signal, no noise) என்ற மனப்பான்மைதான் மேதைகளையும் சாதாரண நிர்வாகிகளையும் பிரித்துக் காட்டுகிறது என்று ஓ’லியரி குறிப்பிடுகிறார்.
இன்றும் கெவின் ஓ’லியரி, சி.இ.ஓ-க்கள் மற்றும் எம்.பி.ஏ மாணவர்களுக்கு ஜாப்ஸின் இந்த ஃபார்முலாவை கற்பித்து வருகிறார். ‘அடுத்த ஆண்டு பற்றி அல்ல, அடுத்த 18 மணிநேரம் பற்றி மட்டும் கவனம் செலுத்துங்கள்’ என்று அவர் அறிவுரை கூறுகிறார். இந்த கடுமையான ஒழுக்கம்தான், தொழில்நுட்ப உலகில் வெற்றி பெறுவதற்கான உண்மையான ரகசியம் என்கிறார் ஓ’லியரி.
